BUTALA BWA MABUKU BWA PA INTANETI
Kyamba kya Usopa
BUTALA BWA PA INTANETI
Kikaonde
Pa kukebela
  • Bisopelo
  • BAIBOLO
  • MABUKU
  • KUPWILA
  • w13 7/15 pp. 3-8
  • “Tubulai, Abino Bintu Bikamweka Ñanyi Kimye?”

Vidyo ufwamo.

Yakana kushinkuka.

  • “Tubulai, Abino Bintu Bikamweka Ñanyi Kimye?”
  • Kyamba kya Usopa—2013
  • Tumitwe tucheche
  • Byambo Bipashako
  • MALWA AKATAMPE ATENDEKELE ÑANYI KIMYE?
  • ÑANYI KIMYE YESU KYO AKABANYA MIKOOKO NE BAMBUZHI?
  • YESU UKEYA ÑANYI KIMYE?
  • Bufumu bwa Lesa Bwaonauna Balwanyi
    Bufumu bwa Lesa Bubena Kulama!
  • “Kupokololwa Kwenu Kuji Pepi”
    Kyamba kya Usopa Kibena Kubijika Bufumu Bwa Yehoba—2015
  • Mukatwajijile Kwikala ba Kishinka Kimye kya “Malwa Akatampe”
    Kyamba kya Usopa Kibena Kubijika Bufumu Bwa Yehoba (Kya Kufundamo)—2019
  • Kwashainga Balongo ba kwa Kilishitu mu Bukishinka
    Kyamba kya Usopa Kibena Kubijika Bufumu Bwa Yehoba—2015
Kyamba kya Usopa—2013
w13 7/15 pp. 3-8

“Tubulai, Abino Bintu Bikamweka Ñanyi Kimye?”

“Kiyukilo kya kwikalapo kwenu ne kya mpelo ya buno bwikalo kyo kyepi?”—MAT. 24:3.

MUSAKUKUMBULA’MBA KA?

Ñanyi kwipasha kuji pa kufika kubiji kwa bungauzhi bwa kwa Yesu bwaamba pa malwa akatampe?

Nga kishimpi kya mikooko ne bambuzhi kitulengela kumona byepi mwingilo wetu wa kusapwila?

Ñanyi kimye Yesu kyo aambilengapo byo aambilenga pa kwiya kwanji kwatongolwa mu Mateo kitango 24 ne 25?

1. Byonka byaubile batumwa, ne atweba tubena kukebesha kuyuka ñanyi bintu?

YESU byo ajinga pepi kupwisha mwingilo wanji pano pa ntanda, baana banji ba bwanga bakebeshe bingi kuyuka bintu bikamweka kulutwe. Onkao mambo, byo kwashajiletu moba acheche kuba’mba afwe, baana banji ba bwanga bana bamwipwizhe’mba: “Abino bintu bikamweka ñanyi kimye kabiji kiyukilo kya kwikalapo kwenu ne kya mpelo ya buno bwikalo kyo kyepi?” (Mat. 24:3; Mako 13:3) Pa kwibakumbula, Yesu waambile bungauzhi bwaamba pa bintu byavula bingi bwanembwa mu Mateo kitango 24 ne 25. Mu buno bungauzhi, Yesu waambijile jimo bintu byavula byanema bikamweka kulutwe. Byambo byanji byanema bingi kwi atweba mambo ne atweba tukebesha kuyuka bintu biji kulutwe.

2. (a) Pa myaka yavula, ñanyi bungauzhi bo twakebesha kumvwisha mo bwatala? (b) Ñanyi mepuzho asatu o tusakwisambapo?

2 Pa myaka yavula balongo bashingwa batangijila, bafunda ne kulombapo pa bungauzhi ba kwa Yesu bwaamba pa moba apelako. Bakebesha kuyuka kimye kyafikile byambo bya kwa Yesu. Pa kuba’mba tuyuke ñumvwino yetu byo yapimpulwa, tusakwisamba pa ano mepuzho asatu aamba pa “kimye” a kuba’mba, “Malwa akatampe” atendekele ñanyi kimye? Ñanyi kimye Yesu kyo akabanya “mikooko” ne “bambuzhi”? Yesu ‘ukeya’ nangwa’mba ukafika ñanyi kimye?—Mat. 24:21; 25:31-33.

MALWA AKATAMPE ATENDEKELE ÑANYI KIMYE?

