Yesu Waubile Bya Kukumya Bikwabo Mu Kapenama

Pa juba ja Sabado, Yesu saka aita kala baana banji ba bwanga bana, ba Petelo, Andeleo, Yakoba ne Yoano, kwikala ba kukwata bantu, bonse batwelele mu nshinagoga yajinga mu Kapenama. Yesu watatwile kufunjisha bantu mu nshinagoga, kabiji bantu bakuminye bingi jishinda jo afunjishishengamo. Mambo wafunjishenga na luusa, kupusanako na banembeshi.

Pa jino juba ja Sabado, mu nshinagoga mwajinga ne muntu wajinga na ndemona. Uno muntu wabijikile na jiwi jikatampe amba: “Nanchi mubena kukeba ka kwi atweba, anweba Yesu mwina Nazala? Nanchi mwaiya na kwitonauna nyi? Nemuyukishatu bulongo namba mwi Wazhila wa Lesa!” Yesu wamukajipijile uno ndemona wamanyikile uno muntu amba: “Zhindamapo, lupukamo mwi aye!”—Mako 1:24, 25.

Ponkapo uno ndemona wavulañenye uno muntu kabiji wamutayile panshi ne kubijika na jiwi jikatampe. Bino ndemona walupukilemo mu uno muntu “kwa kubula kumukozha.” (Luka 4:35) Bantu bajinga mu nshinagoga bakuminye bingi ne kwiipuzha bene na bene amba: “Nga kino kyo ki ka? . . . Mambo ukambizha ne mipashi yatama, ne ayo imukookela.” (Mako 1:27) Ponkapo nkuwa ya kino kyo aubile yakumbene monse mu Ngalilea.

Byo balupukile mu nshinagoga, Yesu ne baana banji ba bwanga bayile ku nzubo ya kwa Shimona nangwa’mba Petelo. Bako ba kwa Petelo ba bakazhi bakolelwe bingi kikola kya mashika. Bamusashijile Yesu amba ebakwashe. Onkao mambo, Yesu wayile kwi abo, wibakwachile pa kuboko ne kwibabusha. Ponkapotu babukilwe kabiji batatwile kwingijila Yesu ne baana banji ba bwanga bo ajinga nabo, kampe kwibanengezhezha kajo.

Byo kyafikile ke mabanga, bantu kufuma mu mapunzha onse baletele bakolelwe ku nzubo ya kwa Petelo. Mu kimyetu kicheche, kyamwekeletu nobe bantu bonse mu muzhi bakonkene konka ku kibelo. Mambo ka? Bakebelenga kwibabuka bikola byabo. “Aba bonse bajinga na bakolelwe bikola byapusana pusana, bebaletelenga kwi aye. Byo ebatentekelenga maboko anji, wibabukilenga pa muntu pa muntu.” (Luka 4:40) Yesu wabukile bantu babo bonse bakolelwe bikola byapusana pusana byonkatu byo kyaambijilwe jimo. (Isaya 53:4) Kabiji wapangilemo bandemona mu bantu. Bandemona bo apangile mu bantu balupukilemo saka babijika’mba: “Anweba mwi Mwana Lesa.” (Luka 4:41) Bino Yesu wibakajipile ne kwibakanya kwamba. Bandemona bayukile kuba’mba Yesu ye Kilishitu, kabiji kechi wakebelenga’mba baambenga nobe bengijila Lesa wa kine ne.