LUFUNJISHO 8
Kimye kya Malwa
“Mubena kusekela bingi, nangwa kya kuba mu kakimye kacheche mwaikala na bulanda na mambo a meseko apusana pusana o mubena kupitamo.”—1 Petelo 1:6
Mwakonsha kweseka papelela bulume bwenu kwikala balusekelo mu masongola ne mu kisemi kyenu. Bino bintu bisolomokatu byakonsha kwimulefula ne kwimupwishisha lusekelo. (Musapwishi 9:11) Yehoba witutemwa kabiji witukwasha mu bimye bya malwa. Anweba ne kisemi kyenu umvwe mwalondela ano mafunde a mu Binembelo, mukachinchika bintu bileta bijikila ne makatazho.
1 KETEKELAI MWI YEHOBA
BYAMBA BAIBOLO: “Saka mutaya bijikila byenu pe aye, mambo wimuta muchima.” (1 Petelo 5:7) Kabiji saka muvuluka’mba Lesa kechi ye ulengela’mba mupitenga mu meseko ne. (Yakoba 1:13) Umvwe mwafwenya kwi aye, ukemukwasha kabiji mashinda o akwashishamo awama bingi. (Isaya 41:10) “Mubuulai biji ku michima yenu.”—Salamo 62:8.
Byambo biji mu Baibolo bikemutekenesha umvwe saka mwi bitanga ne kwibifunda pa juba pa juba. Mukayuka’mba Yehoba “witutekenesha mu bya malwa byetu byonse.” (2 Kolinda 1:3, 4; Loma 15:4) Wimulaya kwimupa “mutende wa Lesa wakila milanguluko ya bantu.”—Filipai 4:6, 7, 13.
BYO MWAKONSHA KUBA:
Lombai Yehoba kwimukwasha kwikala batekanya ne kulanguluka bulongo
Pitulukai mu byonse byo mwalanguluka kuba, pakuba’mba musalululepo jishinda jawama
2 BYA KUBA ANWEBA BENE PAMO NA KISEMI KYENU
BYAMBA BAIBOLO: “Muchima wa muntu wa milangwe ufunda bintu byavula, kabiji kutwi kwa wa maana kukeba kuyukilapo bintu bikwabo.” (Byambo bya Mana 18:15) Yukai bishinka byonse. Muyuke bibena kusaka ba mu kisemi kyenu. Isambai nabo. Batelekai.—Byambo bya Mana 20:5.
Mwakonsha kuba byepi umvwe mulongo wenu wafwa? Umvwe muji na bulanda kechi mwifye ne. Vulukai’mba Yesu “wajijile ne mipolo.” (Yoano 11:35; Musapwishi 3:4) Kabiji kyawama bingi kukokoloka ne kulaala. (Musapwishi 4:6) Kino kikemukwasha kuchinchika malwa emufikila.
BYO MWAKOINSHA KUBA:
Saka mwisamba na ba mu kisemi kyenu pa malwa akonsha kwimufikila kwakubula kuketekela. Mambo umvwe malwa emufikila ba mu kisemi bakakasuluka kwisambapo
Mwakonsha kwisamba na bantu bamo bajinga mu malwa onka emufikilapo
3 TAMBULAI BUKWASHO
BYAMBA BAIBOLO: “Mulunda wa kine umwesha butemwe kimye kyonse, kabiji ye mulongo ye wakonsha kuketekela mu kimye kya bya malwa.” (Byambo bya Mana 17:17) Balunda nenu basaka kwimukwasha bingi. Pano bino kuba bayuka kyo musaka ne. Bakasulukilai ne kwibabula byo mubena kusaka. (Byambo bya Mana 12:25) Kabiji mwakonsha kwipuzhako bakwenu bemubulako mafunde a mu Baibolo o mwakonsha kwingijisha. Mafunde amo a mu Baibolo o bakonsha kwimubulako akonsha kwimukwasha.—Yakoba 5:14.
Mukatana bukwasho bo mukeba inge kimye kyonse kemupwanañane na bantu baji na lwitabilo mwi Lesa kabiji baketekela mu milaye yanji. Kutundaika bantu babena kukebewa bukwasho kukemutekenesha bingi. Isambainga nabo pa bintu byo mwaitabilamo mwi Yehoba ne mu milaye yanji. Twajijilai na kukwasha bantu bakajilwa, kabiji kange mwitolwele ku bantu bemutemwa kabiji bemuta muchima ne.—Byambo bya Mana 18:1; 1 Kolinda 15:58.
BYO MWAKONSHA KUBA:
Bulaiko mulunda nenu emukwashe
Mubulai kine kintu kyo musaka emubile