3. Kala twalangulukanga’mba malwa akatampe atendekele ñanyi kimye?

3 Pa myaka yavula yapitapo, twalangulukanga’mba malwa akatampe atendekele mu 1914 na Nkondo Itanshi ya Ntanda Yonse ne kuba’mba ‘aa moba beachibileko’ kwi Yehoba mu 1918 kimye kyapwile nkondo, pa kuba’mba bashingwa bashalapo basapwile mambo awama ku bisaka byonse bya bantu. (Mat. 24:21, 22) Kabiji ne kuba’mba mwingilo wa kusapwila inge wapwa, apa bino bufumu bwa kwa Satana bakebonaune. Onkao mambo, twalangulukanga’mba malwa akatampe aji mu bipungu bisatu: Amba atendekele (1914-1918), ano malwa beachibileko (kutendeka mu 1918 kuya ne kulutwe), ne kuba’mba akapwa pa Amagedonyi.

4. Ñanyi kishinka kyalengela kuba’mba tumvwishe bungauzhi bwa kwa Yesu bwaamba pa moba apelako?

4 Pano bino, panyuma ya kupesa pesapo jikwabo pa bungauzhi bwa kwa Yesu, twamwene kuba’mba buno bungauzhi bwa kwa Yesu bwaamba pa moba apelako bukafika jibiji. (Mat. 24:4-22) Patanshi bwafikile mu Yudea kufuma mu mwaka wa 33 C.E. kufika mu 70 C.E., kabiji bukafika ne jikwabo pano pa ntanda ponse mu ano moba etu. Kino kishinka kitulengela kusaabaulapo bulongo ne kumvwisha mwatala mbaji ikwabo ya buno bungauzhi.a

5. (a) Ñanyi kimye kyakatazha kyatendekele mu 1914? (b) Kino kimye kya malwa kyaesakana na ñanyi kimye kya mu myaka kitota kitanshi C.E.?

5 Kabiji twayukile ne kuba’mba lubaji lutanshi lwa malwa akatampe kechi lwatendekele mu 1914 ne. Mambo ka? Mambo bungauzhi bwa mu Baibolo busolola kuba’mba malwa akatampe kechi akatendeka na makondo a byalo ne, bino akatendeka kimye kyo bakalukuka bupopweshi bwa bubela. Onkao mambo, bintu byatendekele kumweka mu 1914, kechi byo byajinga ntendekelo ya malwa akatampe ne, byajingatu “ntatwilo ya bisanso.” (Mat. 24:8) Bino “bisanso” byaesakana na byamwekele mu Yelusalema ne mu Yudea kutendeka mu 33 C.E kufika mu 66 C.E.

6. Ki ka kikamwesha kuba’mba malwa akatampe atendeka?

6 Ki ka kikamwesha kuba’mba malwa akatampe atendeka? Yesu waambijile jimo amba: ‘Byo mukamona kya bunya kileta lonaiko kyaambilepo ngauzhi Danyela kyaimana mwazhila (awa utanga engijishe milangwe pa kuba amba omvwe mwatala kino), kepo aba bonse baji mu Yudea bakanyemene ku mitumba.’ (Mat. 24:15, 16) Kimye kitanshi kyafikile buno bungauzhi, ‘kwimana mwazhila’ kwaubiwe mu 66 C.E., kimye nzhita ya bena Loma (“kya bunya”) kyo yalukukile Yelusalema ne nzubo ya Lesa (mpunzha yamonanga Bayudea amba yazhila). Pa kufika kukatampe kwa buno bungauzhi, kuno “kwimana” kukobiwa kimye United Nations (“kya bunya” kya mu ano moba) kyo akalukuka Kilishitendomu (ye bamona’mba wazhila ku bantu betela’mba bena Kilishitu) ne Babilona Mukatampe yense. Kuno kulukukwa kwalumbululwa ne mu Lumwekesho 17:16-18. Kino inge kyamweka, yo ikekala ntendekelo ya malwa akatampe.

7. (a) Bantu bapulukile byepi mu myaka kitota kitanshi? (b) Ñanyi bintu byo tubena kutengela bikamweka kulutwe?

