KIPUNGU 1
“Nkakeba Yaeleka”
Mukooko walubilamo. Kyamweka byo ajiilenga munyemvu, wafumine pa mikooko ikwabo. Wakankalwa kumona kuji mikooko ikwabo ne kafunga. Kabiji pafiita kala. Washala bunke mungye muji bijanyi, kafwako wakuzhikijila mukooko ne. Mu kakimyetu kacheche, waumvwa jiwi jo ayuka, ko kuba’mba ja kwa kafunga, uno kafunga waya lubilo kuji mukooko, wamushikula, wamupombakanya mu kivwalo kyanji kya peulu ne kumusenda ku nzubo.
YEHOBA wiesakanya mwine ku kafunga. Waamba mu Byambo byanji amba: “Amiwa mwine nkeikeba mikooko yami ne kwiilama bulongo.”—Ezikyo 34:11, 12.
“Mikooko yo Nata Muchima”
Mikooko ya Yehoba yo i ka? Mikooko ya Yehoba ke bantu bamutemwa ne kumwingijila. Baibolo waamba’mba: “Iyai, tumufukamine ne kumupopwela; twayai tufukame ku meso a Yehoba Mulenga wetu. Mambo aye ye Lesa wetu, ne atweba twi bantu banji bo ajiisha, mikooko yo alama.” (Salamo 95:6, 7) Byonkatu mikooko byo ilondela kafunga, bapopweshi ba Yehoba bomvwina Kafunga wabo. Nanchi makatazho bafwao nyi? Ine. Bakalume ba Lesa kimye kimo bekala nobe ‘mikooko yapalañenamo,’ “mikooko yaeleka,” kabiji nobe “mikooko yaya mungi.” (Ezikyo 34:12; Mateo 15:24; 1 Petelo 2:25) Nangwa byonkabyo, inge muntu wafuma mu jibumba ja Lesa, Yehoba uketekela’mba ukabwela.
Nanchi mukilanguluka’mba Yehoba ukiji Kafunga wenu nyi? Ñanyi bintu bimwesha’mba Yehoba Kafunga lelo jino? Monai mashinda asatu:
Witujiisha ku mupashi. Yehoba waamba’mba, “Nkeijiishisha konka kuji nsono ya munyemvu. Ikalaalanga ku mpunzha konka kuji nsono yawama kabiji ikajanga munyemvu.” (Ezikyo 34:14) Yehoba kechi wakikankalwapo kwitupa kajo ka ku mupashi ka pa kimye kyafwainwa ne. Nanchi mwakonsha kuvulukapo mutwe umo, jashi nangwa vidyo wakumbwile milombelo yenu nyi? Nanchi kino kechi kimulengela kuswa kuba’mba Yehoba wimuta muchima nenyi?
Wituzhikijila ne kwitukwasha. Yehoba walaya’mba: “Nkabwezha yalubilamo, ikozha nkeipomba bisapi pa bilonda ne yoya yakooka nkeikosesha.” (Ezikyo 34:16) Yehoba ukosesha bakooka nangwa baji na bijikila. Upomba bisapi pa bilonda bya mikooko yanji, wiikwasha kukosa nangwa kya kuba beikozha ku bakwabo bena Kilishitu. Kabiji ubwezha yoya yalubilamo ne yoya imwena bintu mu jishinda jingi.
Wituta bingi muchima. Yehoba waamba’mba, “Nkeibwezha kufuma mu mapunzha onse mo yapalañenejile, nkakeba yaeleka.” (Ezikyo 34:12, 16) Yehoba umona mukooko waeleka amba wakonsha kubwela. Uyuka inge mukooko waeleka kabiji umukeba, inge wamutaana usekela bingi. (Mateo 18:12-14) Aye utongola bapopweshi banji amba “mikooko yami yo nata muchima.” (Ezikyo 34:31) Ne anweba muji pa ino mikooko.
Yehoba umona mukooko waeleka amba wakonsha kubwela. Usekela bingi inge wataana mukooko wanji
“Bwezhai Moba etu Byonka byo Ajinga Kala”
Mambo ka Yehoba o abena kwimukebela ne kwimwita’mba mubwele kwi aye? Ubena kukeba’mba mwikale na lusekelo. Walaya’mba, “Mapesho aketulukanga nobe mvula” pa mikooko yanji. (Ezikyo 34:26) Uno mulaye kechi wa bubela ne. Mwimwena anweba bene bishinka.
Akilangulukai byamwekele kimye kyo mwayukile Yehoba. Mwaumvwine byepi byo mwayukile jizhina ja Lesa ne ene mambo o alengejile bantu? Nanchi mubena kuvuluka byo kyawamine kupwanañena pamo na bena Kilishitu bakwenu pa kubuñana ne pa kushonkena nyi? Kimye kyo mwasapwilanga mambo awama ku bantu bakebanga kufunda bukine, nanchi kechi mwabwelele ku nzubo saka mwasangalala nenyi?
Mwakonsha kwikala jibiji na luno lusekelo. Bakalume ba Lesa ba kala balombele’mba, “Anweba Yehoba, tubwezhai kwi anweba, ne atweba twaswa kubwela kwi anweba. Bwezhai moba etu byonka byo ajinga kala.” (Majilo a Yelemiya 5:21) Yehoba wakumbwile luno lulombelo, ne bantu banji batendekele kumwingijila jibiji na lusekelo. (Nehemiya 8:17) Yehoba ukemukwasha ne anweba.
Kwambatu kine, kechi kyapela kubwela kwi Yehoba ne. Monai makatazho amo akonsha kwimulengela kukatazha kubwela ne byo mwakonsha kwiashinda.