Mwingilo Ukokolosha
1 Byambo bya mu Baibolo bikokolosha bantu bebitambwila ne kwibilondela kimye kyonse mu bwikalo bwabo. (Sala. 19:7, 8) Bibakwasha kufuma ku mafunjisho a bubela ne kuleka byubilo byatama. Kabiji bipana luketekelo lwa kine lwa kimye kya kulutwe. Aba batambwila mambo awama kechi bo bonka bamwenamotu ne. Aba batwala bukine bwa mu Baibolo ku bakwabo nabo bakokoloshiwa bingi.—Mana. 11:25.
2 Kukokoloshiwa mu Mwingilo: Yesu waambile’mba aba bonse bakasenda kikonkoji kya bwina Kilishitu kya kwikala baana ba bwanga, amo mwavwangiwa kwingila mwingilo wa kusapwila ne kulenga baana ba bwanga, ‘bakamona kukokoloka kwa michima yabo.’ (Mat. 11:29) Aye mwine wakokoloshiwe bingi kimye kyo asapwilanga ku bakwabo. Kyajinga nobe kajo kwi aye. (Yoa. 4:34) Byoatumine baana banji ba bwanga 70 kuya na kusapwila, basekejile bingi pa kumona Yehoba byo ebapele bulume bwa kwingila.—Luka 10:17.
3 Bena Kilishitu bavula lelo jino, nabo bakokoloshiwa bingi kupichila mu kwingila mwingilo wa kusapwila. Nyenga umo waambile’mba: “Mwingilo wa kusapwila unkokolosha bingi mambo untangijila mu bwikalo ne kuyuka bya kuba. Umvwe naingila mu mwingilo, makatazho ne bijikila byongikala nabyo byonse bikepanako.” Musapwishi mukwabo wingila na mukoyo naye waambile’mba: “Mwingilo ... umvululako kimye kyonse kuba’mba Yehoba koaji, kabiji undengela kwikala mutende ne lusekelo lukatampe mukachi ka muchima wami lwakonsha kubula kwiya na bintu bikwabo ne.” Kine twashukwa bingi pa kwikala “ba mu mwingilo umo ne Lesa.”!—1 Ko. 3:9.
4 Kikonkoji kya kwa Yesu Kyawama: Nangwa kyakuba bena Kilishitu batundaikwa kwikala ‘bakosakana,’ bino Yesu kechi ukeba kumupa byo twakonsha kukankalwa kupana ne. (Luka 13:24) Witwita mu butemwe bwa kine amba: “Twelai mu kikonkonji kyami pamo ne amiwa.” (Mat. 11:29, NW, tubyambo twa munshi) Aba bachinchika makatazho mu bwikalo bwabo bonse, bafwainwa kuketekela amba mwingilo ye bengila na muchima wabo yense, nangwa kyakuba akepepotu byepi nangwa byepi, usangajika bingi Lesa.—Mako 14:6-8; Kolo. 3:23.
5 Byo kikokoloshapo kwingijila Lesa witusanchila pa mingilo yonse yotuba na mambo a jizhina janji! (Hebe. 6:10) Twayai kimye kyonse twesekenga na ngovu kumupa byetu byawamisha.