LUFUNJISHO 56
Twajijilai Kukwatankana mu Kipwilo
Inge tuji pamo na balongo ne banyenga, tumvwa ku muchima byonkatu byaambile Mfumu Davida amba: “Byo kyawamapo ne byo kitutokela ku muchima balongo kwikala pamo saka bakwatankana!” (Salamo 133:1) Kukwatankana kwetu kechi kwiyakotu ako kwine ne. Pakuba atweba bonse pa muntu pa muntu tubapo bintu bimo pa kuba’mba tukwatankane.
1. Ñanyi kyubilo kiji na bantu ba Lesa?
Inge mwataanwa ku kupwila ku mpunzha ko bamba mulaka ungi wapusana na ye mwingijisha, kechi kikemupeelela kumvwa byo bakambanga ne. Pano bino, lusekelo lukamwesha balongo ne banyenga, lukemulengela kumvwatu nobe muji mu kipwilo kyenu. Mambo ka? Mambo tufunda Baibolo kwingijisha mabuku alumbulula Baibolo antutu amo mwaya ntanda yonse. Kabiji twibikako bingi kutemwa balongo ne banyenga. Konse ko twikala bonse ‘twita pa jizhina ja Yehoba, ne kumwingijila saka twakwatankana.’—Zefwaniya 3:9, tubyambo twa munshi.
2. Ñanyi kintu kyo mwafwainwa kuba pa kuba’mba mu kipwilo mwikale mutende ne kukwatankana?
“Itemwishai na muchima yense anwe bene na bene.” (1 Petelo 1:22) Mwakonsha kwingijisha byepi bino byambo biji pa kino kinembelo? Anweba kechi mwafwainwa kutatu muchima pa bilubankanya bakwenu ne. Bino tainga muchima pa bintu byawama byo boba. Kechi mwafwainwa kupwanañanangatu na bantu bo mwatemwa ne. Pano bino, ibikaingako kuyuka balongo ne banyenga bapita mu bintu byapusana pusana byo mukyangye kupitamo. Tuleke misalululo yo twakonsha kwikala nayo.—Tangai 1 Petelo 2:17.a
3. Mwakonsha kuba byepi inge mwizhingijisha na mulongo nangwa nyenga?
Atweba twakwatankana, bino kechi twaoloka ne. Kimye kimo tufichisha bakwetu ku muchima nangwa kuba bintu bikozha bakwetu ku muchima. O ene mambo Baibolo o itukambizhizha’mba: “Itekenyainga . . . ne kwilekelako mambo.” Kabiji wanungapo’mba: “Byonkatu Yehoba byo emulekejileko mambo, ne anweba byo byo mwafwainwa kubanga.” (Tangai Kolose 3:13.) Tumulenga mambo Yehoba bimye byavula bingi. Nangwa byonkabyo, aye witulekelako mambo etu. Onkao mambo, ukeba’mba ne atweba tulekelengako mambo balongo ne banyenga yetu. Umvwe mwamona’mba mwauba bintu byakozha mukwenu ku muchima, mwafwainwa kwisamba nanji bukiji bukiji pa kuba’mba mupwishe lukatazho.—Tangai Mateo 5:23, 24.b
FUNJILAIPO BIKWABO
Langulukaipo bintu bimo byo mwafwainwa kuba pa kuba’mba mu kipwilo mwikale mutende ne kukwatankana.
Ñanyi bintu byo mwafwainwa kuba pa kuba’mba mwikale mu mutende na bakwenu?
4. Lekai misalululo
Twafwainwa kutemwa balongo ne banyenga bonse. Pano bino, kitukatazha bingi kutemwa muntu wabula byubilo byo tujipo nabyo. Pano ñanyi kintu kyafwainwa kwitukwasha kutemwa bantu bonse? Tangai Byubilo 10:34, 35, ne kwisamba ano mepuzho:
Yehoba watambwila bantu bonse bapusana pusana kwikala Bakamonyi banji. Kuyuka kino kishinka, kwafwainwa kwimukwasha kumonanga byepi bantu bafuma ku byalo bingi?
Ñanyi byubilo byo mwafwainwa kuchinuzhuka bimwesha misalululo biji na bantu baji ku mpunzha ko mwikala?
Tangai 2 Kolinda 6: 11-13, ne kwisamba buno bwipuzho:
Ñanyi kintu kyafwainwa kwimukwasha kutemwa balongo ne banyenga bonse?
