Yesu Kilishitu—Byambo Byanji byo Bimukunza
“Amiwa naishile namba bamone bumi, kabiji namba bekale nabo bwavula.”—YOANO 10:10.
YESU KILISHITU waishile panopantanda na kupana kechi kutambula ne. Kupichila mu mwingilo wanji, wapele bantu bupe bwanema bingi, ko kuba’mba, byambo byasolwele bukine pe Lesa ne kyaswa muchima Wanji. Aba bomvwina bino byambo bakonsha kwikala bwikalo bwawama kyonka kino kimye byonka byakonsha kwitabizha bena Kilishitu bakine bavula lelo jino.a Bino pa byambo byasapwilanga Yesu paji kintu kimo kyanema bingi kyo aubile, bumi bwanji bwalumbuluka bo etupanyijileko. Bwikalo bwetu bwa myaka ne myaka bwaimena pa kumvwa byambo byanji.
Kintu kyapaine Lesa ne Kilishitu Yesu wayukile’mba bakamwipaya ku balwanyi banji. (Mateo 20:17-19) Bino, mu byambo byanji byayukanyikwa biji mu Yoano 3:16, waambile’mba: “Lesa byo ebatemwisha ba panopantanda, wapaine Mwananji yenkawa umo amba, bonse bamwitabila kechi bonaike ne, poso amba bekale na bumi bwa myaka.” Kabiji Yesu waambile’mba wayishile na “kupana mweo wanji [nangwa’mba, bumi bwanji] ke kya kukula bavula.” (Mateo 20:28) Mambo ka o aambijile amba ukapana bumi bwanji mu kifulo kya kwibutambula?
Na mambo a butemwe bukatampe, Lesa wanengezhezhe kupokolola bantu ku bundengamambo bo baswaine ne byafuminemo, ko kuba’mba bumbulwakulumbuluka ne lufu. Lesa waubile kino kupichila mu kutuma mwananji yenkawa umo panopantanda kwiya kufwa lufu lwa bukitapisho. Yesu wakokejile, ne kwitupainako bumi bwanji bwalumbuluka. Luno lunengezho lutelwa’mba bukuzhi, ke bupe bukatampe Lesa bo apa bantu.b Bo buketulengela kwikala na bumi bwa myaka ne myaka.
Byo mwafwainwa kuba Nanchi bukuzhi bupe bwenu nyi? Kino kiji ko muji. Twambe’mba: Fwanyikizhai muntu umo wimupa bupe boakashila mu kabokoshi. Posotu mwibutambula po po bwafwainwa kwikala bupe bwenu. Popamotu, ne Yehoba wapana bukuzhi komuji, bino bwafwainwa kwikalatu bwenu umvwe mwibutambula. Pano mwafwainwa kwibutambula byepi?
Yesu waambile’mba bonka baji na “lwitabilo” mwi aye bo bakatambula bumi bwa myaka ne myaka. Ngikelo yenu yo imwesha lwitabilo lwenu. (Yakoba 2:26) Kwitabila mwi Yesu kilumbulula kwikela monka mwayila bintu byo afunjishe ne byo aubilenga. Pa kuba’mba mube bino, mwafwainwa kuyuka bulongo Yesu ne Shanji. Yesu waambile’mba: “Buno bo bumi bwa myaka, namba bemuyuke anweba, Lesa yenka wa kine, ne Yesu Kilishitu ye mwatumine.”—Yoano 17:3.
Pepi na myaka 2,000 yapitapo, Yesu Kilishitu waambile byambo byapimpula bwikalo bwa bantu panopantanda. Nanchi mukeba kuyukilapo ne bikwabo pa bino byambo ne byo mwafwainwa kumwenamo pamo na balongo benu mu kyonka kino kimye ne myaka ikeya nyi? Bakamonyi ba kwa Yehoba bakemukwasha.
Mitwe yalondelapo ikemukwasha kuyukilapo ne bikwabo pe Yesu Kilishitu, mwanamulume waambile byambo byakonsha kupimpula bwikalo bwenu myaka ne myaka.
[Tubyambo twa mushi]
a Kechi bonse betela amba bena Kilishitu balondela Kilishitu kya kine ne. Bantu balondela Yesu kya kine bekela monka mwayila byo afunjishenga pe Lesa ne nkebelo Yanji.—Mateo 7:21-23.
b Inge mukeba kuyukilapo byavula pa Binembelo byo byaamba pa bukuzhi, monai kitango 5, “Bukuzhi—Bupe Bwa Lesa Bwakilamo Kunema,” mu buku wa Nanchi Baibolo Kine Ufunjisha’mba Ka? wanembwa na Bakamonyi ba kwa Yehoba.