Nanchi Nafwainwa Kwipana Kwi Lesa Ne Kubatizhiwa Nyi?

1. Byo kiji kuba’mba mwafunda byavula bingi mu uno buku, ñanyi bwipuzho bo mwafwainwa kwiipuzha?

MWAFUNDA bukine bwa mu Baibolo bwavula bingi mu uno buku. Mwafunda pa bumi bwa myaka ne myaka bwalaya Lesa, pa biji bafwa, ne pa luketekelo lwa lusanguko ne bikwabotu. (Musapwishi 9:5; Luka 23:43; Yoano 5:28, 29; Lumwekesho 21:3, 4) Mwafwainwa mwatendeka ne kupwila pamo na Bakamonyi ba kwa Yehoba, kabiji mwashiinwa kuba’mba bo bapopweshi bakine. (Yoano 13:35) Bulunda bwenu ne Yehoba bubena kukoma, kabiji mwafwainwa mwafuukulapo ne kutendeka kumwingijila. Onkao mambo, mwafwainwa kwiipuzha’mba: ‘Nafwainwa kuba byepi pa kuba’mba ntendeke kwingijila Lesa?’

2. Mambo ka mwanamulume mwina Etiopya o akebejilenga kubatizhiwa?

² Bino byo byalangulukilenga ne mwanamulume mwina Etiopya wajingako mu moba ajinga Yesu pano pa ntanda. Mwananji wa bwanga aye Filipa wasapwijile uno mwanamulume, Yesu saka bamusangula kala. Filipa walengejile uno mwanamulume kushiinwa kuba’mba Yesu ye Mesiasa. Uno mwanamulume mwina Etiopya byo afunjile byamufikile bingi pa muchima kya kuba ponkapotu waambile’mba: “Talai! Mema ao; ñanyi kintu kisakunkanya kubatizhiwa?”—Byubilo 8:26-36.

3. (a) Yesu wakambizhe baana banji ba bwanga amba ka? (b) Mwina Kilishitu wafwainwa kubatizhiwa byepi?

³ Baibolo waamba’mba inge mukeba kwingijila Yehoba mwafwainwa kubatizhiwa. Yesu waambijile baana banji ba bwanga amba: “Yainga na kufunjisha bantu ba mu bisaka byonse bya bantu kwikala ke baana bami ba bwanga, ne kwibabatizha.” (Mateo 28:19) Yesu witushijile mwa kulondela mambo ne aye mwine wa batizhiwe. Yesu bamwibizhe mu mema, kechi bamusanshiletu mema pa mutwe ne. (Mateo 3:16) Ne lelo jino, bena Kilishitu pa kubatizhiwa, bebebizha mu mema.

4. Kubatizhiwa kumwesha ka ku bantu?

⁴ Kubatizhiwa kumwesha ku bantu amba mukeba kwimwingijila Lesa ne kwikala mulunda nanji. (Salamo 40:7, 8) Onkao mambo mwafwainwa kwishikisha’mba: ‘Nafwainwa kuba byepi pa kuba’mba mbatizhiwe?’

KUYUKA NE LWITABILO

5. (a) Mwafwainwa kuba byepi saka mukyangye kubatizhiwa? (b) Mambo ka kupwila kwa bwina Kilishitu o kwanemena?

⁵ Saka mukyangye kubatizhiwa mwafwainwa kuyuka Yehoba ne Yesu. Mwatendeka kala kwibayuka byo mubena kufunda Baibolo. (Tangai Yoano 17:3.) Kechi mwafwainwa kufundangatu Baibolo ne. Baibolo waamba’mba mwafwainwa ‘kuyukisha bulongo’ kyaswa muchima wa Yehoba. (Kolose 1:9) Kupwila kwa Bakamonyi ba kwa Yehoba kukemukwasha kufwenya kwipi ne Yehoba. O ene mambo o mwafwainwa kupwilanga nabo kimye kyonse.—Bahebelu 10:24, 25.

6. Mwafwainwa kuyuka Baibolo kufika pepi pa kuba’mba mubatizwe?

⁶ Yehoba kechi ukeba’mba kanatu mwayuka byonse biji mu Baibolo bino pa mwabatizhiwa ne. Lesa kechi wamukainye mwanamulume mwina Etiopya wakebele kubatizhiwa saka ayukakotu bicheche ne. (Byubilo 8:30, 31) Tukatwajijila kufunda pe Lesa myaka ne myaka. (Musapwishi 3:11) Bino pa kuba’mba mubatizhiwe, mwafwainwa kuyuka mafunjisho a mu Baibolo atanshi aamba pe Lesa.—Bahebelu 5:12.

