Mepuzho Kufuma ku Batanga

Byambo byaamba’mba “bumi mwi aye mwine” bilumbulula ka?

Baibolo yashimikizhapo byambo bya kuba’mba Yesu uji na “bumi mwi aye mwine” ne baana banji ba bwanga nabo amba baji na ‘bumi mwi abo bene.’ (Yoano 5:26; 6:53) Pano nangwa byonkabyo, abye binembelo bibiji kechi byalumbulula kintutu kimo ne.

Yesu waambile’mba: “Shanji byonka byo aji na bumi mwi aye mwine, byo byo apako ne Mwana naye ekale na bumi mwi aye mwine.” Saka akyangye kwamba bino byambo byanema, patanshi waambile’mba: “Kine kine, nemwambila namba, Aye waumvwa mambo ami, ne kumwitabila aye wantuma uji na bumi bwa myaka, . . . Juba jibenakwiya, ne pano jafika kala, po bakomvwa bafu jiwi ja Mwana Lesa; ne abo bakomvwa bakekala na bumi.” Apo, Yesu watongwelenga ngovu yanji ikatampe yamupele Shanji ya kumwena bantu jishinda ja kwikelamo baitabilwa ku meso a Lesa. Kabiji Yesu uji ne na bulume bwa kusangula boba balaala mu tulo twa lufu ne kwibapa bumi. Onkao mambo, Yesu kwikala na “bumi mwi aye mwine” kulumbulula’mba bamupa bubwe bulume. Byonka biji Shanji, Mwana naye uji ‘na bupe bwa bumi mwi aye mwine.’ (Yoano 5:24-26) Nga ku baana banji ba bwanga bilumbulula ka?

Byo papichile nobe mwaka umo, Yesu waambile ku bantu bamutelekelenga’mba: “Kine, kine, nemwambila namba, Umvwe anweba ne kuja ku mubiji wa Mwana muntu ne, ne kutoma mashi anji ne, kechi muji ne bumi mwi anweba bene ne. Awa uja ku mubiji wami, ne kutoma mashi ami, ye uji na bumi bwa myaka; ne amiwa nkamusangula mu juba jikapelako.” (Yoano 6:53, 54) Onkao mambo, Yesu waesakanya kwikala na “bumi mwi anweba bene” na “bumi bwa myaka.” Byambo byanembwa mu jino jishinda jipashako na bino, byambo bya kuba’mba “bumi mwi anweba bene” bitanyiwa ne mu Binembelo bikwabo bya Kingiliki. Byakumwenako bibiji ke bino, “Ikalai na mukele mwi anweba bene,” kabiji ne “kwiletela mfweto [anweba bene, NW].” (Mako 9:50; Loma 1:27) Mu nembelo yonse ibiji, bino byambo kechi bilumbulula kwikala na bulume bwa kupa bakwetu mukele nangwa kuletela bakwetu mfweto ne. Bino atweba bene. Onkao mambo, byambo byanembwa mu Yoano 6:53 byaamba’mba “bumi mwi anweba bene” bilumbululatu kwikala bumi bwine bwine.

Mu kutongola baana banji ba bwanga amba baji na bumi mwi abo bene, Yesu watongwelemo mubiji wanji ne mashi anji. Kabiji palutwe, kimye kyoatendekeshe Kijiilo kya Nkambo kya Mabanga, watongwele jikwabo mubiji ne mashi anji ne kwambila baana banji ba bwanga batwelele mu lulayañano lupya kuja shinkwa wabula mbizho ne waini. Nanchi kino kilumbulula’mba kanatu bena Kilishitu bashingwa baji mu lulayañano lupya na Yehoba Lesa, bo bonkatu bafwainwa kwikala na buno bumi bwine bwine nyi? Ine. Waubile kikye sapapita mwaka umo kufuma kimye kyoaambile byambo biji mu Yoano 6:53, 54. Onkao mambo, aba boaambileko bibye byambo, kechi bekiyukile kijiilo kya pa mwaka kya kuba na bimpashañano bimenako mubiji wa Kilishitu ne mashi anji ne.

Kwesakana na byaamba Yoano kyapitala 6, patanshi Yesu waesakenye mubiji wanji ku manna, ne kwamba’mba: “Bashakulu benu bajilenga aa manna mungyetu, ne kufwa bafwile. Kano ko kajo kafuma mwiulu, amba, muntu ajeko, abule kufwa. Amiwa ne kajo komi kafuma mwiulu; inge muntu waja ku ko kano kajo ukekalanga na bumi myaka.” Mubiji ne mashi a kwa Yesu anema bingi kukila manna. Mu ñanyi jishinda? Ke na mambo a kuba’mba mubiji wanji wapainwe “mu bumi bwa ba panopantanda,” kuba’mba bakamone bumi bwa myaka.a Onkao mambo, byambo biji mu Yoano 6:53 bya kuba’mba “bumi mwi anweba bene,” byalumbululatu ku bonse—aba baji na luketekelo lwa kuya mwiulu ne boba baji na luketekelo lwa kwikala panopantanda.—Yoano 6:48-51.

Ñanyi kimye baana ba bwanga ba kwa Yesu kyo bekala na bumi mwi abo bene, nangwa’mba kyo bekala na bumi bwine bwine? Ku bashingwa banswanyi mu Bufumu, kino kyubiwa kimye kya lusanguko lwabo lwa kusangwilwa ku bumi bwa mwiulu ne kwikala bantu ba ku mupashi bambulwakufwa. (1 Kolinda 15:52, 53; 1 Yoano 3:2) ‘Mikooko ikwabo’ ya kwa Yesu ikekala mu bwikalo bwine bwine panyuma ya kupwa myaka Kiumbi Kimo ya Bukalama bwanji. Pa kyokya kimye ko kuba’mba bakekala bantu baesekwa, bino monka baikela bakishinka, kabiji bakatelwa amba baoloka bafwainwa kwikala myaka ne myaka mu Paladisa.—Yoano 10:16; Lumwekesho 20:5, 7-10.

[Tubyambo twa mushi]

[Bipikichala pa peja 9]

Bena Kilishitu bakine bonse bakonsha ‘kwikala na bumi mwi abo bene’