7 Kabiji Yesu waambijile jimo amba: “Lesa ukeachibako aa moba.” Buno bungauzhi bwa ‘kuchibako moba’ bwafikile kimye kitanshi mu 66 C.E. kimye nzhita ya bena Loma kyo yabwelelemo. Kepo bena Kilishitu bashingwa bajinga mu Yelusalema ne mu Yudea banyemene pa kuba’mba ‘bapuluke’ (Tangai Mateo 24:22; Mala. 3:17) Pano ñanyi bintu byo tubena kutengela bikamweka mu kimye kya malwa akatampe? Yehoba ‘ukachibako’ kulukukwa kwa bupopweshi bwa bubela na United Nations, kechi ukaswisha bupopweshi bwa kine kwibonawina pamo na bupopweshi bwa bubela ne. Kino kikalengela bantu ba Lesa kupuluka.

8. (a) Ñanyi bintu bikamweka inge lubaji lutanshi lwa malwa akatampe lwapita? (b) Ñanyi kimye ukapelako wa mu ba 144,000 kyo akatambula mfweto yanji mwiulu? (Monai byambo bikwabo.)

8 Ki ka kikamweka inge lubaji lutanshi lwa malwa akatampe lwapita? Byambo bya kwa Yesu bimwesha’mba pakapitako kimye, apa bino Amagedonyi ikatendeke. Ñanyi bintu bikamweka mu kikye kimye? Mukumbu wanembwa mu Ezikyo 38:14-16 ne mu Mateo 24:29-31. (Tangai.)b Abino inge byapwa, tukemwena Amagedonyi byo ikafika, ko kuba’mba malwa akatampe po akafika pa kankomo, byonkatu byajinga lonaiko lwa Yelusalema mu 70 C.E. (Mala. 4:1) Kafwako malwa akwabo aesakana na nkondo ya Amagedonyi ne, mambo o malwa akatampe “akyangye kumwekapo kala kufumatu ku ntendekelo ya ba pano pa ntanda.” (Mat. 24:21) Ano malwa inge apwa, Bukalama bwa Kilishitu bwa Myaka Kiumbi Kimo popo bukatendeka.

9. Bungauzhi bwa kwa Yesu bwaamba pa malwa akatampe bulengela bantu ba kwa Yehoba kuba byepi?

9 Buno bungauzhi bwaamba pa moba apelako bwitukosesha bingi. Mambo ka? Mambo bwitulengela kuyuka kuba’mba nangwa tupite mu makatazho a mutundu ka, bantu ba Yehoba mu bujibumba bakapuluka ano malwa akatampe. (Lum. 7:9, 14) Kyakila pa byonse, tusekela mambo pa Amagedonyi Yehoba ukabingisha bumfumu bwanji ne kuzhijika jizhina janji jazhila.—Sala. 83:18; Ezi. 38:23.

ÑANYI KIMYE YESU KYO AKABANYA MIKOOKO NE BAMBUZHI?

10. Kala twalangulukanga’mba kwabanya mikooko ne bambuzhi kwatendekele ñanyi kimye?

10 Pano twayai twisambe pa kimye kikafika lubaji lukwabo lwa bungauzhi bwa kwa Yesu, ko kuba’mba kishimpi kya kwabanya mikooko ne bambuzhi. (Mat. 25:31-46) Kala, twalangulukanga’mba kwabanya mikooko ne bambuzhi kwatendekele mu mwaka wa 1914 ne kuya kulutwe. Kabiji twapwishishe ne kuba’mba aba bakaine byambo bya Bufumu kabiji bafwile malwa akatampe saka akyangye kutendeka bambuzhi, mambo kechi baji na luketekelo lwa lusanguko ne.

11. Mambo ka kwabanya bantu nobe mikooko ne bambuzhi o kwabujile kutendeka mu 1914?

11 Mu 1995, Kyamba kya Usopa kyapesele peselepo jikwabo pa byambo biji mu Mateo 25:31 bya kuba’mba: “Kimye Mwana muntu kyo akeya mu lukumo lwanji pamo na bamalaika bonse, ukekala pa jitanda ja lukumo lwanji.” Kino Kyamba kya Usopa kyaambile’mba Yesu waikele Mfumu wa Bufumu bwa Lesa mu 1914, pano bino, kechi waikele “pa jitanda ja lukumo lwanji” na kuchibila mambo “bisaka byonse bya bantu” ne. (Mat. 25:32; esakanyaiko Danyela 7:13.) Nangwa byonkabyo, kishimpi kya mikooko ne bambuzhi kimwesha kuba’mba Yesu Nchibamambo. (Tangai Mateo 25:31-34, 41, 46.) Na mambo a kuba mu 1914 Yesu kechi wajinga Nchibamambo wa bisaka byonse bya bantu ne, ko kuba’mba kwabanya bantu nobe mikooko ne bambuzhi kechi kwatendekele mu iwe mwaka ne.c Pano Yesu ukatendeka kuchiba mambo ñanyi kimye?

