MEPUZHO A MU BAIBOLO A KUMBULWA
Tumwenamo byepi mu lufu lwa kwa Yesu?
Lesa byo alengele bantu, wakebelenga amba bakekalenga myaka ne myaka kwa kubula kukolwa nangwa kufwa. Pano bino, muntu mutanshi aye Adama kechi wakokejile Mulenga ne, kabiji kyalengejile kwela jishuko ja kwikala myaka ne myaka. Byo tuji baana ba kwa Adama, twaswana lufu. (Loma 5:8, 12; 6:23) Lesa wa kine aye Yehoba watumine mwananji, Yesu pano pa ntanda na kwitufwila ne kubwezha bumi bwaelele Adama.—Tangai Yoano 3:16.
Yesu wafwile pa kuba’mba bantu bakekale na jishuko ja kwikala na bumi bwa myaka ne myaka. Mwakonsha kufwanyikizha byepi kwikala myaka ne myaka pano pa ntanda?
Lufu lwa kwa Yesu lwalengela mambo etu kulekelwa ne kwitupa jishuko ja kwikala na bumi bwa myaka ne myaka. Baibolo witubula pa bumi byo bukekala pano pa ntanda kwa kubula kukota, kukolwa ne lufu.—Tangai Isaya 25:8; 33:24; Lumwekesho 21:4, 5.
Twakonsha kuvuluka byepi lufu lwa kwa Yesu?
Juba japeleleko mabanga saka akyangye kufwa, Yesu wakambizhe baana banji ba bwanga kuvulukanga lufu lwanji byo anengezhezhe kijiilo kicheche. Kuvuluka lufu lwa kwa Yesu pa mwaka pa mwaka byonka byo aubile, kwitulengela kulanguluka pe Yesu ne Yehoba byo batemwa bantu.—Tangai Luka 22:19, 20; 1 Yoano 4:9, 10.
Uno mwaka kivuluko kya lufu lwa kwa Yesu kikekalako pa Kimo, pa 14 April panyuma ya kuzhika juba. Mwaitwa kwiya na kutanwako na Bakamonyi ba kwa Yehoba konkako kwenu.—Tangai Loma 1:11, 12.