Byambo Byafumine Kwi Lesa

Twakonsha kwamba’mba Baibolo yense ke byambo byafuma kwi Lesa. Shetu wa mwiulu witupa uno buku pa kuba’mba tufundengamo. Akilangulukai pa byambo byanema byaambiwe kala kukila pa myaka 2,000. Bino byambo byaambile malaika wa jizhina ja Ngabaliela, ‘wimana kimye kyonse kwi Lesa.’ (Luka 1:19) Ñanyi bintu byamwekelenga kimye uno malaika kyo aambile bino byambo byanema?

Mwajinga mu mwaka wa 3 B.C.E. Ku ñanyi mpunzha Ngabaliela ko aambijile byambo bitanshi? Kwajinga ku mpunzha ya mitumba mu Yudea, kwipi na Yelusalema, kwaikalanga ñanga wa Yehoba wa jizhina ja Zekaliya. Zekaliya ne mukazhanji aye Elisabeta bakotele, bino kechi bajingapo na baana ne. Kyajinga kimye kya kwa Zekaliya kya kwingila mwingilo wa buñanga mu nzubo ya Lesa mu Yelusalema. Zekaliya byo ajinga mu nzubo ya Lesa, Ngabaliela wamwekele kwi aye saka aimana kwipi na kya kusokelapo bya kufutumuna.

Kyamweka Zekaliya waakaminwe bingi. Bino malaika wamwambijile’mba: “Kwakamwa ne, Zekaliya, mambo Lesa waumvwa misashijilo yobe, ne mukazhobe Elisabeta ukasema mwana wa mulume, kabiji ukamutumbe’mba Yoano.” Ngabaliela wanungilepo kuba’mba Yoano “ukanema bingi kwi Yehoba” kabiji ukakwasha bantu “pa kuba’mba bakekale bantu bafwainwa ba kwa Yehoba.”—Luka 1:13-17.

Pano bino, Zekaliya kechi waswile ne. Mambo ka? Mambo aye ne Elisabeta bakotele. Onkao mambo, Ngabaliela wamubuujile’mba: ‘Ukekala kamaama poso bino bintu byonse bikafike, mambo kechi waketekela byambo byami ne.’—Luka 1:20.

Kimye kyamwekelenga bino bintu, bantu bajinga pangye bakuminye bingi mambo Zekaliya wabanjile bingi mu nzubo ya Lesa. Byo papichile kimye walupukile, bino kechi waambilenga ne. Zekaliya waingijishengatu maboko pa kwisamba na bantu. Kyamwekeletu patoka’mba byo ajinga mu nzubo ya Lesa wamwene kimonwamonwa.

Zekaliya byo apwishishe mwingilo wanji mu nzubo ya Lesa, wabwelele ku nzubo yanji. Pa kupitapo moba, Elisabeta waimichile. Kabiji pa bañondo batanu kechi watanwanga ku bantu ne.

Byo papichile moba, Ngabaliela wamwekele jibiji. Wamwekele kwi ñanyi? Wamwekele kwi kamwale wa jizhina ja Maliya, waikalanga mu muzhi wa Nazala, ku kabeta ka buyeke bwa Yelusalema mu kibunji kya Ngalilea. Malaika wamubuujile ñanyi byambo? Malaika waambile’mba: “Waubilwa bibusa kwi Lesa.” Ngabaliela watwajijile kwamba’mba: “Umvwa! ukemita ne kusema mwana wa mulume kabiji ukamutumbe’mba Yesu.” Kabiji Ngabaliela wanungilepo amba: “Uno ukanema bingi kabiji ukatelwa’mba Mwana wa Mwine Wakila, . . . kabiji ukekala Mfumu pa nzubo ya kwa Yakoba myaka ne myaka, ne Bufumu bwanji kechi bukapwa ne.”—Luka 1:30-33.

Kyamweka Ngabaliela watemenwe bingi pa kubulañana bino byambo. Kabiji byo tusakutanganga byavula pe Yoano ne Yesu, tusakuyuka bulongo ene mambo bino byambo byafumine mwiulu o byanemena.