Mepuzho Kufuma Kubatanga

Nanchi Lulayañano Lwaluchipo kwi Lesa Lwikala Lwakuba’mba Kanatu Lukafikizhiwenyi?

Mu Binembelo, lulayañano lwaluchipo kemulaye wanema bingi wakulayañana ne Lesa kubapo kintu kimo, nabiji kupana mulambo, kutatula kumwingijila mwingilo wanema, nangwa kuzhila bintu bimo byabula kukanyiwa mwayila muzhilo. Mu Baibolo muji mashimikila alulayañano lwaluchipo lwafikizhiwengatu umvwe Lesa patanshi waubapo kintu kimo. Kyakumwenako, Hana, ina ngauzhi Samwela, “walayile na luchipo kwi Yehoba wa mabumba’mba: Umvwe . . . ne kumvulama ne, kabiji inge mukampe amiwa muzha wenu mwana wa mulume, amiwa nkamupana kwi Yehoba moba onse a mweo wanji, kabiji mutwe wanji kechi bakamupemunapo na mpemuna ne.” (1 Samwela 1:11) Kabiji Baibolo yalondolola’mba kuji nelulayañano lwaluchipo lubiwatu mukwifuukwila mwine muntu. Nanchi lulayañano lwaluchipo kwi Lesa luji byepi?

Kala Solomone Mfumu wabena Isalela waambile’ mba: “Inge mwalayañana na luchipo kwi Lesa, kechi mubande kwilufikizha ne.” Kabiji wanungilepo nejikwabo’mba: “Fikizhai lulayañano lwenu. Kimuwamina kubula kulayañana na luchipo kukila kulayañana ne kwikyuba ne.” (Musapwishi 5:4, 5) Muzhilo wapewe kubena Isalela kupichila mwi Mosesa waambile amba: “Byo mulaya na luchipo kupana kwi Yehoba Lesa wenu kechi mukabande kwikipana ne; mwakeya kwikala na mambo, mambo kine Yehoba Lesa wenu ukekikeba kwi anweba.” (Mpitulukilo ya mu mizhilo 23:21) Kyakine, kulayañana naluchipo kwi Lesa kechi kintu kyakukaishane. Lwafwainwa kubiwa namulanguluko wawama, kabiji nemuntu ubena kulayañana lolo lulayañano lwaluchipo kechi wafwainwa kuba kabiji keazhinauke’mba kana nkafikizha kintu kiji kyonse kyonalailenyi, inyi kanane. Umvwe kiji byobyo, kyawama nanchi nekubula kulayañana naluchipo. Pano umvwe mwalayañana kala naluchipo, nanchi lwafwainwa kubatu’mba kana lukafikizhiwenyi?

Ibyepi umvwe kyakuba alo lulayañano lwaluchipo lwajinga lwakuba kintu kyatanyiwa kulutwe nalwendo amba kechi kyakwatankana nakyaswa muchima wa Lesa ne? Ibyepi inge lwajinga lulayañano lwaluchipo lwakonsha kuchapankanya mumashinda amo byubilo byatama nabupopweshi bwakine? (Mpitulukilo ya mu mizhilo 23:18) Kwakubula nangwa kuzhinauka, lulayañano lwaluchipo lwauno mutundu kechi lwafwainwa kufikizhiwane. Kabiji mu Mizhilo yakwa Mosesa, inge mwanamukazhi walayañana naluchipo, bashanji nangwa bamwatawanji bakonsheshe kwiluchakulapo.—Kubala 30:3-15.

Kabiji akilangulukai muntu walayañene naluchipo kwi Lesa kuba’mba kechi ukasongola nangwa kusongolwane, pano watana kuba’mba kyamukatazha. Lulayañano lwanji lwaluchipo pano lubena kumulengela kwiumvwa’mba umvwe watwajijila nalo wakonsha kumulengela kuzhilulula mizhilo ya Lesa yabyubilo byawama. Nanchi wafwainwa kuminatu popolo palulayañano lwanji lwaluchiponyi? Nanchi kechi kyafwainwa kumuwamina kwizhikijila mwine kumambo abulalelale kupichila mukwiluchakulapo lulayañano lwanji loalayañene naluchipo nekusanshijila Lesa kumubila lusa nekumulekelako mambo nenyi? Aye mwine bunke bwanji yewakonsha kufuukula byakuba, kafwako muntu ungi wakonsha kumufuukwila byakuba paano mambone.

Ibyepi umvwe muntu walayañene naluchipo, bino kokyakayanga watana kuba’mba walayañene namuchima wakanswatu? Nanchi wafwainwa kwikajijila kumulaye wanji amba kanatu amufikizhenyi? Kechi kyamupelejile Yafita kufikizha lulayañano loachipile kwi Lesa ne, bino wilufikizhe. (Mitonyi 11:30-40) Umvwe muntu wakankalwa kufikizha lulayañano lwanji loachipile kwi Lesa, wakonsha kulengela Lesa “bukaji” nekonauna mingilo yamaboko anji. (Musapwishi 5:6) Kupeezha lulayañano lwaluchipo nekubula kwilufikizha, kyakonsha kulengela Lesa kufumyapo bibusa byanji.

Yesu waambile’mba: “Kwamba kwenu kwikaletu amba, Ee, Ee; Ine, Ine; mambo kyanungwa ku bibye kifuma ku bubi.” (Mateo 5:37) Mwina kilishitu kechi wafwainwa kwakamwatu pamambo akufikizha lulayañano lwanji naluchipo kwi Lesa konkane, bino wafwainwa nekwikala nabukishinka mubyambo byanji byonse—kwi Lesa kabiji nekubantu. Pano kyafwainwa kwikala byepi umvwe kyakuba muntu witana mulukatazho lukatampe panyuma yakulayañana naluchipo namukwabo pakintu kyamwekele nobe kyawamatu bulongo bino pakwikipalanguzha watana kuba’mba kino kintu kyatama? Kechi wafwainwa kupeezha luno lulayañanone. Bino namambo akuba besambilepo kyabaya, mukwabo wakonsha kumukasulula kuluno lulayañano.—Masalamo 15:4; Byambo bya Mana 6:2, 3.

Pamambo alulayañano lwaluchipo nemubintutu bikwabo byonse, ñanyi kintu kikatampe kyotwafwainwa kwakamwa? Kimye kyonse twayai tutwajijile kukebesha kwikala nabulunda bwawama na Yehoba Lesa.

[Bipikichala pa peja 30, 31]

Hana kechi wakankazhamine kufikizha lulayañano lwanji loachipilene

[Bipikichala pa peja 30, 31]

Yefita wafikizhe lulayañano lwanji loachipile nangwa kyakuba kyakatezhe