KIPUNGU 5

Bwelai kwi “Kafunga Kabiji Kalama wa Myeo Yenu”

Nanchi ne anweba mwapitapo kala mu bintu bimo nangwa makatazho o baambapo mu uno buloshuwa nyi? Inge mwapitamo kala, kechi yenu bunketu ne. Bakalume ba Lesa bavula ba kishinka bajingako kala ne bajiko lelo nabo babena kupita mu makatazho antutu amo. Byonkatu Yehoba byo ebakwashishe kuchinchika makatazho, ne anweba ukemukwasha.

Yehoba ukemukwasha inge mwabwela kwi aye

YUKAI’MBA Yehoba ukemukwasha inge mwabwela kwi aye. Ukemukwasha kuyuka mwa kubila na bijikila, kukana milanguluko yatama ne kwimukwasha kwikala na jiwi ja mu muchima jawama jikemulengela kwikala na milanguluko yawama ne mutende. Kino kikemulengela kutendeka kwingijila Yehoba jibiji pamo na bakwenu bena Kilishitu. Bintu byo mwapitamo bijitu pamo na byobya byapichilemo bena Kilishitu batanshi, mutumwa Paulo bo anembejile’mba: “Anweba mwajinga nobe mikooko yaya mungi, pano luno mwabwela kwi kafunga kabiji kalama wa myeo yenu.”—1 Petelo 2:25.

Kyawama bingi kubwela kwi Yehoba. Mambo ka? Mukasangajika muchima wa Yehoba. (Byambo bya Maana 27:11) Onkao mambo, byubilo byetu byakonsha kulengela Yehoba kumvwa ku muchima kuwama nangwa kutama. Nangwa byonkabyo, Yehoba kechi witukanjikizha kumutemwa nangwa kumwingijila ne. (Mpitulukilo ya mu Mizhilo 30:19, 20) Shayuka umo wa Baibolo waambile’mba: “Kafwako wakonsha kushinkula mu muchima wenu ne, kana anweba bene.” Inge saka twingijila Yehoba na mambo a kumutemwa, twakonsha kushinkula kinzhilo kya ku muchima. Umvwe twauba bino, tumupa kintu kyawama bingi, ko kuba’mba kumwingijila mu bukishinka kabiji tumutokesha ku muchima. Kafwako kintu kyawama kyakonsha kwituletela lusekelo kyakila pa kwingijila Yehoba na muchima yense ne.—Byubilo 20:35; Lumwekesho 4:11.

Nyenga walekele kwingijila Yehoba bamutambwila mu kipwilo

Inge mwatendeka kutanwa ku kupwila, po po mukamuyuka bulongo Lesa. (Mateo 5:3) Mu ñanyi jishinda? Bantu bavula muno mu ntanda, ‘Kechi bayuka kyo twaikelako ne.’ Bakebesha kuyuka ene mambo o twaikelako. Bantu bakeba kuyuka kino, mambo Yehoba byo byo ebalengele. Witulengele kuba’mba tumwingijilenga. Kafwako kintu kikwabo kyakonsha kwituletela lusekelo kyaesakana na kwingijila Yehoba na mambo a kumutemwa ne.—Salamo 63:1-5.

Yukai’mba Yehoba ukeba’mba mubwele kwi aye. Mwayuka byepi kino? Akilangulukai pa kino: Balombelepo bingi pa kuba’mba banembe uno buloshuwa. Bemuletejile uno buloshuwa kampe ku mukulumpe mu kipwilo nangwa mukwenu mwina Kilishitu. Mwamutangile ne kwingijisha byambo bijimo. Abino byonse bibena kumwesha’mba Yehoba kechi wimulubako ne. Pakuba ubena kwimukokela kwi aye.—Yoano 6:44.

Kitutekenesha bingi kuyuka’mba Yehoba kechi ulubako bakalume banji baeleka ne. Akino kyalengejile nyenga Donna kusanta bingi. Waambile’mba: “Nafuminenga mu bukine pachepache, bino natendekele kulanguluka pa Salamo 139:23, 24 waamba’mba: ‘Anweba Lesa, nkebakebai ne kuyuka muchima wami. Mpimapimai ne kuyuka milanguluko yami yankatazha. Monai mwi amiwa inge mujipo kyatama, ne kuntangijila mu jishinda ja myaka ne myaka.’ Nayukile’mba kechi ne wa pano pa ntanda ne, nafwainwe kwikala mu jibumba ja Yehoba. Namwene’mba Yehoba kechi wansha ne; nakebelengatu jishinda ja kubwelelamo kwi aye. Natemwa bingi byo nabwela!”

“Namwene’mba Yehoba kechi wansha ne; nakebelengatu jishinda ja kubwelelamo kwi aye”

Tubena kulomba kuba’mba ne anweba mukekale na “lusekelo lwa Yehoba.” (Nehemiya 8:10) Kechi mukelangulusha inge mwabwela kwi Yehoba ne.

Mikumbu ya Mepuzho Aamba pa bya Kubwela kwi Yehoba

NSAKUTENDEKELA PI?

