Bakamonyi ba kwa Yehoba Babena Kuya Palutwe Kasa Bakosa mu Lwitabilo! Sawakya wa Kupwila kwa pa Mwaka

MU ANO moba a bantu ba luzhinauko, Bakamonyi ba kwa Yehoba batwajijila kwikala bena Kilishitu bakosa mu lwitabilo. Kino kyaambiwepo pa kupwila kwa pa mwaka kwa Watch Tower Bible and Tract Society of Pennsylvania kwajingako pa Kibelushi, October 7, 2000 mu Nzubo Ikatampe Mwakupwila ya New Jersey ya Bakamonyi ba kwa Yehoba mu Muzhi wa Jersey.a

John E. Barr wa mu Jibumba Jitangijila ja Bakamonyi ba kwa Yehoba wajinga cheyamani pa kuno kupwila waambile mu byambo byanji bya kushinkwila amba: “Pa bantu bonse pano pa ntanda, yetu twayuka kuba’mba Mwana Yehoba ye atemwisha aye Yesu Kilishitu pano ye kalama uji pa bufumu mwiulu kabiji ubena kulama pakachi ka balwanyi banji.” Kishiino kya luno lwitabilo lwakosa kyamwekele mu masawakya a lusekelo 6 kufuma mwaya ntanda yonse.

Bukine bwa Baibolo Bubena Kushinda Kupopwela Mipashi mu Haiti

Kupopwela mipashi kwasampuka bingi mu Haiti. Utangijila mu Kometi ya Musampi aye John Norman waambile’mba: “Javula bantu bavwala bizhimba bya kwishiika bene.” Ñanga wa lubuko umo wakuminye bingi byo avitukile kulu mu mapuso. Wakuminye’mba, ‘kino kintu kyamwekela byepi sanavimbilwa na bapashi?’ Bakamonyi ba kwa Yehoba bafunjishe uno mwanamulume bukine byonka byo bauba ku bakwabo bavula, kabiji bamukwashishe kuleka kupopwela mipashi. Muya moba, basapwishi mu Haiti bakavujilako mambo bantu batainwe ku Kivuluko kya lufu lwa Kilishitu pa Apirl 19, 2000, bavujile kukila pa kibelengelo kya basapwishi ba Bufumu bonse mu kyo kya kyalo.

Basapwishi Babambakana mu Kyalo kya Korea

Mu Korea, 40 pesenti ya kibelengelo kya Bakamonyi ba kwa Yehoba baji mu mwingilo wa kimye kyonse. Utangijila mu Kometi ya Musampi aye Milton Hamilton waambile’mba “na ino nzhita ikatampe ya basapwishi, pa kuba’mba ñondo apwe, tupwisha kusapwila mu kyalo kyetu kiji na bantu bakila pa 47 milyonyi.” Bipwilo bya bakamaama nabyo bibena kuvujilako. Mu kijiiji kimo kya bipwilo bya bakamaama munakutangijilwa mafunjisho a Baibolo 800. Ko kuba’mba musapwishi yense uji na lufunjisho lumo. Bino mawi a bulanda ke akuba’mba balongo bamo bakyanyike bakiji mu kaleya na mambo akubula kwikala mu bya ino ntanda. Bino nangwa kiji byonkabyo, bano bena Kilishitu bakishinka baji mu kaleya babena kwibalama bingi bulongo ku bakulumpe batuleya kabiji javula bebapa ne nkito yafwainwa kwingila baketekelwa.

Kupwisha Lukatazho lwa Basapwishi Bavula mu Mexico

Kibelengelo kya basapwishi ba Bufumu 533,665 mu Mexico, bo batumine sawakya wa mwingilo wabo mu August 2000. Bavula kukila pa kino kibelengelo batainwe ku Kivuluko. Utangijila mu Kometi ya Musampi aye Robert Tracy waambile’mba “uno mwaka tuji na kikonkwanyi kya kutunga Mazubo a Bufumu akila pa 240.” Kabiji wanungilepo’mba “nangwa kiji byonkabyo, tubena kukeba kutunga akwabo avula.”

Bakamonyi ba kwa Yehoba bakyanyike mu Mexico baji na kya kumwenako kyawama bingi. Mukulumpe umo wa Kikatolika waambile pa mwanyike umo amba: “Pa bantu bami mbena kukeba kwikala na muntu uji nabiji iwe mwanyike. Abe bantu ne bakumbwa bingi mambo a kwingila na ngovu ne kwingijisha Baibolo na maana. Bengijila Lesa kya kuba’mba batailapo ne bumi bwabo.”

