Yoano Wakebelenga Kumvwa Ku Mwine Yesu

Yoano Mubatizhi saka apwishamo kala mwaka umo mu kaleya, watambwijile sawakya wa mingilo ya kukumya yaubilenga Yesu. Fwanyikizhai byo aumvwine kimye baana banji ba bwanga kyo bamubuujile’mba Yesu wasangula mwana wamulume wa mwanamukazhi wafwijilwe mu muzhi wa Naina. Pano bino, Yoano wakebeshe kumvwa ku mwine Yesu mwatajile bino bintu. Onkao mambo, Yoano watumineko baana banji ba bwanga babiji kwi Yesu. Wibatumine na kuba ka? Wibatumine’mba bakashikishe Yesu amba: “Nanchi yenu twatengejilenga nyi, inyi kukeya muntu ungi?”—Luka 7:19.

Nanchi buno bwipuzho bumwesha’mba Yoano wazhinaukilenga nyi? Ine. Yoano waingijilanga Lesa na muchima yense, kabiji kimye kyo abatizhenga Yesu saka papita kala myaka ibiji, wamwene mupashi wa Lesa saka ekila pe Yesu kabiji waumvwine ne jiwi ja Lesa ja kumwesha’mba waitabilwa kwi Lesa. Onkao mambo, kechi twafwainwa kulanguluka’mba lwitabilo lwa kwa Yoano lwakookele ne. Umvwe kya kuba Yoano kechi wajinga na lwitabilo lwakosa ne, Yesu inge kechi waambilepo pe aye pa kyokya kimye ne. Pano inge kya kuba’mba Yoano kechi wazhinaukilenga ne, mambo ka o ashikishishe buno bwipuzho?

Kampe Yoano wakebelenga Yesu kumulumbulwila’mba ye Mesiasa. Kino kyamukoseshe bingi Yoano byo ajinga mu kaleya. Bino kyamweka kuji bintu byavula byalengejile Yoano kushikisha buno bwipuzho. Wayukile bungauzhi bwa mu Baibolo bumwesha’mba Mushingwa wa Lesa ye ukekala mfumu kabiji mupokolweshi. Nangwa byonkabyo, Yoano wakijinga mu kaleya pa bañondo bavula kufuma Yesu po abatizhiwe. Onkao mambo, Yoano wakebelenga kuyuka umvwe kwajinga muntu mukwabo ukeya kuswana pe Yesu, ukafikizha bintu byonse byaambijilwe jimo amba Mesiasa ye ukebyuba.

Yesu kechi wafikenejiletu wakumbula baana ba bwanga ba kwa Yoano amba, ‘Ee ye amiwa ye baambilepo kala amba Ukeya’ ne. Bino kupichila mu kubuka bantu bavula bingi bajinga na bikola byapusana pusana, Yesu wamwesheshe’mba bamutumine kwi Lesa. Kepo abuujile baana ba bwanga ba kwa Yoano amba: “Bwelai mukamubuule Yoano bintu byonse byo mwaumvwa ne kumona: Bampofu babena kumona, balemana babena kwenda, ba mbumba nabo babena kubukwa, bashinka matwi babena kumvwa, bafu nabo babena kusangulwa, kabiji bayanji nabo babena kusapwilwa mambo awama.”—Mateo 11:4, 5.

Bwipuzho bwaipwizhe Yoano bumwesha’mba Yoano wafwainwa waketekejilenga Yesu kuba bintu byakila pa bino byo aubilenga, apo kampe ne kufumya Yoano mu kaleya. Bino, Yesu wabuujile Yoano amba kange aketekelenga kumona bya kukumya byakila pa bino byaubilenga Yesu ne.

Baana ba bwanga ba kwa Yoano byo bayile, Yesu wabuujile jibumba amba Yoano wakila bangauzhi. Wibabuujile’mba Yoano ye “muluwe” wa Yehoba walayilwe pa Malakai 3:1, kabiji ye ngauzhi Elaija waambiwe pa Malakai 4:5, 6. Yesu walumbulwile’mba: “Kine nemwambila namba, pa bonse basemwa ku banabakazhi, kafwako nangwa umo wakila Yoano Mubatizhi ne, bino awa mucheche mu Bufumu bwa mwiulu ye wamukila.”—Mateo 11:11.

Byaambile Yesu amba awa mucheche mu Bufumu bwa mwiulu ye wakila Yoano byamwesheshe’mba Yoano kechi ukekala mu Bufumu bwa mwiulu ne. Yoano wanengezhezhe Yesu jishinda, bino aye wafwile Kilishitu saka akyangye kushinkula jishinda ja kuya mwiulu. (Bahebelu 10:19, 20) Nangwa byonkabyo, Yoano wajinga ngauzhi wa Lesa wa kishinka kabiji ukekala ngikazhi mu Bufumu bwa Lesa pano pa ntanda.