Mwakonsha Kwikala Byepi Bwikalo Bwawama?

BWIKALO ano moba kechi buji byonka Lesa byo akebelenga’mba bantu bakekalenga ne. Lesa wakebelenga’mba mu ntanda mukekalenga bantu bakookela bumfumu bwanji ne kuba’mba bakamwenenga lusekelo mu kukookela lutangijilo lwanji ne kwikala na byubilo byo ajipo nabyo. Wakebelenga’mba bakekalenga pamo na lusekelo mu bisemi byabo, kufunda bintu byavula ne kwalula ntanda yonse kwikala paladisa.

LESA WALAYA’MBA BWIKALO PANO PA NTANDA BUKEKALA BYONKA BYO AKEBELENGA PATANSHI

• “[Ukapwisha] nkondo pa ntanda ponse.”—Salamo 46:9.

• ‘Kimye kyatongolwa kikafika kya konauna boba babena konauna ntanda.’—Lumwekesho 11:18.

• “Kafwako muntu nangwa umo ukekala mu kyalo ukamba’mba: ‘Nakolwa’ ne.”—Isaya 33:24.

• “Kabiji bantu bami basalwa bakamwenamo lusekelo mu mingilo yo bakengilanga.”—Isaya 65:22.

Buno bungauzhi bukafika byepi? Lesa watongola Mwananji aye Yesu kwikala Mfumu wa kafulumende waoloka wa mwiulu ukalamanga pano pa ntanda ponse. Baibolo utela uno kafulumende amba, Bufumu bwa Lesa. (Danyela 2:44) Kabiji Baibolo waamba pe Yesu amba: “Lesa ukamupa jitanda . . . , kabiji ukekala Mfumu.”—Luka 1:32, 33.

Yesu byo ajinga pano pa ntanda, waubile bya kukumya byavula bingi byamwesheshe kuba’mba kimye kyo akekala Mfumu, tukekalanga bwikalo bwawama bingi kukila byo tubena kwikala ano moba.

YESU WAMWESHESHE BINTU BYAWAMA BYO AKOBILA BANTU

• Wabukilenga bikola byapusana pusana, kabiji kino kyamwesheshenga’mba ukafumyapo bikola byonse pano pa ntanda.—Mateo 9:35.

• Wazhindamikile luvula pa kalunga ka mema, kabiji kino kyamwesheshe’mba byo akalamanga, kechi kukekalanga bya malwa bipulumukakotu ne.—Mako 4:36-39.

• Wajiishishe bantu bavula bingi bajinga na nzala, kabiji kino kyamwesheshe kuba’mba ukapanga bantu bintu byonse byo bakajilwa mu bwikalo.—Mako 6:41-44.

• Waalwile mema ke binyu pa kijiilo kya masongola, kabiji kino kyamwesheshe kuba’mba ukapanga bantu bintu byo bakeba pa kuba’mba basangalale.—Yoano 2:7-11.

Mwafwainwa kuba byepi pa kuba’mba mukekalenga buno bwikalo bwawama Lesa bo alaya bantu bamutemwa? Kuji “jishinda” jo mwafwainwa kwendamo. Baibolo walumbulula jino jishinda amba ke “jishinda . . . jitwala ku bumi kabiji bejitaana bachechetu.”—Mateo 7:14.

BYO MWAKONSHA KUTAANA JISHINDA JAYA KU BUMI

Jishinda jaya ku bumi jo jepi?Lesa waamba’mba: “Amiwa yami Yehoba Lesa wenu, yenka wimufunjisha kuba’mba mumwenemo, yenka wimutangijila mu jishinda jo mwafwainwa kuyamo.” (Isaya 48:17) Inge mwakookela luno lujimuno ne kwenda mu jino jishinda, mukekala bwikalo bwawama bingi.

Yesu waambile’mba: “Amiwa yami jishinda ne bukine ne bumi.” (Yoano 14:6) Inge ketukookele bukine bwafunjishanga Yesu ne kuba bintu byo aubanga, tukafwenya kwipi ne Lesa ne kwikala bwikalo bwawama.

Mwakonsha kutaana byepi jishinda jaya ku bumi? Lelo jino kuji bupopweshi bwavula bingi, bino Yesu witujimwineko amba: “Kechi bonse bañambila’mba, ‘Nkambo, Nkambo,’ bakatwela mu Bufumu bwa mwiulu ne, kana yenka uba kyaswa muchima wa Tata wa mwiulu ye ukatwelamo.” (Mateo 7:21) Waambile ne kuba’mba: “Mukebayukila ku bipangwa byabo.” (Mateo 7:16) Baibolo wakonsha kwimukwasha kuyuka bupopweshi bwa kine ne bwa bubela.—Yoano 17:17.

Mwakonsha kutendeka byepi kwenda mu jishinda jaya ku bumi? Kwenda mu jishinda jaya ku bumi mwavwangwa kuyuka mwine Nsulo ya bumi: Nsulo ya bumi ye ñanyi? Jizhina janji ñanyi? Ñanyi byubilo byo aji nabyo? Ñanyi bintu byo abena kwitubila? Kabiji ñanyi bintu byo akeba’mba tubenga?a

Lesa ukeba kechi wakebelengatu amba bantu bakengilenga, kuja, kukaya ne kusema baana ne. Bino Mulenga wetu wakebelenga ne kuba’mba tumuyuke ne kwikala balunda nanji. Twakonsha ne kumwesha byo twamutemwa inge ketube kyaswa muchima wanji. Yesu waambile’mba: “Pa kuba’mba bakekale na bumi bwa myaka ne myaka, bafwainwa kwimuyuka anweba Lesa yenka wa kine.”—Yoano 17:3.

KINTU KITANSHI KYO MWAFWAINWA KUBA

Pa kuba’mba mutokeshe Lesa ku muchima, mwafwainwa kupimpulako bintu bimo mu bwikalo bwenu. Kino kyakonsha kumweka kukatazha. Bino inge mwauba bino, bwikalo bwenu bukawama bingi. Bakamonyi ba kwa Yehoba bakonsha kwimukwasha kutaana mikumbu ya mepuzho anema aamba pe Lesa. Bakonsha kutendeka kwimufunjisha Baibolo pa kimye kyenu ne mpunzha yo mwasala. Mwakonsha kuya pa keyala wetu wa www.jw.org ne kulomba wa kwimufunjisha.