7. Kufunda Baibolo kwimukwasha byepi?

⁷ Baibolo waamba’mba: “Kwa kubula lwitabilo kechi kyakonsheka kutokesha Lesa ku muchima ne.” (Bahebelu 11:6) Onkao mambo mwafwainwa kwikala na lwitabilo saka mukyangye kubatizhiwa. Baibolo witubula’mba bantu ba mu muzhi wa Kolinda byo baumvwine byasapwijilenga baana ba bwanga ba kwa Yesu, “baitabijile ne kubatizhiwa.” (Byubilo 18:8) Ne anweba kufunda Baibolo kwimulengela kwikala na lwitabilo mu milaye ya Lesa ne kushiinwa kuba’mba kitapisho kya kwa Yesu kyakonsha kwitukuula ku bundengamambo ne lufu.—Yoshua 23:14; Byubilo 4:12; 2 Timoti 3:16, 17.

BULAINGAKO BANTU BUKINE BWA MU BAIBOLO

8. Ki ka kikemulengelanga kubulako bakwenu byo mubena kufunda?

⁸ Lwitabilo lwenu lukakosa bingi, inge mwatwajijila kufunda Baibolo ne kwimwena byo ibena kwimukwasha mu bwikalo. Kino kikemulengelanga kubulangako bakwenu byo mubena kufunda. (Yelemiya 20:9; 2 Kolinda 4:13) Bañanyi bo mwafwainwa kubulangako?

9, 10. (a) Bañanyi bo mwakonsha kutendekelapo kubulako byo mu bena kufunda? (b) Mwafwainwa kuba byepi umvwe mukeba kusapwilanga pamo na kipwilo?

⁹ Mwakonsha kubulako byo mubena kufunda balongo benu, balunda nenu ne bomwikala nabo kinkalankulo nangwa bomwingila nabo pamo. Kuba bino kwawama bingi, pano bino mwafwainwa kuba bino na kifyele. Mukuya kwa moba, mukatendeka kusapwila pamo na kipwilo. Inge mwamona’mba mwakonsha kusapwila, mwafwainwa kubula Kamonyi wimufunjisha Baibolo kuba’mba mubena kukeba kutendeka kusapwila pamo na kipwilo. Inge wimufunjisha wamona’mba mwafikilamo kabiji mubena kulondela mafunde a mu Baibolo mu bwikalo bwenu, anweba ne wimufunjisha popo mukasambakana na bakulumpe mu kipwilo babiji.

¹⁰ Kuno kusambakana kwikala byepi? Bakulumpe bakesamba nenu ne kumona inge mwaitabila ne kumvwisha mafunjisho atanshi a mu Baibolo. Kabiji bakamona inge mukokela byaamba Baibolo mu bwikalo bwenu, ne kumona inge kya kine mukeba kwikala Kamonyi wa kwa Yehoba. Mwafwainwa kuyuka kuba’mba bakulumpe mu kipwilo baji na mwingilo wa kulama baji mu kipwilo, kubikapotu ne anweba. Onkao mambo, kechi mwafwainwa kuchiina kwisamba nabo ne. (Byubilo 20:28; 1 Petelo 5:2, 3) Pa kupwisha kwisamba, bakulumpe mu kipwilo bakemubula inge mwafikilamo kusapwila pamo na kipwilo nangwa ne.

11. Mambo ka o mwafwainwa kuleka byubilo byatama saka mukyangye kutendeka kusapwila pamo na kipwilo?

¹¹ Bakulumpe mu kipwilo bakonsha kwimubula kuba’mba mwafwainwa kuleka byubilo bimo pa kuba’mba mukatendeke kusapwila pamo na kipwilo. Mambo ka o mwafwainwa kubila byo bemubula? Mambo byo twisamba na bantu pe Lesa twimenako Yehoba. Onkao mambo, twafwainwa kwikalanga bwikalo bunemeka Lesa.—1 Kolinda 6:9, 10; Ngalatiya 5:19-21.

