Lusekelo Luji Mumwingilo Wakimye Kyonse
1 Byomukiji bakyanyike, kwakubula nangwa kuzhinaukatune mwalangulukapo kala pamambo akimye kyenu kyakulutwe. Byambo bya Mana 21:5 bitubula’mba “muntu ulangulukila jimo ne kukosakana pa kwingila ukamona bintu byavula.” Kikemuwamina umvwe mwalangulukishapo pabyomukeba kuba mubwikalo bwenu. Kimye kyomubena kulanguluka byomukoba kulutwe, langulukaipo nebya kwingilako mwingilo wakimye kyonse. Mamboka?
2 Ipuzhaipo bakikulumpe bamo baingijilepo kala mwingilo wabupainiya saka bakiji banyike bemubule byobakiumvwa neluno kabiji kwakubula nangwa kubepatune, bonse bakambatu kintu kimo amba: “Ayo yajinga myaka yalusekelo mubwikalo bwami!” Mulongo umo wajinga nalusekelo mumwingilo wakimye kyonse kufumatu kubunsongwalume bwanji kufika nekubukulumpe waambile amba: “Kiletela bingi lusekelo kulanguluka pabyowaingijile mukimye kyabwanyike bobe nekwamba kuba’mba naumvwina lujimuno lwamaana lwakuba’mba: Sa uvuluka Mulenga wobe mu moba a bwanyike bobe.” (Sapwi. 12:1) Kikebewa kwinengezhezha jimo lonkaluno anweba nebansemi yenu kumonapo jishinda jakutainamo luno lusekelo mubunsongwalume bwenu nangwa mubunsongwakazhi bwenu.
3 Anweba Bansemi, Tundaikai Mwingilo Wakimye Kyonse: Byoaji Shetu wituta muchima, Yehoba, wimubula jishinda jomwafwainwa kuyamo. (Isa. 30:21) Byoabena kupana ano mafunde mubutemwe, ubena kumwesha kyakumwenako kyawama kwianweba bansemi babwina Kilishitu. Mukifulo kyakwibalekatu baana benu kwisajila abo bene jishinda jibawamina, bafunjishai namaana jishinda jobafwainwa kuyamo kuba’mba bakatambule mapesho a Yehoba. Apa bino byobakakoma, lufunjisho lwenu lukebakwasha “kupima ne kuyuka byawama ne byatama.” (Hebe. 5:14) Bakulumpe bayuka kupichila mubyobapitamo kuba’mba kechi bafwainwa kuketekela mumaana abo benene; abo bafwainwa kuketekela mwi Yehoba kwibolwela mashinda abo. (Mana. 3:5, 6) Kino kikebewa bingi kubakyanyike, mambo akuba bakyangye kuyuka byavula mubwikalo.
4 Anweba bansemi, baana benu byokebanangijile mumafumbi akukilaila pamyaka jikumi, nangwatu sabakyangye kufika kuyoyo myaka, isambai nabo bulongo pabyobakeba kukoba. Bafunjishi mumasukulu nebakwabo mobafunjila bakonsha kwibakanjikizha kulonda bintu byakumubiji byaino ntanda. Kwashai baana benu kusala makozi akonsha kwibafunjisha mingilo ikebakwasha kumona mwakwikwashisha kumubiji kwakubula kulubako bintu bya Bufumu. (1 Timo. 6:6-11) Javula, kiwama bingi umvwe muntu wapwisha sukulu, wafundapo mwingilo umo nangwa aku nakufunda yewo mwingilo aku saafolako mali akwikwashishamo kimye kyoabena kwingila mwingilo wakimye kyonse.
5 Tundaikainga banyike kubula kusongola nangwa kusongolwa bukiji. Umvwe kulutwe nalwendo bakeba kutwela mumasongola, bakasunga masongola abo bulongo. Umvwe kemutentamishe mwingilo wawama wabupainiya, kwingijila kumapunzha kubena kukebewa basapwishi bavula, mwingilo wapa Betele, nemwingilo wakusapwila, kilengela bakyanyike nangwatu sabakiji bacheche kwikala namulanguluko wakukeba kwipana abo bene mumwingilo utokesha Yehoba pamuchima, awo ulengela bakwabo kumwenamo byawama, nekuleta lusekelo kwiabo bene.
6 Anweba Bakyanyike, Tangizhaiko Mwingilo Wakimye Kyonse: Anweba bakyanyike, kechi mwafwainwa kwikalatu nakijikila kyakuyuka mwingilo wabupainiya byoajine. Patanshi mwafwainwa kukingilako bupainiya bwakukwasha pakakimye kacheche umvwe kyakonsheka kimye kyomukiji kusukulu nekimye kyomushinka masukulu. Popo mukayuka buwame bwamwingilo wabupainiya byoaji! Nanchi kuba mwalangulukila jimo kukengilako bupainiya bwakukwasha mubañondo bakulutwe nenyi?
7 Umvwe wimulongo wakyanyike mujibumba ja Lesa, neobewa wafwainwa kulangulukapo nangovu kuba bikebewa kuba’mba wikale nkwasho mukipwilo. (1 Timo. 3:8-10, 12) Kikwabo, langulukapo umone umvwe byoukafikizha myaka yakusemwa ikebewa ukakeba kwipuzhako mwingilo wapa Betele nangwa kuya nakufunda ku Sukulu ya Lufunjisho lwa Mwingilo. Mwingilo wenu wabupainiya ukemufunjisha bintu byawama bingi, nabiji byomwakonsha kulondela mutanchi wabintu bikebewa kwingijiwa, byomwakonsha kwinengezhanga bulongo mubintu, byakupwañena pamo nabakwenu, nebyakwikala namaana akwingila mingilo. Abino byonse bikemukwasha kwikala namashuko avujilako amwingilo kulutwe nalwendo.
8 Kyanema pakuba’mba mwingile mwingilo wakimye kyonse kekwikala namuchima wakwibikako mumingilo ya Lesa. Bino byobyubilo mutumwa Paulo byoatundaikilepo, kabiji waambile nepamfweto ifumamo kuba’mba: Byonse byo muba, nangwa ki ka, nangwa ki ka, ubai na muchima yense, nobe kwi Nkambo, ... byo mwayuka’mba, Kwi Nkambo mukatambula mfweto.” (Kolo. 3:23, 24) Yehoba emupeshe kwikala nalusekelo lwabaya mumwingilo wakimye kyonse!