KWISAMBA NA BANTU

Nanchi Lesa uta Muchima pa Buyanji Bwetu Nyi?

Uno ke mwisambo Kamonyi wa kwa Yehoba ye akonsha kwisamba na bantu. Twayai tufwanyikizhe kuba’mba Kamonyi wa jizhina ja Malita wafika pa nzubo ya mwanamukazhi wa jizhina ja Sofiya.

PANO NGA LESA WAKONSHA KUSWISHA BYEPI KINTU KYA UNO MUTUNDU KUMWEKA?

Malita: Lelo mbena kwisamba na bantu pa uno talakiti uji na mutwe wa kuba’mba, Nanchi Mukeba Kuyuka Bukine Nyi? Tambulai.

Sofiya: Nanchi uno talakiti ubena kwamba pa bupopweshi nyi?

Malita: Ee mwane. Akitalai pa mepuzho 6 aji pa nkupiko. Ñanyi bwipuzho pa—

Sofiya: Akimanai ponkapo. Mubena kutayatu kimye kwisamba ne amiwa.

Malita: Pano mambo ka o mwaambila byobyo?

Sofiya: Kechi nayuka kana naitabila ne mwi Lesa ne.

Malita: Nasanta bingi pa kwamba biji kumuchima. Pano nkipuzheko, Nanchi kimye kyonse byobyo mumvwa byonka bino nyi?

Sofiya: Ine, Kala nayanga ku chechi. Bino nalekele kala kuyako.

Malita: Eyo. Najikulubako ne kwimubula jizhina, yami Malita.

Sofiya: Ne Sofiya.

Malita: Kyawama bingi.

Sofiya: Nasanta.

Malita: Kechi naiya na kwimukanjikizha kuba’mba mwitabile ne. Nanchi kujipo kimulengela kuzhinauka kuba’mba Lesa koaji nyi?

Sofiya: Ee. Papita ne myaka 17, ba mama bajinga mu mapuso apa mukwakwa.

Malita: Kyatama bingi pa kumvwa byobyo. Bekozhezhe nyi?

Sofiya: Ee, kufumatu kyokyo kimye kechi benda ne.

Malita: Kyatama bingi.

Sofiya: Kino kyo kindengela kulanguluka kuba’mba, Inge Lesa koaji, mambo ka o aswishishe kintu kya uno mutundu kumweka? Mambo ka o aswishisha kuba’mba tuyandenga bibye?

NANCHI KYATAMA KUYUKA ENE MAMBO NYI?

Malita: Byo mubena kulanguluka bijitu bulongo. Umvwe tubena kuyanda kijitu bulongo kulanguluka bya uno mutundu. Mambo ne bantu bakishinka batongolwa mu Baibolo balangulukanga byonkabyo.

Sofiya: Kine nyi?

Malita: Ee mwane. Abya kijitu bulongo kwimubulapo kyakumwenako kimo kya mu Babilolo nyi?

Sofiya: Kijitu bulongo.

Malita: Akimonai byaambile Ngauzhi Habakuka byonka byo kyanembwa pa Habakuka kitango 1 kyepelo 2 ne 3 amba “Anweba Yehoba, moba anga o nkemujijilanga, anweba ne kuñumvwa ne, ne kutama muteto namba: Twavila! anweba ne kwitupulusha ne? Mambo ka o mwaswila’mba mmone bintu byatama.” Nanchi ano mepuzho kechi epasha nao mwaji kwipuzhanga ne nyi?

Sofiya: Ee mwane.

Malita: Lesa kechi wakajipijile Habakuka pa kwipuzha mepuzho a uno mutundu ne, nangwa kumwambila kuba’mba wajinga na lwitabilo lucheche.

Sofiya: Kyawama.

YEHOBA WASHIKWA BUYANJI

Malita: Baibolo ufunjisha kuba’mba Lesa washikwa buyanji kabiji watako bingi muchima.

Sofiya: Mwatazha mwepi?

Malita: Akimonai byo aamba pa Kulupuka 3:7. Mwakonsha kutangapo nyi?

Sofiya: Ee mwane. Pa amba’mba: “Kabiji Yehoba waambile’mba: Kumona namona buyanji bwa bantu bami baji mu Ijipita. Kabiji naumvwa kujila kwabo ko bajila na mambo a bakulumpe bebapa mingilo, mambo nayuka kuyanda kwabo.”

