“Ñumvwe Byepi Pabula ne wa Kundumbulwila?”

¹ Filipai musapwishi byo aipwizhe ntungu mwina Etiopya umvwe waumvwine byo atangilenga mu Kyambo kya kwa Lesa, uno ntungu wakumbwile kuba’mba: “Ñumvwe byepi pabula ne wa kundumbulwila?” Filipai mu lusekelo wamukwashishe kumvwisha ino mbila yawama pe Yesu, akyo kyalengele uno ntungu kubatizwa ponkapotu. (Byu. 8:26-38) Filipai waumvwijile mukambizho wa kwa Yesu wa kuba’mba ‘kalengai ba mu mikoka yonse ya bantu baluke ke bana ba bwanga, kwibabatizha ne kwibasambisha.’— Mat. 28:19, 20.

² Twafwainwa kumvwina mukambizho wa kulenga bana ba bwanga, byonka byaubile Filipai. Nangwa byonkabyo, kechi javula jo tumona bantu bo tusambijisha Baibolo kununguluka lwa ku mupashi mu kupelawizha byonka byaubile ntungu mwina Etiopya ne. Awa ntungu, waalukile mu Yuda wayukile binembelo, wajinga na muchima wa kumvwina kabiji wakebewengatu kwitabila kuba’mba Yesu ye Mesia walayiwe. Kyashupa bingi umvwe bo tufunjisha kechi bayuka bya mu binembelo ne, nangwa umvwe bapasuka kupichila mu mafunjisho a bupopweshi bwa bubela, nangwa umvwe banemenenwa na makatazho abo bene. Kika kiketukwasha kukonsha kutangijila basambi ba Baibolo ku kwipana ne lubatizhilo?

³ Yukai Kukajilwa kwa ku Mupashi kwa Basambi ba Baibolo: Kya mukachi kya mu Butumwa Bwetu bwa Bufumu bwa mu Kibemba bwa May 1999 kyaambile pa bula bwa kimye bo twakonsha kwingijisha mu kusambijisha bantu, kwingijisha buloshuwa wa Nanchi Lesa Ukebaka ne buku wa Kuyuka. Kyakambizhe kuba’mba: “Kyanema bingi kupima kimye kya jisambijilo kwesakana na bwikalo ne mana a musambi ... Kechi tubena kukeba kujimuka kwa musambi kwitulengela kusambijisha lubilo-lubilo na mambotu a kukeba kupwisha bukiji ne. Musambi uji yense ukebewa kitendekesho kyakosa kya lwitabilo lupya kyo atana mu Kyambo kya kwa Lesa.” Onkao mambo, kechi kyawama kufunjisha bukiji-bukiji mu buku wa Kuyuka na mambotu a kukeba kupwisha buku mu bañondo batanu na umo ne. Kyakonsha kukebewa kimye kyakilaila pa bañondo batanu na umo pa kukwasha bantu bamo kununguluka kufika ku lubatizhilo. Byo mutangijila jisambijilo kila-mulungu, ingijishai kimye kyafwainwa pa kuba’mba mukwashe musambi kumvwisha ne kwitabila byo abena kufunda mu Kyambo kya kwa Lesa. Kimye kimo, milungu ibiji nangwa isatu yakonsha kukebewa pa kuba’mba mupwishe kyapitala kimo kya mu buku wa Kuyuka. Kino kyakonsha kulengela musambi kwikala na kimye kya kutanga ne kulondolola bulongo binembelo byamweshiwa.— Lo. 12:2.

⁴ Nangwa byonkabyo, kyafwainwa kwikala byepi umvwe pa nyuma ya kupwisha buku, mwamona kuba’mba musambi kechi wafika pa kuyuka bukine nangwa’mba kechi wafikwa pa muchima kuba’mba alondele kine ne kwipana kwi Lesa ne? (1 Ko. 14:20) Kika kikwabo kyo mwafwainwa kuba pa kutangijila yewo muntu ku bumi bwa myaka ne myaka?—Mat. 7:14.

⁵ Ikushai Kukajilwa kwa ku Mupashi kwa Musambi wa Baibolo: Umvwe kyamweka kuba’mba awo muntu ubena kununguluka, nangwa kyakuba ubena kununguluka pachepache, kabiji ubena kumvwisha byo abena kusambijila, twajijilai na jisambijilo mu buku wa bubiji pa nyuma ya kupwisha buloshuwa wa Nanchi Lesa Ukebaka ne buku wa Kuyuka. Kino kechi kyakonsheka mu bimye byonse ne, bino inge kyakonsheka twajijilai na jisambijilo mu buku wa Abaikatana, nangwa Icebo ca kwa Lesa. Basapwishi bavula baji na ano mabuku a kyabo kyabo o bakonsha kwingijisha umvwe kipwilo kifwao. Kimye kyonse, jisambijilo jafwainwa patanshi kutangijilwa mu buloshuwa wa Nanchi Lesa Ukebaka ne buku wa Kuyuka. Nangwa kya kuba’mba musambi wabatizwa ukyangye kupwisha buku wa bubiji ne, Jisambijilo ja Baibolo, kubwelako, ne kimye kyaingijishiwa pa kutangijila jisambijilo byafwainwa kubelengwa ne kuba lipoti.

⁶ Nanchi kino kyatala mu kuba’mba babatizwa katataka bino bafunjiletu buku umo bafwainwa kukwashiwa kufunda buku wa bubiji nyi? Bino kechi kyafwainwa ne. Nangwa kikale byonkabyo, kampe bakoka nangwa apo kampe kechi banunguluka mu bukine ne, kabiji kampe bakonsha kwiumvwa kuba’mba bakeba kukwashiwa pa kuba’mba bengijishe byo bafunda mu bukine ku kipimo kikatampe mu bwikalo bwabo. Mwafwainwa kwisamba na utangijila mwingilo wa mu bujimi saka mu kyangye kutendeka jibiji jisambijilo ku musapwishi wabatizhiwa. Onkao mambo, umvwe mwayukapo bamo bafundanga kala mu buku wa Kuyuka bino babujile kufika ku kwipana ne lubatizhilo, mwafwainwa kwisamba nabo pa kuba’mba mumone umvwe mwakonsha kutendeka kwibasambisha Baibolo jibiji.

⁷ Kutesha mana pa kila-kasekela ye tusambijisha ke kayukilo ka butemwa bwa Bwina Kilishitu. Kikonkwanyi kyetu kya kukwasha musambi kuba’mba afike pa kumvwisha bya bukine bya mu Kyambo kya kwa Lesa. Apa bino ekale waimana bulongo mu bukine ne kwipana kwi Yehoba, kwipana ako kumweshiwa kupichila mu lubatizhilo lwa mu mema.— Sala. 40:8; Efi. 3:17-19.

⁸ Nanchi muvuluka kyamwekele pa nyuma ya kubatizhiwa kwa kwa ntungu mwina Etiopya nyi? “Wiyijile mu jishinda janji na lusekelo” byo aalukile ke musambi mupya wa kwa Yesu Kilishitu. (Byu. 8:39, 40) Shenu abya netuwa ne bo tukonsha kutangijila mu jishinda ja bukine tutane lusekelo lukatampe mu kwingijila Yehoba Lesa—lelo jino ne myaka ne myaka!