Balongo Banungwako Katataka ku Jibumba Jitangijila

PA KISATU lukelo, August 24, 2005, bisemi bya pa Betele mu United States ne ku Canada, byo bafunjilenga kinembelo kya juba kupichila mu kutamba pa vidyo, baumvwine kya kubijika kyawama bingi. Kutendeka pa September 1, 2005, ku jibumba Jitangijila ja Bakamonyi ba kwa Yehoba kwanungilwe balongo babiji. Mazhina abo ke ba, Geoffrey W. Jackson ne ba Anthony Morris III.

Mulongo Jackson watendekele bupainiya mu February 1971, ku jikuji ja Tasmania mu Australia. Mu June 1974, basongwele ba Jeanette. Palutwe kacheche, bonse babiji bebatongwele kwikala bapainiya beikajila. Kutendeka mu 1979 kufika ne mu 2003, baingilanga bumishonale mu Tuvalu, Samoa, ne ku Fiji. Ano ke makuji aji ku South Pacific. Byo bakijinga ku onka ano mapunzha, Mulongo ne Nyenga Jackson baingijile bingi mwingilo wa kutuntulula mabuku alumbulula Baibolo. Kutendeka mu 1992, Mulongo Jackson wajinga mu Kometi ya Musampi ku Samoa, kabiji mu 1996, wajinga mu Kometi ya Musampi ku Fiji. Mu April 2003, mulongo Jackson ne ba Jeanette bayile na kwingijila pa Betele ku United States mu Dipatimenti ya Buntuntuluzhi. Palutwe kacheche, Mulongo Jackson bamutongwele kuba’mba akwashengako Kometi ya Lufunjisho ya Jibumba Jitangijila.

Mulongo Morris naye watendekele bupainiya mu 1971 mu United States. Mu December yenkawa mwaka, wasongwele ba Susan, kabiji batwajijile kwingila bupainiya myaka pepi nobe ina kufikatu ne kimye kyo basemene mwana wa mulume mubeji, ye batumbile’mba, Jesse. Kabiji mu kuya kwa kimye basemene mwana mukwabo, aye bamutumbile’mba, Paul. Mu mwaka wa 1979, Mulongo Morris watendekele jibiji mwingilo wa bupainiya bwa kimye kyonse. Baana babo byo batwelele sukulu, bena kwanji nabo batendekele mwingilo wa bupainiya. Kino kisemi kyayile na kwingijila ku Rhode Island ne ku North Carolina mu United States, kwajinga kukajilwa. Ku North Carolina, Mulongo Morris wajinga mukulumpe wa kijiiji wa kukwachijila, kabiji baana babo babalume bonse babiji nabo batendekele mwingilo wa bupainiya bwa kimye kyonse. Ba Jesse ne Paul bonse babiji byo bafikizhizhe myaka ya kusemwa 19, bebechile na kwingijila ku musampi wa mu United States. Kabiji Mulongo Morris wajinga mukulumpe wa kijiiji. Mu 2002, ba Morris ne ba Susan bebechile ku Betele, ko bayile na kutatula mwingilo wabo wakatataka pa August 1. Mulongo Morris watendekele kwingila mu Dipatimenti ya Mwingilo ku Patterson, kabiji palutwe kacheche watendekele kukwashako Kometi ya Mwingilo ya Jibumba Jitangijila.

Kununga pa bano balongo babiji banungwako katataka, mu Jibumba Jitangijila muji ba C. W. Barber; J. E. Barr; S. F. Herd; M. S. Lett; G. Lösch; T. Jaracz; G. H. Pierce; A. D. Schroeder; D. H. Splane; ne ba D. Sydlik. Balongo bonse baji mu Jibumba Jitangijila ke bena Kilishitu bashingwa.