Byambo ku Bataanwa ku Kushonkena

BAASHA Baasha bebapa mwingilo wa kwimukwasha. Onkao mambo, umvwinainga byo babena kwimubuula kwa kwimikila myotoka, kwa kukungika makinga, kwa kutwelela ne kwa kulupukila, pa kwikala ne bintutu bikwabo.

LUBATIZHILO Bipona byo balamina babena kuya na kubatizhiwa bikekela kulutwe kwipi na mutuntamo. Babena kuya na kubatizhiwa bafwainwa kwikela jimo pa bino bipona jashi ja lubatizhilo saka jikyangye kutendeka pa juba ja bubiji lukelo. Bonse babena kubatizhiwa bafwainwa kwiya na taulo ne bya kuvwala bya mushingi bya kuvwala pa kubatizhiwa.

KUPANAKO MALI Pataiwa mali avula bingi pa kuba’mba tunengezhe mpunzha yabaya bulongo pa kwikala, bya kwambilamo, biñambañamba bya mavidyo ne mingilotu ikwabo yavula ilengela kushonkena kuwama ne kwitukwasha kufwenya kwipi ne Yehoba. Mali o mupana akwasha kunengezha bino bintu ne kukwasha mu mwingilo wa ntanda yonse. Pa kuba’mba kimupeleleko, tubokoshi twa kubikamo mali to banembapo, betubika pa mapunzha avula pa kuno kushonkena. Mwakonsha ne kupanako mali kwingijisha intaneti pa keyala wa donate.jw.org. Tusanta bingi pa bupe bwenu bonse bo mupana. Jibumba Jitangijila jibena kwimusanchila bingi pa byonse byo mupana bya kutundaika mwingilo wa Bufumu.

KIPATELA Mwane yukai’mba uno dipatimenti waikelakotu kukwasha boba bakolelwa pa kushonkena nangwa inge pamweka mapuso.

DIPATIMENTI WA BYELEKA Bipe byonse byaeleka byo mwataana mwafwainwa kwibitwala ku Dipatimenti wa Byeleka. Umvwe mwaelapo kintu kimo, yai ku uno dipatimenti na kwipuzha pa kyokyo kintu kyo mwaela. Baana balubilamo babula kumona paikela bansemi babo, mwafwainwa kwibatwala ku uno dipatimenti. Nangwa byonkabyo, twatundaika bansemi bonse kwikalanga na baana babo kimye kyonse ne kwibasopanga, pa kuba’mba babulenga kupitañananga.

PA KWIKALA Mwafwainwa kulangulukilangako bakwenu. Bantu bo mwafwainwatu kulamina bipona ke ba mu kisemi kyenu, bo mwaiya nabo mu motoka umo, bo mwikala nabo pa nzubo, nangwa bo mufunjisha Baibolo. Kechi mwafwainwa kubika bintu pa bipona po musakubula kwikala ne.

DIPATIMENTI WA MWINGILO WA KWIPANA Inge mukeba kwingilako mingilo pa kushonkena, yai ku Dipatimenti Utala pa Mabulañano ne Mwingilo wa Kwipana.