Mambo Ka O Tukotela Ne Kufwa?

Lesa waambijile Adama amba: “Mu juba jo ukajako, kine ukafwa.” (Ntendekelo 2:17) Inge kya kuba Lesa walengele Adama ne Evwa kuba’mba bakakota ne kufwa, inge kechi wibakainye kuja ku kino kichi ne. Adama wayukile’mba inge akabule kuja ku kino kichi, ukatwajijila kwikala na bumi.

Adama ne Evwa kechi bakajilwe nangwa kufwa nzala pa kuba’mba baje ku kyokya kichi ne, mambo mu bujimi mwajinga bipangwa byavula bibapele Lesa. (Ntendekelo 2:9) Adama ne Evwa inge baji babujile kuja ku kino kipangwa, inge bamwesheshe lukookelo lwabo kwi Lesa wibapele bumi. Kabiji inge bamwesheshe’mba Lesa ye yenkatu uji na luusa lwa kwibatangijila.

MAMBO KA ADAMA NE EVWA O BAFWIJILE?

Pa kuba’mba tuyuke kyalengejile Adama ne Evwa kufwa, twayai twisambe pa kyamwekele mu bujimi bwa Edena kitukunza atweba bonse. Satana Diabola waingijishe muloolo pa kubepa bubela bwafitatu bwii. Baibolo waamba’mba: “Kabiji muloolo wajimukile kukila banyama bonse ba mungye Yehoba Lesa bo alengele. Onkao mambo, muloolo washikishe mwanamukazhi amba: ‘Nanchi Lesa kine wimwambijile’mba kechi mwafwainwa kuja ku bichi byonse bya mu bujimi nenyi?’”—Ntendekelo 3:1.

Evwa wakumbwile’mba: “Twakonsha kuja ku bipangwa bya ku bichi bya mu bujimi. Bino ku kipangwa kya ku kichi kiji pakachi ka bujimi, Lesa waambile’mba, ‘Kechi mwafwainwa kujako ne, nangwa kukwatakotu ne; mambo umvwe mwauba bino, mukafwa.’” Kepo muloolo aambile’mba: “Kine kechi mukafwa ne. Mambo Lesa wayuka’mba mu juba jo mukajako ku kino kichi, meso enu akalaba kabiji mukekala nobe Lesa mu kuyuka byawama ne byatama.” Pa kwamba bino, Satana walumbulwilenga’mba Yehoba wa bubela kabiji wafilenga bintu byawama ku bansemi betu batanshi.—Ntendekelo 3:2-5.

Evwa waswile byaambilenga muloolo. Wamwene kino kichi amba kyawama kujako. Kabiji kyamwekelenga bingi bulongo. Onkao mambo, waapileko kipangwa ne kuja. Kabiji Baibolo waamba’mba: “Mwatawanji byo aishile, wamupelepo ne aye wajiile.”—Ntendekelo 3:6.

Kintu kyaubile ba Adama ne Evwa kyakozhezhe bingi Lesa ku muchima, pa kumona baana banji bo atemenwe bingi bamusatukila kya nshiji. Lesa waubilepo byepi? Yehoba waambijile Adama amba: “Ukabwela ku mushiji, mambo ku mushiji ko ko wafumine. Mambo wi lukungu ne ku lukungu ko ko ukabwela.” (Ntendekelo 3:17-19) Onkao mambo, “myaka yonse Adama yo aikele na bumi yajinga 930, ne kufwa wafwile.” (Ntendekelo 5:5) Adama byo afwile kechi wayile mwiulu nangwa kutwajijila kwikala na bumi ku mpunzha ikwabo ne. Mambo saka bakyangye kumulenga kwi Yehoba, kechi wajingako ne. Onkao mambo, ne byo afwile wabwelele ku lukungu ko bamufumishe. Walekele kwikalako. Akino kintu kyatamine bingi.

ENE MAMBO BANTU O BABUJILA KULUMBULUKA

Ba Adama ne Evwa byo basatukijile Lesa kya nshiji, balekele kwikala balumbuluka kabiji kechi bakonsheshe kwikala na bumi bwa myaka ne myaka ne. Bino bundengamambo bwabo kechi bwapelejiletu pe abo bonka ne. Baana bo batendekele kusema nabo baswaine bundengamambo. Pa Loma 5:12 paamba’mba: “Byonkatu bundengamambo byo bwatwelele pano pa ntanda mu muntu umo [Adama], ne lufu nalo lwaishijile mu bundengamambo, byonkabyo lufu lwakumbene ku bantu bonse mambo bonse balengele mambo.”

Baibolo waamba’mba bundengamambo ne lufu ke “kisapi kyapombakanya bantu bonse,” kabiji amba “kisapi kyavweta bisaka byonse bya bantu.” (Isaya 25:7) Kino kisapi kyapombakanya bantu bonse kiji nobe bwishi bwakutankanatu konse, kabiji kafwako wakonsha kwibunyema ne. Atweba bantu bonse tufwa “na mambo a kwa Adama.” (1 Kolinda 15:22) Twakonsha kwiipuzha bwipuzho bwaipwizhepo mutumwa Paulo amba: “Ñanyi ukampokolola ku uno mubiji ubena kuya ku lufu?” Nanchi kuji wakonsha kwitupokolola nyi?—Loma 7:24.