LAPILAI NE KWALULUKA

12. Mambo ka bantu bonsetu o bafwainwa kulapila?

¹² Kuji kintu kikwabo kyo mwafwainwa kuba saka mukyangye kubatizhiwa. Mutumwa Petelo waambile’mba: “Lapilai, ne kwaluluka pa kuba’mba mambo enu beazhimañanye.” (Byubilo 3:19) Kulapila kulumbulula ka? Kulumbulula kumvwa bibi ku muchima pa kintu kyo wauba ne kuja nyenye. Twambe kuba’mba mwaubanga bulalelale, mwafwainwa kwikileka ne kulapila. Nangwa kya kuba mu bwikalo bwenu mwibikako kuba byawama, mwafwainwa kulapila, mambo atweba bonse tulenga mambo kabiji tulomba Lesa kwitulekelako mambo.—Loma 3:23; 5:1.

13. “Kwaluluka” kulumbulula ka?

¹³ Nanchi mwafwainwatu kumvwa ku muchima kutama pa kyo mwauba nyi? Ine. Petelo waambile ne kuba’mba twafwainwa “kwaluluka.” Kino kibena kulumbulula kuba’mba twafwainwa kuleka byubilo byatama ne kwikala na byubilo byawama. Fwanyikizhai kuba’mba kuji ko mu bena kuya. Pa kupitapo kimye, mwamona kuba’mba mu bena kuya mu jishinda jingi. Mwafwainwa kuba byepi? Kwa kubula nangwa kuzhinaukatu ne, musakwaluluka ne kuya mu jishinda jaya ko mu bena kuya. Kyo kimotu, inge mwatendeka kufunda Baibolo mwakonsha kumona’mba kuji byubilo bimo nangwa bintu bimo byo muba byo mwafwainwa kuleka. Kukankazhama “kwaluluka” ne. Bilekai ne kutendeka kuba byawama.

IPANAI KWI LESA

14. Mwakonsha kwipana byepi kwi Lesa?

¹⁴ Kintu kikwabo kyanema kyo mwafwainwa kuba saka mukyangye kubatizhiwa ke kwipana anweba bene kwi Yehoba. Pa kwipana kwi Yehoba mu mulaya mu lulombelo kuba’mba mwipana kumwingijilatu aye yenka kwapwa, kabiji kuba kyaswa muchima wanji kyo kintu kyakilamo kunema mu bwikalo bwenu.—Mpitulukilo ya mu Mizhilo 6:15.

15, 16. Ki ka kilengela muntu kwipana kwi Lesa?

¹⁵ Kulaya kwingijila Yehoba kuji nobe mu bena kulaya muntu ye mwatemwa kwikala nanji mu bumi bwenu bonse. Inge mwanamulume ne mwanamukazhi betemwa. Mwanamulume byo atendeka kuyuka bulongo mwanamukazhi, umutemwa bingi ne kukeba kumusongola. Nangwa kya kuba kufuukulapo kuba bino kechi kwapela ne, mwanamulume wipana kusongola uno mwanamukazhi mambo wamutemwa.

¹⁶ Byo musakutwajijila kufunda pe Yehoba, mukamutemwa bingi kabiji mukakebeshanga bingi kumwingijila. Kino kikemulengela kulomba lulombelo lwa kumulaya kumwingijila mu bumi bwenu. Baibolo waamba’mba yense ukeba kulondela Yesu wafwainwa ‘kwikana mwine.’ (Mako 8:34) Kino kilumbulula ka? Kilumbulula kuba’mba kukokela Yehoba kyo kintu kitanshi mu bwikalo bwenu. Bikeba Yehoba byafwainwa kunema kukila byo mukeba anweba bene.—Tangai 1 Petelo 4:2.

KUCHIINA NE

17. Mambo ka bamo o bachiina kwipana kwi Yehoba?

¹⁷ Bamo bakankazhama kwipana kwi Yehoba mambo bachiina’mba kechi bakakonsha kumwingijilanga kwesakana na byo bamulayile ne. Kechi bakeba kufichisha Yehoba kumuchima ne. Kimo kimye bakonsha kulanguluka’mba inge babula kwipana kumwingijila, Yehoba kechi ukebatotolwesha pa byo boba ne.

18. Ki ka kyakonsha kwimulengela kubula kuchiina kwipana kwi Yehoba?

¹⁸ Kutemwa Yehoba kukemulengela kubula kuchiina kwipana kwi aye amba kwendapo mwalenga mambo ne kumufichisha ku muchima. Mukebikangako papelela bulume bwenu kuba byo mwamulayile mambo mwamutemwa. (Musapwishi 5:4; Kolose 1:10) Kabiji kumutemwa kukemulengela kubula kulanguluka’mba kuba kyaswa muchima wanji kwakatazha. Mutumwa Yoano wanembele’mba: “Kutemwa Lesa kulumbulula’mba tulondelenga mikambizho yanji; kabiji mikambizho yanji kechi yakatazha ne.”—1 Yoano 5:3.