Malita: Nasanta. Kwesakana na kino kinembelo, nanchi Lesa umona inge bantu banji babena kuyanda nyi?

Sofiya: Ee, byobyo kibena kumweka.

Malita: Kabiji kechi wayukatu bintu bimwekela bantu ne. Akimonai byambo byapelako mu kyepelo. Lesa waamba’mba: “Nayuka kuyanda kwabo.” Nanchi bino byambo byafwainwa kwamba Lesa wabula kutako muchima nyi?

Sofiya: Ine, bino.

Malita: Lesa kechi umonatu makatazho o tuji nao ne, bino kimukola bingi ku muchima na makatazho o tupitamo.

Sofiya: Ibyo.

Malita: Byo tubena kulanguluka pa kino, twayai tumone kimye kikwabo bantu ba Lesa kyo bayanjile. Kino kyanembwa pa Isaya 63:9. Lubaji lutanshi lwa kino kyepelo lwaamba’mba: ‘Mu moba onse a lumanamo lwabo wamanamine bingi.’ Nanchi mwakonsha kwamba’mba Lesa kyamukolele bingi ku muchima kimye bantu banji kyo bayanjilenga nyi?

Sofiya: Ee, byo byaamba kinembelo.

Malita: Kishinka ke kya kuba’mba Lesa wituta bingi muchima kabiji kechi umvwa bulongo umvwe ketuyande ne. Umvwe ketupite mu bya malwa, naye kechi umvwa bulongo ne.

PANO MAMBO KA O ASWISHISHA BUYANJI?

Malita: Saka nkyangye kuya ne, kuji kintu kimo kyo nafwainwa kwisamba ne anweba.

Sofiya: Kijitu bulongo.

Malita: Akimonai Baibolo byo itufunjisha pa bulume buji na Lesa. Kyepelo kyo mbena kukeba namba twisambe ne anweba ke kiji pa Yelemiya 10:12. Tangaipo.

Sofiya: Pa aamba’mba: “Aye Lesa wa kine i ye walengele ntanda na bulume bwanji, kabiji wipekajikile pano panshi na mana anji, ne kutanyika jiulu na milangwe yanji.”

Malita: Nasanta bingi. Twayai twisambe pa kino kyepelo. Nanchi Lesa wakebewenga bulume bukatampe pa kuba’mba alenge jiulu ne byonse bijimo nyi?

Sofiya: Ee.

Malita: Umvwe kya kuba’mba Lesa uji na bulume bwa kulenga bino bintu byonse byo tumona, nanchi kechi twakonsha kuketekela kuba’mba uji na bulume bwa kupwisha makatazho etu onse ne nyi?

Sofiya: Ee.

Malita: Akilangulukai pe bainenu jikwabo. Mambo ka o kimukolela ku muchima pa kumona saka bayanda?

Sofiya: Mambo ne batemwa, ke bamama.

Malita: Umvwe kya kuba’mba mwajinga na bulume bwakupwisha lukatazho lobajimo, nanchi kuba mwauba bino ne nyi?

Sofiya: Nakonsha.

Malita: Akilanguluka pa kino byo kiji. Baibolo ufunjisha kuba’mba Lesa uyuka buyanji bo tupitamo, kimukola ku muchima kabiji uji na bulume. Akilangulukai pa byatekanya Lesa pa kubula kupwisha bukiji bukiji buno buyanji.

Sofiya: Kechi nalangulukangapo mu jojo jishinda ne.

Malita: Nanchi kujipo bintu byalengela kubula kupwisha bukiji bukiji makatazho nyi?a

Sofiya: Ee, bino byo kyamwekana.

Malita: Naumvwa foni yenu ibena kujila, nanchi nkeya kimye kikwabo tukatwajijile na kwisamba pa uno mutwe.

Sofiya: Nasanta bingi, nkomvwa bingi bulongo inge mwaiya.b

Nanchi pajipo mutwe wa mu Baibolo ye mwabula kumvwisha nyi? Nanchi mukeba kuyukisha bishinka pa biji byonse byaitabilamo nangwa byubilo bya mu bupopweshi bwa Bakamonyi ba kwa Yehoba? Inge byo byo kiji, kange mukwate ku lusono kwipuzha Bakamonyi ba kwa Yehoba ne. Bakakasuluka kwisamba nenu pa mitwe iji yonse.

[Tubyambo twa mushi]