LUFUNJISHO 4

Wasangajikile Muchima wa Bashanji ne wa Yehoba

Yefita ubena kulomba kwi Yehoba, nzhita ya bena Isalela saka ibena kulwa na balwanyi babo — Ñanyi mulaye Yefita ye alayile Yehoba?

Yefita ubena kubwela kufuma ku nkondo, wakumbachilamo mwananji wamukazhi wamutundaijile — Kechi kyamupelejile mwana wamukazhi wa kwa Yefita kuba byalayile bashanji ne, pano bino, walondejile mulaye wabo

Wamumona nsongwakazhi uji pa kipikichala nyi?— Uno ke mwana wamukazhi wa kwa Yefita. Baibolo kechi witubuula jizhina janji ne, bino twayuka kuba’mba wasangajikile muchima wa bashanji ne wa Yehoba. Twaya tufunde byavula pe aye ne bashanji abo ba Yefita.

Yefita wajinga muntu wawama kabiji pa myaka yavula wafunjishanga mwananji pe Yehoba. Wajinga muntu wa ngovu kabiji ntangi wawama. Onkao mambo, bena Isalela bamwambijile kwibatangijila pa kulwa na balwanyi babo.

Yefita walombele kwi Lesa kuba’mba amukwashe kushinda nkondo. Yefita walayile kuba’mba inge washinda, pa kubwela ku muzhi ukapana kwi Yehoba muntu mutanshi ukeya na kumutundaila kufuma mu nzubo yanji. Uno muntu ukekalanga ne kwingijila mu tente wa Lesa wa lusambakeno mu bwikalo bwanji bonse. Tente wa lusambakeno ke mpunzha bantu ko bayanga na kupopwela Lesa pa kyo kya kimye. Kya kine, Yefita washinjile nkondo. Abya wayuka muntu wajinga mutanshi kulupuka mu nzubo ya kwa Yefita byo abwelelenga ku nzubo nyi?—

Mwana wamukazhi wa kwa Yefita ubena kutolaula nsala ya ku nzubo ya Lesa; balunda nanji baiya na kumumpempula — Pa mwaka pa mwaka, balunda nanji mwana wamukazhi wa kwa Yefita bayanga na kumupempula

Ibyo, wajinga mwana wamukazhi wa kwa Yefita. Ye yenkatu mwana Yefita ye ajinga nanji, pano Yefita wafwainwe kumutuma kwalepa. Kino kyamulengejile kwikala bingi na bulanda. Pano bino, vuluka kuba’mba uno wajinga mulaye ye alayile kwi Yehoba. Ponkapotu mwananji wamwambijile’mba: ‘Tata, inge mwalayile kwi Yehoba, mwafwainwa kuba byonka byo mwalayile.’

Mwana wamukazhi wa kwa Yefita naye wajinga na bulanda. Mambo kwikala mu ntente wa lusambakeno kwavwangilemo kubula kusongolwa ne kubula kusema baana. Pano bino, wakebeshe bingi kulama mulaye wa bashanji ne kusangajika muchima wa Yehoba. Kuba bino kwanemene bingi kwi aye kukila kusongolwa nangwa kwikala na baana. Onkao mambo, wafumine pa nzubo ne kuya na kwikala mu tente wa lusambakeno moba onse a bwikalo bwanji.

Abya ubena kulanguluka kuba’mba byo aubile byasangajikile bashanji ne Yehoba nyi?— Ee, wibasangajikile. Inge ke ukokele Yehoba ne kumutemwa, wakonsha kwikala byonka byajinga mwana wamukazhi wa kwa Yefita. Ne obewa ukasangajika bansemi bobe ne Yehoba.

TANGA MU BAIBOLO