Muntu wakolwa pa kimye kyabaya, utendeka kwingila pachepache. Ne anwebatu mwakonsha kwikala bena Kilishitu bakosa inge ke mufunde pe Lesa pa juba pa juba. Kechi mwakonsha kufunda byonse pa kimye kimotu ne. Kampe mwakonsha kwingijishako maminiti acheche kutanga nangwa kuteleka ku mashimikila a mu Baibolo o batanga, kufunda mabuku, alumbulula Baibolo ne kutamba mavidyo aji pa jw.org/kqn. Nangwa tambai muntachi wa pa ñondo wa JW Broadcast pa jw.org. Kabiji tanwainga ku kupwila kwa kipwilo. Lombainga kwi Yehoba kuba’mba emukwashe. ‘Tayai bijikila byenu pe aye, mambo wimuta muchima.’—1 Petelo 5:7.

“Byo nalekele kupwila ne kwingijila Yehoba, naumvwanga bumvu kulomba. Byo nalombele, mukulumpe umo mu kipwilo mo najinga wamfwakashijile. Wankwashishe kuyuka’mba Yehoba kechi wandubako ne. Uno mukulumpe wambuujile’mba ntangenga Baibolo pa juba pa juba. Byo naubile bino, natendekele kupwila. Mu kuya kwa moba, natendekele kusapwila. Natemwa bingi kuba’mba Yehoba kechi wandubileko ne.”—Eeva.

KIPWILO KIKAMMONA BYEPI?

Yukai’mba balongo ne banyenga mu kipwilo bakemutambwila bulongo. Abo kechi bakemulengulula nangwa kwimupamo mambo ne, bino bakamwesha’mba bemutemwa kabiji bakemutundaika.—Bahebelu 10:24, 25.

“Naumvwanga bingi bumvu kuya ku Nzubo ya Bufumu. Nalangulukanga bingi pa bikammona bakwetu. Nyenga umo mukulumpe wajingako myaka 30 yapitapo, wañambijile’mba, ‘Mwabwelai mwanami!’ Kino kyamfikile bingi pa muchima. Kine nabwelele pa nzubo.”—Javier.

“Nayile ku Nzubo ya Bufumu kabiji naikejile ku kipona kya kunyuma kuba’mba bantu babule kummona. Pano bino, bavula bangyukile kufumatu kimye kyo naiyanga na kupwila saka nkiji mwanyike. Bantambwijile bingi bulongo ne kunkumbachilamo, kino kyandengejile kutemwa bingi. Kyajingatu nobe nabwela ku nzubo.”—Marco.

BAKULUMPE MU KIPWILO BAKANKWASHA BYEPI?

Bakulumpe mu kipwilo bakemubila lusa. Bakemusanchila pa kukeba kwikala jibiji na ‘butemwe bo mwajinga nabo patanshi.’ (Lumwekesho 2:4) Bakemukwasha kuleka byubilo byatama byo mwajinga nabyo, bakooba bino “na muchima wakooka.” (Ngalatiya 6:1; Byambo bya Maana 28:13) Bakulumpe mu kipwilo bakonsha kwambilapo muntu umo kwimufunjishanga mu buku nabiji wa kuba’mba Mukekala Myaka ne Myaka! nangwa Fwenyai Kwipi ne Yehoba. Yukai’mba bakulumpe mu kipwilo bakemukwasha ne kwimutundaika.—Isaya 32:1, 2.

“Myaka itanu na isatu yo nalekele kupwila, bakulumpe baiyanga na kuntundaika. Juba jimo, mukulumpe mu kipwilo wammwesheshe bipikichala byo etukopele. Kutala pa bino bipikichala kwandengejile kuvuluka bintu byawama byo neyowanga kimye kyo naingijilanga Yehoba. Bakulumpe bankwashishe bingi kukosesha jikwabo bulunda bwami ne Lesa.”—Victor.

“Lesa Ukemukosesha”

Buku wetu wa nyimbo, wa ‘Imbilainga Yehoba na Lusekelo’, muji nyimbo yawama bingi yakonsha kwimutekenesha ne kwimutundaika byo mubena kukosesha bulunda bwenu ne Lesa. Akimonai byambo biji mu lwimbo nambala 38. Byafuma mu byambo biji pa 1 Petelo 5:10, uno lwimbo uji na mutwe wa kuba’mba “Lesa Ukemukosesha.”

Kuji kyo emupela Lesa bukine

Ne kwimuleta mu kyeya kyanji.

Wamwene byo mwateshesheko muchima

Kumukeba ne kuba byawama.

Mwamulayile kuba kyo aswa;

Ne luno napo ukemukwasha.
Lesa wimupa Mwana ye atemwisha;

Ukeba’mba mwikale bulongo.

Byo emupa Mwananji ye atemwisha,

Nanchi ukemupa ne bulume.

Ukavuluka butemwe bwenu;

Ukalama bantu banji bonse.

(KOLASI)

Lesa wimupotele na mashi a Yesu.

Kyalumbulula’mba, ukemukosesha.

Ukemutangijilangane kwimulama.

Kyalumbulula’mba, ukemukosesha.

Pa kuba’mba muteleke ku nyimbo ikwabo ya Bufumu yo baimba mu mawi nangwa mu bijimba. Monai po banemba’mba MABUKU> NYIMBO.