Ubai Byawama Kabiji Bakemutota!
1 “Nkyangye kumonapo bantu ba mutende nobe babo ne.” “Kiine bano bantu bawama bingi.” Bino byo byambo bimo byaambile bantu panyuma ya kupwila kwa nkambi kwa mwaka wapwa, kutongola byubilo byetu byawama byotuji nabyo mu jibumba. (Mana. 27:2; 1 Ko. 4:9) Lutotelo lwa uno mutundu luya kwi Yehoba. (Mat. 5:16) Uno mwaka tukekala na jishuko jikwabo jawama ja kutotelamo Lesa pa Kupwila kwa Nkambi kwa “Bafunjishi ba Mambo a Lesa.”
2 Pa mwaka pa mwaka tuvululwako kumwesha byubilo byawama pa kupwila kwa nkambi. Mambo ka? Mambo byubilo, mvwajilo ne misango ya bantu ba ku kyalo byo bibena kuya na kutaminakotu kikupu, pano atweba kechi tukeba kwendela monka mo bendela abo ne. Kechi tukeba konauna byubilo byetu byawama ne. (Efi. 2:2; 4:17) Twayai tulamenga ino mikambizho yalondelapo.
3 Ubai Byawama pa Kupwila kwa Nkambi: Kimweka kuba’mba bamo batanwa ku kupwila bakana kumvwañana na baasha, kimye kimo ne kwibambila mukeyu. Byubilo bya kwilundumika kechi byawama ne, kechi biletapo nangwa lukumo kwi Yehoba Lesa ne. Onkao mambo, twafwainwa kwikala na butemwe, butekanye ne lumvwañano.—Nga. 5:22, 23, 25.
4 Pa kupwila kumo kumo, tumona balongo ne banyenga banyema, benda bashinjika bakwabo kuya na kulwila pa kwikala “pawama.” Na mambo a byubilo bya uno mutundu bamo bekozha ne kwikozha. Kyawama kusenda tukajo twapela-pela twa kuja pachaile, kechi kyawama kusenda muzema wa kajo ne kwala matebulu kya kuba byaaluka pano ke kijiilo pa mapunzha pa kwimikila myotoka ne. Bino byakonsha kumweka nobe bijiilo bya ku kyalo bikalako javula mu bibanza bya makayo.
5 Ubai Byawama mu Mvwajilo ne Nzañwino Yenu: Panyuma ya kupwila kumo kwa nkambi kwa mwaka wapwa, mukulumpe wa banembeshi ba pepala wa byambo umo wanembele’mba: “Byubilo bya Bakamonyi bene ke kintu kyawamineko bingi. Byo kyawaminepo pa kumona bantu bavula sabekinjika. Bisemi byavula byapusana-pusana byatwelelenga mu kipaka sabyatekanya bulongo ne kuvwala kipale. Byubilo byabo byapusene bingi na byubilo bya bantu bavula batwela mu kipaka. Kya kine, Bakamonyi bapusenshatu na mabumba a bantu bangi. Mambo kimye kyonse tumona bantu boba byabula kuyilamo... . Kinetu, Bakamonyi jo jibumba jimo jawama bingi.” Onkao mambo twayai tumone kuba’mba mvwajilo ne nzañwino yetu kechi yatamisha buwame bwa ku mupashi pa kupwila kwetu ne.—Fili. 1:10; 1 Timo. 2:9, 10.
6 Ubai Byawama pa Lubatizhilo: Babena kuya na kubatizhiwa bafwainwa kunemeka lubatizhilo. Bafwainwa kuvwala bya kuvwala bya mushingi byabula kupulangila pa kwibabatiza, mambo kino kyo kimwesha kuba’mba banemeka lubatizhilo. Bafunda Baibolo saka bakyangye kuya ku kupwila kwa nkambi, kyawama bebafunjisha kupitulukamo nabo pamo mutwe wa “Mepuzho Kufuma ku Batanga” mu Kyamba kya Usopa kya Kibemba, April 1, 1995.
7 Mvwajilo, nzañwino pamo ne byubilo bya bwina Lesa bishimuna lwitabilo lwetu lwa bwina Kilishitu kabiji bilengela bantu bakishinka kuyuka bukine kwakubula lukatazho. Onkao mambo twayai, ‘tubenga kyawama’ ne kutakaikwa pa kutanwa ku Kupwila kwa Nkambi kwa “Bafunjishi ba Mambo a Lesa.”—Loma 13:3.
8 Kunengezha Bintu “na Mushingi ne Mobyalondakena”: Pa kuba’mba kupwila kwa nkambi kwikaleko, pekala kwingila na ngovu. Balongo babena kutangijila kupwila banengezha mpunzha pa kupwila ne mwa kulaala. Bantu umo umo ne bisemi bimo benengezhezha bene byo bakenda ne mwakukalaala. Kabiji bipwilo bisalululapo balongo ne banyenga bamo bakwingila mu madipatimenti a pa kupwila kwa nkambi. Kikonkwanyi ke kya kumona kuba’mba ‘bintu byonse byaubiwa na mushingi ne mo byalondakena.’—1 Ko. 14:40.
9 Byo mubena kwingijila pamo na balongo babena kunengezha kupwila kwa nkambi yukai’mba, pa kuba’mba banengezhe bino papita bañondo nangwa myaka. Balongo bavula bengila kimye kikatampe na kunengezha bintu amba bikale bulongo. Kino kyavwangamo kusonkela mapunzha a kupwilapo, kukeba bipe byakwingijisha ne kukeba bamingilo bakwingila. Kunengezhezha jimo kwa uno mutundu mufuma mapesho a ku mupashi ku bonse. Twakonsha kuba byepi pa kuba’mba netuwa tukwasheko?
10 Kwatankanai na Lunengezho Lonse: Kyanema bingi atweba bonse kukwatankena pamo na lunengezho lwa kupwila kwa nkambi. Byo tuji bamingilo ba Yehoba tuji na jishuko ja ku mupasha mu byonse byo tuba. Kino kyavwangamo kunengezha ne kuya na kutanwa ku kupwila kwa nkambi kubiwa mu jizhina ja Lesa. Vulukai kuba’mba, aye “kechi ye Lesa wa kiwowo ne, ye wa mutende.” (1 Ko. 14:33) Onkao mambo, twayai tumone kuba’mba bonse babena kwitumona bayukenga’mba Yehoba byo aji, pa kumona byubilo ne misango yetu byotubena kwinengezha ne kuya na kutanwa ku kupwila kwa nkambi kwa “Bafunjishi ba Mambo a Lesa.” Bantu bakishinka betumona bakayuka kuba’mba kipwilo kya bantu ba Yehoba kinengezha bintu mu “mushingi ne mo byalondakena.”—Sala. 68:26.