“Bupe bo Natambwile Bwanemene Bingi”

Abino byo byaambile nsongwakazhi wa myaka 13 ye bapele ka kabwa ka bupe. Mwanamukazhi waya bingi nkuwa mu bya busulu naye bamupele kompyuta ku bashanji saka akiji ku sukulu. Abuno bupe bwamukwashishe bingi mu bwikalo bwanji. Kabiji mwanamulume wasongwele katataka byo bamupele bupe ku mukazhanji byo bavulukilenga juba jo besongwele, wanemekele bingi buno bupe.

Pa mwaka pa mwaka, bantu bavula bataya kimye na kukeba bupe bo bafwainwa kupa mulunda nabo nangwa mulongo wabo pa bimye bya kisangajimbwe. Bapana bupe bomvwa bingi bulongo, inge muntu waamba byambo nabiji biji peulu panyuma ya kutambwila bupe. Nga anweba muba byepi inge bemupa bupe? Nanchi mwakonsha kutemwa kupana bupe nangwa kutambwila bupe bwanema nyi?

Bupe bwa uno mutundu bwanema bingi, mambo bulengela muntu wibutambula ne wapana kumvwa bingi bulongo. O ene mambo Baibolo o yaambila’mba: “Mu kupana mufuma lusekelo lukatampe kukila mu kutambula.” (Byubilo 20:35) Twikala bingi na lusekelo inge muntu wanemeka bupe bo twamupa.

Pano bupe bwenu bwakonsha kuletela byepi lusekelo muntu? Inge kya kuba kechi muji na bupe bwakonsha kunemeka muntu ne, mwakonsha kuba byepi pa kuba’mba bupe bwenu buneme?