Kitango 44

Balunda Netu Bafwainwa Kutemwa Lesa

BALUNDA netu ke boba bo twisamba nabo ne kukaya nabo. Pano bino kyanema bingi kwikala na balunda bawama. Nga mulunda netu wawama ye ñanyi?— Ee, ke Yehoba Lesa.

Nanchi twakonsha kwikala balunda na Lesa nyi?— Baibolo waamba’mba Abalahama, muntu wajingako kala kene, wajinga “mulunda na Lesa.” (Yakoba 2:23) Nanchi wayuka kyo aikejile mulunda na Lesa nyi?— Baibolo wakumbula’mba Abalahama wamwitabile Lesa. Waitabile nangwatu bintu byo bamwambijile kuba byakatezhe bingi. Onkao mambo, pa kuba’mba twikale balunda na Lesa, twafwainwa kubanga bintu bimutokesha pa muchima, byonka byaubanga Abalahama ne Mufunjishi Wayukisha.—Ntendekelo 22:1-14; Yoano 8:28, 29; Bahebelu 11:8, 17-19.

Yesu waambijile batumwa banji amba: “Anweba mwi balunda nami, umvwe mwauba byo nemukambizha.” (Yoano 15:14) Yesu byo aambanga ku bantu bintu byafumanga kwi Yehoba, ko kumvwa amba balunda nanji baubanga bintu byaambanga Lesa. Ee, balunda nanji bonsetu batemenwe bingi Lesa.

Balunda nanji bamo bajinga batumwa banji, aba baji pa kipikichala pa peja 75 mu uno buku. Baendangatu nanji kabiji bamukwashangako mu mwingilo wanji wa kusapwila. Yesu javula waendangatu na batumwa banji. Bajanga ne kwisambila pamo mambo a Lesa. Kabiji ne bintutu bikwabo nabyo baubilangatu pamo. Pano bino Yesu wajinga na balunda bavula bingi. Bapwilanga pamo na kwisamba misambo yawama.

Kisemi kimo Yesu kyo atemenwe kwikala nakyo kyaikalanga mu muzhi mucheche wa Betani, wajingatu kipikipi na muzhi mukatampe wa Yelusalema. Abya ubena kwikivuluka kino kisemi nyi?— Bajinga ba Maliya, Mata, ne Lazalasa mulongo wabo. Yesu watelele Lazalasa amba mulunda nanji. (Yoano 11:1, 5, 11) Kino kisemi kyatemenwe bingi Yehoba kabiji kyamwingijilanga, kyo kyamulengejile amba ekitemwe.

Kino kechi kilumbulula’mba Yesu washikilwe bantu babulanga kwingijila Lesa ne. Nabo wibatemenwe. Wayanga ne ku mazubo abo na kuja nabo. Kino kyalengejile bantu bamo kwamba’mba Yesu mulunda wa “basonkeshi ne bandengamambo.” (Mateo 11:19) Kishinka ke kya kuba’mba, Yesu kechi wayanga ku mazubo a bano bantu mambo a kuba’mba watemenwe bwikalo bwabo ne. Wibafwakeshanga kukeba’mba besambenga pe Yehoba. Wakebelenga kwibakwasha amba baleke byubilo byabo byatama ne kutendeka kwingijila Lesa.

Juba jimo byo byo kyamwekanyikile mu muzhi wa Yeliko. Yesu wapichilengatu mu uno muzhi byo ayilenga ku Yelusalema. Kwajinga jibumba ja bantu, kabiji mu jino jibumba mwajinga muntu wa jizhina ja Zakyasa. Wakebelenga amba amone Yesu. Bino Zakyasa waipipile bingi, kechi wakonsheshe kumona Yesu ne, mambo kulutwe yanji kwajinga bantu bavula bingi. Wanyemejile kulutwe na kukanjila ku kichi kuba’mba eye amumone bulongo Yesu pa kupita.

