Nkalata Kufuma ku Kyalo kya Madagascar

Waumvwanyikilenga Nobe Lwimbo Wawama

AMIWA ne benakwami twailenga mu mwingilo wetu wakatataka wa bumishonale pa jikuji ja Madagascar. Twashajikilepo bisemi ne balunda netu ne kuketekela’mba Yehoba uketukwasha kwingila bulongo.

Kechi tukalubako kupwila kutanshi ko twatainweko mu kipwilo kyetu kya katataka ne. Mulongo watangijilenga Lufunjisho lwa Kyamba kya Usopa wamwekelenga nobe ubena kutangijila jibumba ja banyimbi. Uno mulaka twamuyukiletu pacheche, kya kuba byambo byaumvwanyikilengatu nobe lwimbo wawama. Papichile kimye kyabaya bingi pa kuba’mba tuyuke byo baambilenga.

Kimye kitanshi kyo naumvwine bwipuzho bwabujile kunembwa mu jifuka, kyandengejile kukumbula na jiwi jasansuka kwakubula nangwa kuntongola ne. Aba baikejile pepi ne amiwa baumvwine, kabiji nasekele saka nakwata maboko pa kanwa. Naumvwine bingi bumvu, pano bino najinga na lusekelo mambo naumvwine byo baambile.

Mu kifulo kya kuba’mba ngikale wakumwenako ne kukwasha bakwetu mu mwingilo, naumvwinenga nobe yami babena kukwasha. Balongo ne banyenga bambujile jishinda jawama kusolomokelamo bantu mu mwingilo wa mu bujimi, kabiji bambujile ne bine byambo bya kwamba ne binembelo byo nafwainwe kwingijisha.

Mvuluka juba jimo jo najinga mu mwingilo, mwanyike wabijikilenga amba, “Vazaha! Vazaha!” Kino kyo kyambo kya mu mulaka wa Malagasy kyo bamba bonse pa kutongola “muntu wafuma mu kyalo kingi.” Twaendeshesheko kuchina amba banyike bakwabo bakeya kubijika byonka byabijikilenga mukwabo. Kepo nsongwalume akajipijile uno mwanyike wabijikilenga. Waambile’mba: “Kechi wafuma mu kyalo kingi ne, wakonsha kwamba mulaka wetu.” Nyenga wa konkakwa ye naingijilenga nanji wandumbulwijile byo baambilenga, mambo baambilenga lubilo kya kuba nakankelwe kumvwa. Nangwa byonkabyo, naumvwine bingi bulongo mambo nayukileko pacheche uno mulaka. Kyapeleleko natendekele kumona nobe ku Madagascar ko kwetu.

Bimye byavula byo naumvwanga mukose, banyike baiyanga na kumfwakesha, kabiji natundaikwanga bingi pa kumona bilungi byabo bya lusekelo nangwa kya kuba kechi naambanga bulongo mulaka ne. Kwikala na bakyanyike mu kipwilo ke mapesho kufuma kwi Yehoba. Nyenga wakyanyike wa jizhina ja Hasina, ye undumbulwilako byambo byo naluba. Umvwe kya kuba bantu bakankalwa kumvwa byo naamba, aye umvwa. Kabiji javula unkwashako inge mbena kweseka kwisamba na balunda nami mu kipwilo, aye wibalumbulwila mo nekitazha.

Amiwa ne benakwami twajinga mu kipwilo kyajinga pepi na kwikyabanya. Kino kyalengejile mafunjisho a Baibolo amo kwiapana ku basapwishi bakwabo, mambo bantu bo nafunjishanga baikalanga mu nyaunda ya kipwilo kyalengelwe katataka. Nyenga umo wañambijile amba ntendeke kufunjisha muntu ye afunjishanga. Nachiine kabiji nakoselepotu namba nkyangye kuyuka mulaka ne, bino aye wakoselekotu na kuntundaika. Wantundaikile’mba Yehoba ukankwasha kufunjisha. Wañambijile mu meso anteka kabiji mu byambo byapela kumvwa amba katatakatu nkatendeke kufunjisha bantu mu jishinda jampelela. Bino byambo byantundaikile bingi.

Kufumatu kyokya kimye, uno muntu ye mfunjisha ubena kuba bingi bulongo. Juba jimo byo najinga pangye, naumvwine saka angita pa jizhina. Wayilenga na bamwatawanji na kunembesha masongola abo. Bamwatawanji nabo batendeka kufunda, kabiji bebikila bikonkwanyi bya ku mupashi byo bakeba kufikizha, kubikapotu ne kikonkwanyi kya kubatizhiwa. Kino kyandetejile bingi lusekelo nangwa kya kuba Yehoba mwine ye ukokela bantu ko aji, kechi atweba ne.

Twafunda bintu byavula bingi mu uno mwingilo wetu wakatataka. Nangwa kya kuba tuvuluka balunda netu ne balongo ku nzubo, tumvwatu nobe twaitapo bamo kuno. Javula twambapo pe abo ku balongo ne banyenga ba kuno, kabiji luno betwipuzha pe abo ne byo baji. Tubena kutengela kimye kikakwatankena pamo “kisemi” kyetu kya ku mubiji ne kya ku mupashi kyo twatana kuno.

Ne lunotu bantu inge babena kwamba ñumvwa nobe “lwimbo.” Pano bino luno ñumvwa byo bamba. Mbena kupembelela kimye kyo nkambanga bulongo byambo byo ñumvwa nobe lwimbo inge bantu babena kwamba, kukila kwambatu bintu byakonsha kubula kumvwa bantu. Yesu waambile’mba: “Kechi mubambishe michima yenu na ja kesha ne: mambo ja kesha jine jikebambisha na byajo.” (Mateo 6:34) Onkao mambo, tusakutwajijila kufunda kyambo kimo kimo. Kabiji pa kino kimye, ntelekeshanga ne kutako muchima pa kwingila na balongo ne banyenga batekanya kabiji betutemwa pa kuba’mba nkambenga byonka byo bamba kuno ku Madagascar.

[Kipikichala pa peja 25]

Nasapwijilenga pamo ne Hasina