5. Ilekelaingako mambo ne kupwana
Yehoba witulekelako mambo nangwa kya kuba aye kechi ukalombapo lulekelo lwa mambo kwi atweba ne. Tangai Salamo 86:5, ne kwisamba ano mepuzho:
Tubena kufunjilako ka kwi Yehoba ku kino kyepelo byo alekelako bantu mambo?
Nanchi mwatemwa Yehoba byo alekelako bantu mambo nyi? Mambo ka o mwakumbwila byobyo?
Ñanyi bintu bimo byakonsha kwitulengela kubula kumvwañananga na bakwetu?
Twafwainwa kwikala byepi biji Yehoba ne kutwajijila kukwatankana na balongo ne banyenga? Tangai Byambo bya Maana 19:11, ne kwisamba buno bwipuzho:
Mwafwainwa kuba byepi pa kuba’mba mupwishe lukatazho inge mukwenu wimuzhingijisha nangwa wauba bintu bimukozha ku muchima?
Kimye kimo, ne atweba tuba bintu bizhingijisha bakwetu. Twafwainwa kuba byepi inge kino kyamweka? Tambai VIDYO, ne kwisamba buno bwipuzho.
Mu vidyo ye mwatamba, nyenga waubile byepi pa kuba’mba ekale mu mutende na bakwabo?
6. Kebainga bintu byawama mu balongo ne banyenga yenu
Inge twayuka bulongo biji balongo ne banyenga yetu, kiketukwasha kuyuka byubilo byabo byawama ne mo babula kuba bulongo. Twafwainwa kuta byepi muchima pa byubilo byabo byawama? Tambai VIDYO, ne kwisamba buno bwipuzho.
Ñanyi kintu kyafwainwa kwimukwasha kuta muchima pa byubilo byawama bya balongo ne banyenga yenu?
Yehoba utatu muchima pa byubilo byetu byawama. Tangai 2 Byambo bya Moba 16:9a, ne kwisamba buno bwipuzho:
Kuyuka’mba Yehoba watatu muchima pa byubilo byenu byawama, kwimulengela kumvwa byepi ku muchima?
Nangwatu kambalaminwe ko balenga kwingijisha bintu bya mutengo bingi kakonsha kwikala na po kakwabauka, bino kanema bingi. Kyo kimotu, balongo ne banyenga yetu bonse kechi baoloka ne, bino banema bingi kwi Yehoba
BANTU BAMO BAMBA’MBA: “Inge nalekelako mambo muntu ponkapotu, ko kuba’mba kechi ukayuka’mba kintu kyo auba kyankozha ku muchima ne.”
Mambo ka o twafwainwa kulekelangako mambo bakwetu na muchima yense?
ÑANYI BISHINKA BYO MWAFUNDA?
Mulengela kipwilo kukwatankana inge mwaikala na muchima wa kulekelako mambo bakwenu ne kutemwa balongo ne banyenga bonse.
Mepuzho a kupitulukamo
Mwafwainwa kuchinuzhuka byepi misalululo?
Mwafwainwa kuba byepi inge mwizhingijisha na mulongo nangwa nyenga?
Mambo ka o mwafwainwa kulekelangako mambo bakwenu byonkatu Yehoba byo etulekelako mambo?
KEBAI BISHINKA BIKWABO
Funjilaiko ku kishimpi kya kwa Yesu byo kyafwainwa kwimukwasha kuleka kuzhachishanga bakwenu.
Nanchi kyawama kulomba lulekelo lwa mambo nangwa kya kuba kechi yetu twalubankanya nenyi?
“Kulomba Lulekelo lwa Mambo ko Kuleta Mutende” (Kyamba kya Usopa, November 1, 2002)
Monai bantu bamo byo bafunda kubula misalululo.
Yukai mwa kupwishisha makatazho na mukwenu saka akyangye konauna mutende mu kipwilo.
“Pwishainga Makatazho mu Butemwe” (Kyamba kya Usopa, May 2016)
a Byambo byo Balumbulula 6 byaamba pa butemwe buji na bena Kilishitu byo bwibakwasha kuchinuzhuka kusambwisha bakwabo bikola.
b Byambo byo Balumbulula 7 byaamba pa mwa kubila na makatazho a mu bya busulu ne bya kwilobela ku bije.