Yesu byo afikile munshi ya kichi, watajile kwiulu ne kwamba’mba: ‘Ikilai bukiji, mambo lelo mbena kuya ku nzubo yenu.’ Bino Zakyasa wajinga munonshi waubanga bintu byatama bingi. Mambo ka Yesu o akebejilenga kuya ku nzubo ya muntu wa uno mutundu?—

Kechi kyajinga na mambo a bwikalo bwa uno muntu ne. Wayile ku nzubo ya kwa Zakyasa na kumufunjisha mambo a Lesa. Wamwene uno muntu byo ebikileko kukebatu amba amumone. Onkao mambo, Yesu wayukile’mba Zakyasa wakonsha kuteleka ku mambo awama. Kino kyo kyajinga kimye kya kwisamba nanji pa jishinda Lesa jo akeba’mba bantu bekelengamo.

Ki ka kyafuminemo?— Zakyasa watemenwe bingi byambo byamufunjishe Yesu. Waumvwine bingi kutama mambo wabepanga bantu, kabiji waambile amba usa kwibabwezhezha mali abo. Panyuma ya kuba bino waikele ke mwana wa bwanga wa kwa Yesu. Zakyasa byo aubile bino po po aikele ke mulunda na Yesu.—Luka 19:1-10.

Umvwe twamona kya kumwenako kya Mufunjishi Wayukisha, nanchi netuwa twakonsha kufwakesha bantu babula balunda netu nyi?— Ee. Bino kechi tuya ku mazubo abo mambo a kuba’mba twatemwa bwikalo bwabo ne. Kabiji kechi tukwatankena nabo pamo mu kuba bintu byatama ne. Twakonsha kwibafwakesha ne kwibabulako mambo a Lesa.

Pano bino twafwainwa kukayatu na balunda netu. Balunda netu bafwainwa kwikala bantu batemwa Lesa. Bamo kechi bamuyuka Yehoba ne. Pano bino umvwe bakeba kumuyuka, twafwainwa kwibakwasha. Kabiji umvwe nabo bamutemwa Yehoba byonka byo twamutemwa, po po bafwainwa kwikala balunda netu.

Kuji ne jishinda jikwabo jo twakonsha kuyukilako umvwe muntu wakonsha kwikala mulunda netu. Twafwainwa kuyuka bintu byuba yewo muntu. Nanchi uba bintu byatama ku bakwabo ne kutendeka kwibaseka nyi?— Kuba bino kyatama bingi, ke ibyo nenyi?— Nanchi kimye kyonse utanwa mu makatazho nyi? Atweba kechi twafwainwa kutanwanga nanji mu makatazho ne, ke ibyo nenyi?— Abya ubilamotu bintu kyanshiji mambo a kuba’mba kechi bamukwata nenyi? Nangwa kya kuba awo muntu kechi bakonsha kumukwata ne, Lesa umona byo oba, ke ibyo nenyi? Bantu boba bintu bya uno mutundu nanchi bafwainwa kwikala balunda netu nyi?—

Akitola Baibolo obe. Twaya tumone byo aamba pa byakonsha kuba balunda netu. Mona kinembelo kya 1 Kolinda kitango 15, kyepelo 33. Wamonapo nyi?— Patangiwa amba: ‘Kechi mujimbaikwe ne: Kwendañana na babi ko kuvulañanya bisela byawama.’ Kino kibena kumweshatu patoka amba umvwe twisampa bulunda na bantu baji na byubilo byatama, netuwa byo byo twakonsha kwikala. Kabiji balunda netu umvwe baji na byubilo byawama, netuwa tukekala na byubilo byawama.

Kimye kyonse twafwainwa kuvulukanga’mba muntu wanema mu bwikalo bwetu ke Yehoba. Kechi tukeba konauna bulunda bwetu ne aye ne, ke ibyo nenyi?— Onkao mambo twafwainwa kwisampatu bulunda na bantu batemwa Lesa.

Buneme bwa kwikala na balunda netu bawama bwaambiwapo pa Salamo 119:115; Byambo bya Mana 13:20; 2 Timoti 2:22; ne 1 Yoano 2:15.

[Kipikichala pa jipa 227]

Mambo ka Abalahama o aikejile “mulunda na Lesa”?

[Kipikichala pa jipa 228]

Mambo ka Yesu javula o aikelanga na kino kisemi umvwe waya ku Yelusalema? Abya wayuka mazhina a ba mu kino kisemi nyi?

[Kipikichala pa jipa 229]

Mambo ka Zakyasa kyo akanjijila ku kino kichi?

[Kipikichala pa jipa 230]

Mambo ka Yesu o ayijile kwi Zakyasa, kabiji Zakyasa waambile’mba ukoba ka?