Yesu Wajishishe Biumbi Bya Bantu Na Bashinkwa Batanu Ne Masabi Abiji

Batumwa 12 basangalele bingi pa lwendo lwabo lwa kusapwila mu Ngalilea monse. Kabiji babwelele kwi Yesu ne kumubuula “bintu byonse byo baubile ne byo bafunjishe.” Bakookele bingi, pano bino, kechi bajingapo ne na kimye kya kuja ne, mambo kwajinga bantu bavula bingi baishilenga ne kuya. Onkao mambo, Yesu wibambijile’mba: “Twayai ku mpunzha kwa bunke bwetu tukakokolokeko pacheche.”—Mako 6:30, 31.

Byo bakanjijile mu bwato, kampe kwipi na Kapenama bayile kwa bunke ku musela wa Mukola wa Yodano kusha Beteseda. Nangwa byonkabyo, bantu bavula bebamwene byo bayilenga kabiji bavula bayukile kino. Bano bonse bapichile lubilo ku musezho kabiji bwato byo bwafikile bataaine bantu bafika kala.

Yesu byo afumine mu bwato, wamwene jibumba jikatampe kabiji wijubijile lusa mambo bantu bajinga nobe mikooko yabula kafunga. Onkao mambo, “watendekele kwibafunjisha bintu byavula” pa Bufumu. (Mako 6:34) Kabiji wabukile “bonse bakebelenga kubukwa.” (Luka 9:11) Kimye byo kyapwile, baana ba bwanga baishile kwi aye ne kumwambila’mba: “Kuno ku mpunzha ko tuji kwalepa kabiji bwaila kala; ambilai mabumba abwele, kuba’mba baye mu mizhi na kwipotela kajo.”—Mateo 14:15.

Yesu wibakumbwile’mba: “Kechi bafwainwa kuya ne; bapai kajo.” (Mateo 14:16) Nangwa kya kuba Yesu wayukijile jimo kintu kyo akebelenga kuba, bino waesekele Filipa kupichila mu kumushikisha’mba: “Kwepi ko tusakupota bashinkwa ba kujiisha bano bantu?” Waipwizhe Filipa mambo ye wafumine mu muzhi wa Beteseda wajinga pepi. Nangwa byonkabyo, kupota bashinkwa inge kechi kwibakwashishe ne. Mambo pajinga banabalume 5,000 kabiji kampe bantu bakijile pa 10,000 kubajilako banabakazhi ne baana. Onkao mambo, Filipa wamukumbwile’mba: “Bashinkwa bafwainwa kupotwa mandenali 200, [ndenali umo wajinga mfweto yaingijilanga muntu pa juba jimo] bantu kechi bakonsha kwibakumbana ne, nangwatu kya kuba baabana kachekache.”—Yoano 6:5-7.

Kampe na mambo a kulanguluka’mba kyakatezhe bingi kujisha bantu bonse, Andeleo waambile’mba: “Paji uno kalombwana uji na bashinkwa batanu ba mbale ne tumasabi tubiji. Nanchi bino byakonsha kukumbana bano bonse nyi?”—Yoano 6:9.

Byo kyajinga kimye kya mwela wa mebele mu 32 C.E., Kijiilo kya Lupitailo saka kikyangye kufika, nsono ya munyemvu yavujile bingi. Onkao mambo, Yesu wabuujile baana banji ba bwanga kwikajika bantu pa nsono mu bilumbiji bya bantu 50 ne 100. Washikwile bashinkwa batanu ne masabi abiji, kabiji watajile mwiulu ne kulomba. Kepo aabenye masabi ne kutebaula bashinkwa. Yesu wapele baana banji ba bwanga ne abo baabenye bantu. Bantu bonse bajiile ne kwikuta.

Panyuma ya kino, Yesu waambijile baana banji ba bwanga amba: “Tolaulai bibese byashalapo pa kuba’mba pabule konaika nangwa kamo.” (Yoano 6:12) Byo batolawile, bayuzhizhe bitumbe 12 na bibese byo bashilepo.