19. Mambo ka o mwafwainwa kubujila kuchiina kwipana kwi Yehoba?

¹⁹ Kechi mwafwainwa kwikala balumbuluka pa kuba’mba mwipane kwi Yehoba ne. Yehoba kechi wimukebela kuba byavula byo mwakonsha kukankalwa kuba ne. (Salamo 103:14) Ukemukwashanga kuba byawama. (Isaya 41:10) Ketekelai mwi Yehoba na muchima wenu yense, ‘ne aye ukemolwela mashinda enu.’—Byambo bya Maana 3:5, 6.

KUSOLOLA LWITABILO PATOKA NE KUMONA LUPULUKILO

20. Ñanyi kintu kikwabo kyo mwafwainwa kuba inge mwipana kwi Lesa?

²⁰ Nanchi mwafikilamo kwipana kwi Yehoba nyi? Inge mwipana kwi Yehoba, ko kuba’mba mwinengezha kubatizhiwa.

21, 22. Mwakonsha ‘kusolola byepi patoka’ lwitabilo lwenu?

²¹ Bulai ukwatankanya mingilo ya jibumba ja bakulumpe mu kipwilo kuba’mba mwipana kwi Yehoba kabiji mu bena kukeba kubatizhiwa. Ukabula bakulumpe mu kipwilo bakapituluka nenu mu mafunjisho atanshi a mu Baibolo. Inge bamona kuba’mba mwafikilamo, bakemubula kuba’mba mukabatizhiwa pa kubuñana nangwa pa kushonkena kwa Bakamonyi ba kwa Yehoba. Pa kuno kupwila kukekala jashi jikaamba pa lubatizhilo byo lulumbulula. Ñambi wa jino jashi ukepuzha babena kuya na kubatizhiwa mepuzho abiji. Inge mwakumbula ano mepuzho, popo ‘mukasolola lwitabilo lwenu patoka.’—Loma 10:10.

²² Kepo mukaya na kubatizhiwa. Bakemwibizha mu mema. Lubatizhilo lukamwesha bantu bonse kuba’mba mwipana kwi Yehoba kabiji ke mwi Bakamonyi ba kwa Yehoba.

LUBATIZHILO BYO LULUMBULULA

23. Kubatizhiwa “mu jizhina ja Tata ne ja Mwana ne ja mupashi wazhila” kulumbulula ka?

²³ Yesu waambile’mba baana banji ba bwanga bakabatizhiwanga “mu jizhina ja Tata ne ja Mwana ne ja mupashi wazhila.” (Tangai Mateo 28:19.) Kino kilumbulula ka? Kilumbulula kuyuka luusa luji ne Yehoba ne mwingilo wa kwa Yesu wa kuba kyaswa muchima wa Lesa. Kabiji kilumbulula’mba mwayuka kuba’mba Lesa wingijisha mupashi wazhila pa kuba kyaswa muchima wanji.—Salamo 83:18; Mateo 28:18; Ngalatiya 5:22, 23; 2 Petelo 1:21.

24, 25. (a) Lubatizhilo lulumbulula ka? (b) Tukesamba pa ka mu kitango kyapelako?

²⁴ Lubatizhilo lwimenako kintu kyanema bingi. Kwimwibizha mu mema kulumbulula’mba mwafwa nangwa’mba mwaleka byubilo byatama byo mwaubanga kala. Inge bemutumpula mu mema, ko kuba’mba mwatendeka bwikalo bupya bwa kuba kyaswa muchima wa Lesa. Kumwesha kuba’mba kufumatu pa jojo juba mukengijilanga Yehoba. Vulukainga kuba’mba kechi mwipana ku muntu nangwa ku jibumba nangwa ku mwingilo ne. Mwipana kwi Yehoba.

²⁵ Kwipana kukemukwasha kwikala na bulunda bwakosa ne Lesa. (Salamo 25:14) Inge mwabatizhiwa kechi kilumbulula’mba kyapwa mukapuluka ne. Mutumwa Paulo wanembele’mba: “Ikalainga na moyo ne kuzakama byo mubena kwibikishako kuba’mba Lesa akemupulushe.” (Filipai 2:12) Lubatizhilo ke ntendekelotu ya kwingijila Lesa. Pano mwakonsha kufwenya byepi kwipi ne Yehoba? Kitango kyapelako mu uno buku kyakumbula buno bwipuzho.