FUNJISHAINGA BAANA BENU
Lesa Kimukola Bingi ku Muchima—Byo Twakonsha Kumutokesha Ku Muchima
Nanchi bakikufichishapo kala ku muchima kya kuba keukebe ne kujila nyi?—a Atweba bonse twakipitapo kala mu luno lukatazho. Kampepo kyafwainwa ku kulengela kujila ke na mambo a kuba’mba bintu byo baji kukuba byaji kutama bingi. Bantu bamo bakonsha kwamba byambo byatama pe atweba byo wabula ne kuba ne. Nanchi bino byambo byakonsha kukufichisha ku muchima nyi?— Lesa naye kimukola bingi ku muchima inge bantu ke bambe byambo bya bubela pe aye. Twayai twisambe pa kino ne kumona byo twakonsha kuba pa kuba’mba tulengele Lesa kusekela kukila kumufichisha ku muchima.
Baibolo waamba’mba bantu bamo baambanga amba batemwa Lesa bino ‘bamufichishanga ku muchima.’ Kwambatu kine “bamuzhingijishe” Lesa. Pano twayai twisambe pe Yehoba byo kimufichisha ku muchima umvwe twabula kuba byo etubula.
Bantu batanshi Yehoba boalengele pano pa ntanda bamufichishe bingi ku muchima. Bano bantu babiji bebabikile mu Paladisa pano pa ntanda mu “bujimi bwa Edena.” Nga bano bantu babiji bajinga bañanyi?— Adama ye mutanshi bino palondela ne Evwa. Twaya tumone byo bamufichishe Yehoba ku muchima.
Panyuma ya kwibabika mu bujimi bwa Edena, Yehoba wibambijile kuwamishanga buno bujimi. Kabiji Wibabuujile ne kuba’mba bakasema baana ne kwikala mu bujimi nabo kwakubula kufwa. Pano bino, Adama ne Evwa saka bakyangye kusema baana, kwaubiwe kintu kikatampe kyatama bingi. Nanchi wayuka kintu kyo baubile nyi?— Malaika walengejile Evwa kusatukila Yehoba apa bino palondela ne Adama. Twaya tumone akino byo kyajinga.
Malaika wialwile ne kumweka nobe muloolo, ne kwamba kwi Evwa. Evwa waumvwine bulongo bintu byo bamubujile ku muloolo—muloolo wamubujile’mba “mukekala pamo nobe Lesa.” Onkao mambo, Evwa waubile byo bamubujile ku muloolo. Nanchi wayuka kino kintu kyo aubile nyi?—
Evwa wajile kipangwa kya ku kichi Yehoba kyo abuujile Adama kuba’mba kechi ukajeko ne. Lesa saka akyangye kulenga Evwa, wabujile Adama amba: “Ku bichi byonse bya mu bujimi wakonsha kujakotu monka mo usakila; kana ku kichi kya kuyuka byawama ne byatama kechi ukajako ne; mambo mu juba jo ukajako ukafwa kine.”
Evwa wayukile uno muzhilo. Watwajijile na kutajisha ku kino kichi kabiji kyamwekele “bingi bulongo ku meso, . . . waapileko bipangwa, ne kuja wajile. Kabiji panyuma ya kuja kino kipangwa wamupelepo ne Adama “naye wajile.” Pano wakonsha kuyuka kyalengejile Adama kuba bino nyi?— Mambo Adama watemenwe bingi Evwa kukila byo atemenwe Yehoba. Wasajilepo kusangajika mukazhanji kukila kusangajika Lesa. Pano nangwa byonkabyo, kukookela Yehoba kwanema bingi kukila kukookela muntu uji yense.
Nanchi ukivuluka muloolo waambile kwi Evwa nyi? Byonkatu muntu byo akonsha kulenga kilubi kumweka nobe kyamba, ko kuba’mba kuji muntu walengejile yewa muloolo kumweka nobe miloolo yamba. Jiwi ja kwa ñanyi ja aambijilenga mu muloolo?— Jajinga jiwi ja “yenkaye mulolo wa kala, ye batela’mba, Diabola ne Satana.”
Nanchi wayuka byo wakonsha kusangajika Yehoba nyi?— Wakonsha kuba bino kupichila mu kukookela kimye kyonse. Satana waambile kuba’mba wafwainwa kulengela bantu kuba bintu byo akeba aye. Pano bino, Yehoba witutundaika amba: “Mwanami [wamulume nangwa wamukazhi] ,wikale wa mana, usangajike muchima wami, namba mmone mwa kumukumbwila awa uñendeleka.” Satana wendeleka Yehoba. Waamba’mba wakonsha kwalulula bonse ne kuleka kwingijila Lesa. Onkao mambo, usangajikenga Yehoba kupichila mu kumukokela ne kumwingijila. Nanchi ukebikako kuba bino nyi?—
Tanga bino binembelo mu Baibolo wobe
Ntendekelo 1:26-28; 2:15-17; 3:1-6
Lumwekesho 12:9; Byambo bya Mana 27:11
[Tubyambo twa mushi]
a Inge mubena kutanga na mwana, kakishilwa kabena kwimubula’mba mwafwainwa kutulumanako ne kwambila mwana amba akumbule.
[Kipikichala pa peja 14]
[Kipikichala pa peja 15]