MEPUZHO A MU BAIBOLO AKUMBULWA

Juba ja Kije jilumbulula ka?

Mu moba anembejilwengamo Baibolo, Lesa waingijishenga mitonyi kupokolola bantu banji ku bebobanga nshiji. (Mitonyi 2:18) Baibolo walumbulula Juba ja Kije jiji ku kulutwe kuba’mba kikekala kimye kya lusekelo mambo Yehoba, Mutonyi wa ntanda yonse ukapokolola bantu bonse ku nshiji.—Tangai Salamo 96:12, 13; Isaya 26:9.

Lesa watongola Yesu kuba’mba ye ukachibila mambo bantu bonse, bomi ne bafu. (Byubilo 10:42; 17:31) Bantu bavula bafwa kwa kubula kuyuka Lesa. Kimye kya Juba ja Kije, Yesu ukasangula bano bantu bonse pa kuba’mba bakayuke Lesa ne kumutemwa. —Tangai Byubilo 24:15.

Mambo ka Juba ja Kije o jikekela myaka 1000?

Mu kimye kya myaka 1000 bafwa bakasangulwa. (Lumwekesho 20:4, 12) Bakakebewa kwikala na kimye kya kufunda mashinda a Lesa ne kumukookela. Bintu bilanguluka bantu byapusana bingi na byaamba Baibolo. Aye waamba’mba bantu bakebachibila mambo monka mwayila bintu byo bakobanga panyuma ya kusangulwa.—Tangai Loma 6:7.

Kabiji Baibolo waamba ne pa juba ja lukabisho jikafika bukiji myaka 1000 saka ikyangye kutendeka. Jino juba najo jitelwa’mba mpelo, byonkatu byo bejilumbulula mu mitwe yafumako iji mu uno magazini. Pa jo ja juba, Lesa ukafumyapo bonse babula kumwakamwa, ko kuba’mba bantu babi. (2 Petelo 3:7) Onkao mambo, twafwainwa kutako muchima pa kuba’mba tumweshenga byo twamutemwa Lesa.—Tangai 2 Petelo 3:9, 13.