MEPUZHO A MU BAIBOLO A KUMBULWA

Masongola akonsha kwikala byepi a lusekelo?

Mafunde aji mu Baibolo aamba pa kwikala balusekelo mu masongola engila mambo afuma kumwine Watendekeshe masongola, aye Yehoba Lesa. Etufunjisha kwikala na byubilo byakonsha kulengela kwikala balusekelo mu masongola ne kwitujimunako byubilo byakonsha kulengela masongola kupwa. Kabiji ifunjisha ne bya kwisamba bulongo pa kuba’mba mwikale balusekelo mu masongola.—Tangai Kolose 3:8-10, 12-14.

Banabalume ne banabakazhi bafwainwa kwinemeka ne kwipa mushingi. Umvwe kya kuba bonse babiji bayuka mutembo ye baji nanji mu masongola, kikebalengela kwikala balusekelo.—Tangai Kolose 3:18, 19.

Bintu ka byakonsha kulengela masongola kubula kupwa

Bantu besongola bakonsha kwikala pamo umvwe kya kuba betemwa. Lesa ufunjisha bya kwitemwa. Aye ne Mwananji, Yesu, baikala bakumwenako bawama baji na butemwe bwa kine.—Tangai 1 Yoano 4:7, 8, 19.

Umvwe kya kuba bamulume ne mukazhi banemeka masongola ne kuyuka kuba’mba ke lunengezho lwa Lesa, bakekalanga pamo. Lesa ukeba bantu besongola kutwajijila na kwikala pamo kabiji kino kilengela kisemi kuzhikijilwa. Masongola akonsha kutwajijila mambo Lesa walengela mwanamulume ne mwanamukazhi ku kwatankana mu kuba bintu. Kabiji wibalengele bantu mu kipasha kyanji, kino kilengela kwitemwa byonka byo etutemwa.—Tangai Ntendekelo 1:27; 2:18, 24.

Umvwe mukeba kuyukilapo byavula monai kitango 14 mu uno buku, Nanchi Baibolo Kine Ufunjisha’mba ka?, wanembwa na Bakamonyi ba kwa Yehoba

Mwakonsha ne kukopolola pa www.jw.org

[Kipikichala pa peja16]

Misambo ya mutundu ka yakonsha kulengela baji mu masongola kwikala balusekelo?