Ki Ka Kimweka Ku Muntu Umvwe Wafwa?

“Myeo yonse kechi ifwa ne, kubikapotu ne yoya ya bantu babi . . . Imanyikwa mu mujilo wa myaka kwa kubula kufwa kabiji kino kilengela lumanamo lwabo kubula kupwa.”—Byo byaambile nembi wa mu myaka kitota kya bubiji ne busatu C.E., aye Clement wa mu Alexandria

BYONKA biji Clement, aba bonse batundaika lufunjisho lwa kuba’mba helo ke mpunzha ya kumanyikilamo bantu baketekela’mba mweo wa muntu kechi ufwa ne. Nanchi Baibolo utundaika luno lufunjisho nyi? Akimonai Mambo a Lesa byo akumbula ano mepuzho.

Nanchi muntu mutanshi Adama wajinga ubula kufwa nyi? Panyumatu ya kumulenga Adama, Lesa wamupele uno mukambizho amba: “Ku bichi byonse bya mu bujimi wakonsha kujakotu monka mo usakila; kana ku kichi kya kuyuka byawama ne byatama kechi ukajako ne; mambo mu juba jo ukajako ukafwa kine.” (Ntendekelo 2:16, 17) Adama kechi wajinga muntu ubula kufwa ne.

Ki ka kyamwekele kwi Adama panyuma ya kulenga mambo? Lesa kechi wamuchibijile mambo kuba’mba aye ku helo na kumanyikwa myaka ne myaka ne. Baibolo wamwesha Adama byo bamuchibijile mambo kwi Lesa amba: ‘Monka mu jisulwila ja mu kilungi kyobe mo ukamwenanga kajo kobe, poso wabwela ku mushiji jibiji; mambo ku mushiji ko ko bakufumishe; kabiji obewa wi lukungu, ne ku lukungu ko ukabwela.’ (Ntendekelo 3:19) Byambo Lesa byo aambile kechi bimweshapo’mba kuji kibese kimo kya Adama kyapulukile kimye kyo afwile ne.

Nanchi kuji muntu ubula kufwa nyi? Kafwako muntu ubula kufwa ne. Baibolo waamba mu Musapwishi 3:20 amba: “Bonsetu baya kuntu kumotu; bonsetu bafumine ku lukungu; kabiji bonsetu babwela ku lukungu.” Mutumwa Paulo wanembele’mba: “Bundengamambo byo bwatwelele panopantanda ku muntu umo [Adama], ne lufu nalo lwatwelele na bundengamambo, kabiji byonkabyo ne lufu lwakumbene ku bantu bonse, mambo bonse balengele mambo.” (Loma 5:12) Bantu bonse bandengamambo, ne mu jino jishinda bantu bonse bafwa.

Nanchi aba bafwa bayuka nangwa kumvwa kintu nyi? Mambo a Lesa aamba’mba: “Bomi bayuka’mba tukafwa, bino bafu kafwako kyo bayuka ne.” (Musapwishi 9:5) Baibolo waamba pa byo kikala umvwe muntu wafwa kuba’mba: “Ubwela ku mushiji; mu jonkaja juba milanguluko yanji yonaika.” (Salamo 146:4) Umvwe bafu “kafwako kyo bayuka ne,” kabiji ne kuba’mba ‘milanguluko yabo yonaika,’ bakonsha kuyuka byepi’mba babena kumanyikwa mu helo?

Yesu Kilishitu waesakenye lufu ku tulo kechi ku kusendalala saka umvwa kintu kibena kubiwa ne. (Yoano 11:11-14) Nangwa byonkabyo, bamo bakonsha kuba kebapachike ne kwamba’mba, Yesu wafunjishe’mba ku helo kwapyana kabiji bandengamambo bakataiwa mu mujilo wa helo. Twayai tumone Yesu byo aambile pa mambo a helo.