Kusunga Bulumbuluke Kimye kya Malwañano mu Sierra Leone

Kufuma mu April 1991, kimye kyatendekele nkondo ya mulwabo mu Sierra Leone, bantu bavula baipaiwa, kukozhewa ne kulemekwa. Utangijila mu Kometi ya Musampi aye Bill Cowan waambile’mba: “Nkondo ne buyanji byalengela bantu kupimpula bwikalo bwabo kya kine kine. Bavula basujile buluwe bwetu pano babena kuteleka na lusekelo. Bantu bavula beishilatu bene ku Mazubo etu a Bufumu kimye kitanshi kwakubula nangwa kwibetatu ne. Javula bantu mu mikwakwa bemika balongo ne kwibalomba’mba be bafunjishengako Baibolo.” Nangwa kyakuba mu Sierra Leone mukiji nkondo, mwingilo wa kusapwila Bufumu ubena kutwajijila kabiji bavula babena kwitabila.

Mwingilo Mukatampe wa Buntungi mu South Africa

Pa kino kimye, Mazubo a Bufumu avula abena kukebewa mu nyaunda iji mu maboko a musampi wa South Africa. Mazubo a Bufumu avula atungwa kala. John Kikot wa mu Kometi ya Musampi waambile’mba “mukifulo kya kupwila mu bimpampa nangwa munshi ya bichi byonka byo kibaubiwenga kunyuma kwe, balongo betu pano babena kupwila mu mazubo awama muji bipona byafwainwa. Nangwa kyakuba ano Mazubo a Bufumu avula, kechi ashimikilwa kuba’mba aye nkuwa ne, javula o amwekapo bulongo kukila bishimikwa bikwabo mu mapunzha moaji. Mu mapunzha amo kyatanwa kuba’mba pa nyuma ya kutunga Nzubo ya Bufumu, pa kufika ku mwaka mukwabo, bantu mu kipwilo bavula kukila byo bajinga pa nyuma.”

Bakamonyi Bakatataka mu Ukraine

Mu mwaka wa mwingilo wa 2000, basapwishi mu kino kyalo bafikile 112,720. Basapwishi 50,000 mu kino kibelengelo bafunjile bukine bwa Baibolo mu kimye kya myaka itanu yapita. Utangijila mu Kometi ya Musampi aye John Didur waambile’mba: “Kya kine Yehoba wakomesha kisemi kya katataka kya Bakamonyi bakyanyike kusapwila jizhina janji!” Kabiji wanungilepo kwamba’mba: “Pa myaka ibiji yapita, twashile magazini 50 milyonyi ku bantu. Kino kibelengelo kyo kya bantu bonse baji mu kino kyalo. Pa ñondo pa ñondo, tutambwila makalata avula kufuma ku bantu babena kukeba kufunjilako byavula.”

Mitwe Ikwabo ya Lusekelo Yajinga mu Ino Pologalamu

Daniel Sydlik wa mu Jibumba Jitangijila waambile jashi jasangajikile bingi. Mutwe wakuba’mba “Jibumba Jitangijila byo Japusana na Kije kya Muzhilo,” uji mu ino magazini waimana pa jino jashi ja lufunjisho.

Theodore Jaracz wa mu Jibumba Jitangijila waambile jashi janengela bingi jajinga na mutwe wa kuba’mba “Bakulumpe ne Bankwasho mu Kipwilo Batongolwa na Lesa.” Mutwe umo uji mu ino magazini waimana pa jino jashi.

Kabiji kuno kupwila kwa pa mwaka kwavwangilemo ne jashi ja lusekelo jaambile pa kinembelo kya mwaka wa 2001. Jino jashi jaambiwe na wa mu Jibumba Jitangijila aye David Splane. Kino kinembelo kyaimana pa byambo bya mutumwa Paulo byo aambile’mba: “Mwikale balumbuluka ne bakosatu mu lwitabilo monse mwaswila muchima wa Lesa.” (Kolose 4:12) Bakamonyi ba kwa Yehoba mwaya ntanda yonse bakoselamo mu kuba byonkabyo byo babena kusapwila mambo awama a Bufumu bwa Lesa pano pa ntanda ponse.—Mateo 24:14.

[Tubyambo twa mushi]