12. (a) Ñanyi kimye Yesu kyo akekala Nchibamambo wa bisaka byonse bya bantu? (b) Ñanyi bintu bikamweka byalumbululwa mu Mateo 24:30, 31 ne mu Mateo 25:31-33, 46?

12 Bungauzhi bwa kwa Yesu bwaamba pa moba apelako busolola kuba’mba Yesu ukekala Nchibamambo wa bisaka byonse bya bantu inge bupopweshi bwa bubela bwaonaunwa. Byonka byo twaambapo mu jifuka 8, bintu bimo bikamweka kyokyo kimye byanembwa mu Mateo 24:30, 31. Inge mwapesa pesa bino byepelo, musakumona kuba’mba Yesu waambijile jimo bintu bikamweka bipasha na byo aambilepo mu kishimpi kya mikooko ne bambuzhi. Nabiji bya kuba’mba, mwana muntu ukeya mu lukumo lwanji na bamalaika; mikoka yonse ya bantu ne bisaka bikeya ko aji; aba bakekala nobe mikooko ‘bakakosa ne kuchinchika’ mambo bakayuka’mba bakekala na “bumi bwa myaka.”d Aba bakekala nobe bambuzhi ‘bakatama miteto,’ na mambo a kuyuka’mba bakafwa “lufu lwa myaka.”—Mat. 25:31-33, 46.

13. (a) Ñanyi kimye Yesu kyo akachibila bantu mambo nobe mikooko nangwa bambuzhi? (b) Kumvwisha buno bungauzhi kusakwitulengela kumonanga byepi mwingilo wetu?

13 Pano twakonsha kupwisha’mba ka? Yesu ukachibila mambo bisaka byonse nobe mikooko nangwa bambuzhi byo akeya mu kimye kya malwa akatampe. Apa bino pa Amagedonyi, kimye malwa akatampe kyo akafika pa kankomo, bantu bakekala nobe bambuzhi “bakafwa lufu lwa myaka.” Kuyuka bino kwitulengela kumona byepi mwingilo wetu? Kwitukwasha kumona buneme bwa mwingilo wetu wa kusapwila. Kufikatu ne malwa akatampe byo akatendeka, bantu bakiji na kimye kya kupimpula ndangulukilo yabo ne kutendeka kwenda mu jishinda jakatazha “jitwala ku bumi.” (Mat. 7:13, 14) Kya kine bantu bakonsha kumwesha byubilo bya bumukooko nangwa bya bumbuzhi. Nangwa byonkabyo, twafwainwa kuvulukanga kuba’mba bunchibamambo bukapelako bwa bakekala mikooko ne bakekala bambuzhi bukobiwa mu kimye kya malwa akatampe. Onkao mambo, tuji na bishinka bya kwitulengela kutwajijila kusapwila bantu byambo bya Bufumu pa kuba’mba bene besajilepo.

YESU UKEYA ÑANYI KIMYE?

14, 15. Ñanyi byepelo bina byaamba pa kwiya kwa kwa Yesu na kuchibila bantu mambo?

14 Nanchi kusaabaula jikwabo bungauzhi bwa kwa Yesu kusakwitulengela kupimpulako ñumvwino yetu ya kimye pakamwekela bintu bikwabo byanema nyi? Buno bungauzhi bwine bwakumbula. Twayai tumone.

15 Mu lubaji lumo lwa bungauzhi bwanji bwanembwa mu Mateo 24:29–25:46, Yesu waambile kikatakata pa bikamweka mu moba akapelako ne mu kimye kya malwa akatampe abena kwiya. Mu bino bitango Yesu waingijishe kyambo kya “kwiya” nangwa’mba kufika jitanu na jisatu.e Pa mambo a malwa akatampe, waambile’mba: “Bakamona ne Mwana muntu sa eya mu makumbi.” “Kechi mwayuka juba Nkambo yenu jo akeshilamo ne.” “Mwana muntu ukeya pa kimye kyo mwabula kuketekela.” Kabiji mu kishimpi kyanji kya mikooko ne bambuzhi, Yesu waambile’mba: ‘Mwana muntu ukeya mu lukumo lwanji.’ (Mat. 24:30, 42, 44; 25:31) Abye byonse byepelo byonse bina byaamba pa kimye kya kulutwe Kilishitu kyo akeya na kuchibila bantu mambo. Ñanyi byepelo bikwabo bina byaamba pa kwiya kwa kwa Yesu?

