FWENYAI KWIPI NE LESA

“Byubilo Byanji Byamweka Patoka”

Nanchi mwaitabila mwi Lesa nyi? Inge ibyo, nanchi mwakonsha kutongolapo bintu bimo bimulengela kushiinwa kuba’mba ko aji nyi? Kishinka ke kya kuba’mba kuji bintu bimwesha kuba’mba kuji Mulenga uji na bulume, maana ne butemwe. Ñanyi bintu byonkabyo, kabiji bitulengela kuba byepi? Pa kuba’mba tutane mukumbu, akilangulukai pa byambo bya mutumwa Paulo byanembwa mu nkalata yo anembejile bena Kilishitu ku Loma.

Paulo waambile kuba’mba: “Byubilo byanji [aye Lesa] byamweka patoka kufumatu kimye kyo alengele ntanda, mambo bino byubilo byamwekela mu bintu byo alenga, ko kuba amba bamona bulume bwanji bwa myaka ne kuyuka amba ye Lesa. Na mambo a kino, bulaka bwibashinka.” (Loma 1:20) Byubilo byanji bimwekela mu bintu byo alenga byonka byaambile Paulo. Twayai twisambe pa byambo bya kwa Paulo.

Paulo waambile kuba’mba, “kufumatu kimye kyo alengele ntanda.” Mu kino kyepelo, kyambo kya mu Kingiliki kyatuntululwa kuba’mba “ntanda” kechi kilumbulula amba ino Ntanda yo twikalamo ne. Bino kilumbulula amba bantu.a Paulo pano ubena kwamba amba kufumatu kimye bantu kyo balengelwe, bamona byubilo bya Mulenga kupichila mu bintu byo alenga.

Bino biyukilo bijitu konse. Kechi byafyama mu bilengwa ne, bino “byamwekatu patoka.” Kufumatu ku bilengwa bikatampe kufikatu ne ku bilengwa bicheche, byonse bino bimwesha kuba’mba kuji Mulenga uji na byubilo byawama bingi. Nanchi maana engijisha bilengwa kechi asolola kuba’mba kuji Mulenga uji na maana ne nyi? Nanchi tubangabanga tuji mwiulu ne manyaki a pa mema kechi bisolola bulume bwanji ne nyi? Nanchi mitundu ya kajo kawama ko tuja ne bimweka bulongo mintetenga ya juba pa kusela ne pa kuzhika kechi bimwesha byo atemwa bantu ne nyi?—Salamo 104:24; Isaya 40:26.

Nanchi bino byonse biyukilo kechi byamwekeshatu ne nyi? Kyamwekeshatu patoka kuba’mba aba bonse babula kwibimona ne kukana kuba’mba Lesa ufwako “bulaka bwibashinka.” Shayuka umo walumbulula kino mu jino jishinda amba: Fwanyikizhai kuba’mba dalaivwa walengulula kipachi kya pa mukwakwa po banemba kuba’mba “Mukwakwa Wasendukila ku Kipiko.” Kapokola wamwimika kabiji watendeka ne kunemba pepala wa kupainapo mali. Dalaivwa ke akane kuba’mba kechi waji kumona kino kipachi ne. Bino kapokola wakana kumulekelako mambo, na mambo a kuba’mba kipachi kijitu patoka pa bena kumwekanatu ku bonse kabiji dalaivwa meso anji ajitu bulongo. Bino mwayila mizhilo, dalaivwa ye wafwainwa kumona bipachi ne kulondela byo banembapo. Nanchi byobyo kiji ne ku tuyukilo tuji mu bilengwa bya Lesa. Kano “kayukilo” kajitu patoka. Byo tuji bilengwa bilanguluka, tubena kwikamona kano kayukilo. Nanchi kafwako wafwainwa kwamba’mba kechi ne kamwene ne.

Bino buku waamba pa kulengwa usolola ne bishinka bikwabo byaamba pa Mulenga. Kuji buku mukwabo usolola bintu byavula pe Mulenga, ko kuba’mba Baibolo. Inge twatanga biji mu ano mapa, twakonsha kukumbula bwipuzho bwa kuba’mba: Mambo ka Lesa o alengejile ino ntanda pamo ne bantu bekalamo? Kuyuka mukumbu ku buno bwipuzho kwakonsha kwimukwasha kufwenya kwipi ne Lesa awo “byubilo byanji byamweka patoka” mu ntanda mo twikala.

Kutanga Baibolo mu August

Loma 1-16

[Tubyambo twa mushi]

[Mabulañano pa peja 11]

Bilengwa bimwesha amba mulenga ko aji