16. Ñanyi byepelo bikwabo byaamba pa kwiya kwa kwa Yesu?

16 Yesu waambile pa kalume wa kishinka kabiji wa maana amba: “Watokwa awa kalume umvwe pa kwiya Nkambo yanji wamutana na kuba bino.” Mu kishimpi kya bakamwale, Yesu waambile’mba: “Byo bayilenga na kupota, ne musongoshi wafikile.” Mu kishimpi kya matalenta, Yesu washimikizha’mba: “Pa kupitapo moba, nkambo wa bano bakalume waishile.” Mu kyonka kino kishimpi, nkambo yabo waambile’mba: ‘Amiwa pa kwiya umvwe natambula mali ami ne nsubu.’ (Mat. 24:46; 25:10, 19, 27) Nga bino byepelo bina byaamba pa kwiya kwa kwa Yesu byaamba pa ñanyi kimye?

17. Kala twaumvwinanga mwepi kwiya kwatongolwa mu Mateo 24:46?

17 Kala mu mabuku etu twaambile’mba abye binembelo bina byaamba pa kwiya kwa kwa Yesu mu 1918. Akilangulukai pa byambo bya kwa Yesu byaamba pa “kalume wakishinka kabiji wa maana.” (Tangai Mateo 24:45-47.) Twayukile kuba’mba “kwiya” kwatongolwa mu kyepelo 46 kwaamba pa kimye Yesu kyo aishile na kupikita bashingwa mu 1918, kabiji ne kuba’mba kalume bamutongwele kwikala kalama wa bintu bya Nkambo yanji byonse mu 1919. (Mala. 3:1) Nangwa byonkabyo, kupesa pesapo jikwabo pa bungauzhi bwa kwa Yesu kwamwesha’mba twafwainwa kupimpulako ñumvwino yetu ya kimye kikafika mbaji imo ya buno bungauzhi bwa kwa Yesu. Mambo ka o twaambila byobyo?

18. Kupesa pesapo bulongo bungauzhi bonse bwa kwa Yesu kwitulengela kupwisha’mba ka pa mambo a kwiya kwanji?

18 Mu byepelo byatendekelapo saka mukyangye kufika mu Mateo 24:46, kyambo kya “kwiya” kyaamba pa kimye Yesu kyo akeya na kuchiba mambo ne kukambula ba mu mikoka ya bantu mu kimye kya malwa akatampe. (Mat. 24:30, 42, 44) Kabiji byonka byo twajikwamba mu jifuka 12, “kwiya” kwa kwa Yesu kwatongolwa mu Mateo 25:31 kwaamba pa kimye kya kulutwe kya bunchibamambo. Onkao mambo, kyailamo kupwisha kuba’mba kwiya kwa kwa Yesu na kutongola kalume wa kishinka kwikala kalama wa bintu byanji byonse kwatongolwa mu Mateo 24:46, 47, kwaamba pa kwiya kwanji ko akeya kulutwe mu kimye kya malwa akatampe. Kya kine, kupesa pesa bulongo bungauzhi bonse bwa kwa Yesu kwamwesha kuba’mba byepelo byonse bitanu na bisatu byaamba pa kwiya kwanji bitongola kimye kya kulutwe kyo akeya na kuchibila bantu mambo mu kimye kya malwa akatampe.

19. Ñanyi lupimpu lo twisambapo mu uno mutwe, kabiji ñanyi mepuzho akakumbulwa mu mitwe yalondelapo?

19 Ñanyi bintu byo twafunda mu uno mutwe? Ku ntendekelo ya uno mutwe, twajikwipuzha mepuzho asatu a aamba pa “kimye.” Patanshi twajikwisamba kuba’mba malwa akatampe kechi atendekele mu 1914 ne, bino akatendeka kimye United Nations kyo akalukuka Babilona Mukatampe. Kabiji twajikumona kuba’mba bunchibamambo bwa kwa Yesu bwa kwabanya mikooko ne bambuzhi kechi bwatendekele mu 1914 ne, bino bukekalako mu kimye kya malwa akatampe. Kabiji twaji kupezhako kwisamba pa ene mambo o twapwishishe kuba’mba Yesu kechi waishile na kutongola kalume wa kishinka kwikala kalama wa bintu byanji byonse mu 1919 ne, bino ukamutongola mu kimye kya malwa akatampe. Onkao mambo, mepuzho onse asatu aamba pa “kimye” abena kwambatu pa kimye kimo kya kulutwe, ko kuba’mba kimye kya malwa akatampe. Kupimpulako ino ñumvwino kwitulengela kumvwisha byepi mwatala kishimpi kya kalume wa kishinka? Kabiji kwakunza byepi ñumvwino yetu ya bungauzhi bukwabo bwa kwa Yesu bubena kufika mu ano moba apelako? Ano mepuzho anema bingi akakumbulwa mu mitwe yalondelapo.

BYAMBO BIKWABO: (Byafwainwa kutangwa byonka bitangwa tubyambo twa munshi monka mu mafuka mo biji.)

[Tubyambo twa mushi]

a Jifuka 4: [1] Pa kuba’mba muyukilepo byavula, monai Kyamba kya Usopa kya Kibemba kya February 15, 1994, mapa 8-21 ne kya May 1, 1999, mapa 8-20.

b Jifuka 8: [2] Kintu kimo kikamweka kyatongolwa mu bino byepelo ke ‘kukonkanya pamo basalululwa.’ (Mat. 24:31) Onkao mambo, kyamweka kuba’mba bashingwa bonse bakekala pano pa ntanda inge lubaji lutanshi lwa malwa akatampe lwapwa bakaya mwiulu nkondo ya Amagedonyi saka ikyangye kukolomoka. Bino byambo byapimpula byanembelwe mu mutwe wa kuba’mba “Ifipusho Ukufuma ku Babelenga” mu Kyamba kya Usopa kya Kibemba kya August 15, 1990, jipa 30.

c Jifuka 11: [3] Monai Kyamba kya Usopa kya Kibemba kya October 15, 1995, mapa 18-28.

d Jifuka 12: [4] Monai jishimikila jipasha na jino mu Luka 21:28.

e Jifuka 15: [5] Byambo bya kuba’mba “kwiya” ne “kufika” bilumbululatu kyambo kimo kya Kingiliki kya kuba’mba, erʹkho·mai.

[Chati pa peja 4, 5]

KIMYE KYA MALWA AKATAMPE NE KUYA KULUTWE

KUFIKA MU ANO MOBA

MOBA APELAKO

BIKAMWEKA BYAESAKANA NA BYAMWEKELE MU MYAKA KITOTA KITANSHI

United Nations (“kya bunya”) ukalukuka Kilishitendomu (“mwazhila”) ne bupopweshi bwa bubela bonse (Lum. 17:16-18)

KONAUNWA KWA BUPOPWESHI BWA BUBELA

Nzhita ya bena Loma (“kya bunya”) yalukukile Yelusalema ne nzubo ya Lesa (“mwazhila”)

“Kya bunya . . . kyaimana mwazhila.” (Mat. 24:15, 16)

(Monai jifuka 6)

Yehoba ‘ukachibako’ kulukukwa kwa bupopweshi bwa bubela;

Bantu ba Lesa bakapuluka

Nzhita ya bena Loma yachibileko nangwa’mba yalekele kulukukañana; bena Kilishitu mu Yelusalema ne mu Yudea banyemene

“Na mambo a basalululwa, Lesa ukeachibako aa moba.” (Mat. 24:22)

(Monai jifuka 7)

KIMYE KYABULA KUYAKANYIKWA

Yesu ukabanya bantu ba mu bisaka byonse nobe mikooko ne bambuzhi (Mat. 25:31-46)

(Monai mafuka 12, 13)

KIMYE KIKAPITAPO

“Panyuma ya malwa a mu oa moba . . . ” (Mat. 24:29-31)

(Monai jifuka 8)

Yesu ukatongola kalume wa kishinka kwikala kalama wa “bintu byanji byonse” (Mat. 24:46, 47)

(Monai jifuka 18)

Konaunwa kwa bisaka bya bantu (Lum. 16:16)

AMAGEDONYI

Konaunwa kwa Yelusalema

BUKALAMA BWA KILISHITU BWA MYAKA KIUMBI KIMO BWATENDEKA

[Kipikichala pa peja 7]

Kufikatu ne malwa akatampe byo akatendeka, bantu bakiji na kimye kya kupimpula ndangulukilo yabo

(Monai jifuka 13)

    Mabuku a mu Kikaonde (1992-2025)
    Shinkai
    Shinkulai
    • Kikaonde
    • Tuminaiko Bakwenu
    • Byo Mukeba
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Settings
    • JW.ORG
    • Shinkulai
    Tuminaiko Bakwenu