Shajikainga Magazini mu Mwingilo
1, 2. Nga Kyamba kya Usopa ne Loleni! byalengela bwikalo bwa bantu kwikala byepi?
1 “Awama, eya pa kimye kyafwainwa kabiji akoseshañana bingi.” “Ke magazini akwashañana bingi o kyangye kutangapo kala ne.” Bino byambo bibena kumwesha bantu batanga Kyamba kya Usopa ne Loleni! kuzhokoloka ntanda yonse byo beumvwa pa ano magazini. Magazini etu kine amweshatu patoka kuba’mba ke bingijisho byanema bingi kusapwilamo mambo awama ku “bantu bonse.”—1 Timo. 2:4.
2 Musulu umo wamulume watambwile Loleni! wajinga na mutwe ye atemenwe. Panyuma, watangile Kyamba kya Usopa kyajinga na mutwe wamulengejile ponkapotu kulangulukishapo bulongo pa lwitabilo lwanji lwa kala ne kala lo aitabijile mu balesa basatu. Kino kyamulengejile kukeba kufunda. Panyuma ya bañondo batanu na umo wabatizwe. Mwanamulume mukwabo watambulanga magazini kimye kyonse bino kechi wiatanganga ne. Pano bino mukazhanji wabulanga kukeba Bakamonyi ye watanganga magazini o bashilanga mwatawanji. Milaye ya mu Baibolo ya kuba’mba ntanda ikekala paladisa mukekalanga bantu baoloka yamufikile bingi pa muchima. Mu kupita kwa kimye, aye, mwananji wamulume, ne nkasanji wamukazhi baikele ke bakalume ba Yehoba.
3. Buwame ka buji mu kushajika magazini onse abiji?
3 Ashajikai Onse Abiji: Byonka byo twamona kala, kechi twakonsha kuyuka wakonsha kutanga magazini etu nangwa kyakonsha kwibalengela kwikala na lusekelo ne. (Sapwi. 11:6) Onkao mambo kyanema bingi kushajikila pamo Kyamba kya Usopa ne Loleni!, nangwa kya kuba pa kushajika twambatu pa magazini imo. Bimye bimo, kyakonsha kuwama bingi kushajika magazini aji na mitwe yapusana pusana.
4. Twakonsha kutanchika byepi mwingilo wa magazini?
4 Kyanema bingi kwikalako na juba jimo mu mulungu ja kuya mu mwingilo wa magazini. Pa Kalenda wa Nte sha kwa Yehova uwa mu 2005, juba ja Kibelushi jatongolwa kwikala “Juba ja Magazini.” Pano bino, na mambo a kuba’mba mpunzha ne bwikalo bwa bantu bwaenda kupusana pusana, bamo bakonsha kwikalako na juba jingi ja kutesha muchima pa kushajika magazini. Nanchi kuya mu mwingilo wa magazini kuji pa mutanchi wenu wa mulungu ne mulungu nyi?
5. Bimye bya mutundu ka byo twafwainwa kuteshako muchima, kabiji ki ka kyakonsha kwitukwasha kuba byobyo?
5 Ibikilai Bikonkwanyi: Kwibikila bikonkwanyi bya pa ñondo pa ñondo bya kushajika magazini kwakonsha kwitukwasha kutesha muchima pa kushajika magazini. Nanchi muji na mutanchi wa kutwala magazini? Abya bantu bo mutana mu mwingilo mwibashila magazini nyi? Nanchi mwakonsha kushajika magazini mu busapwishi bwa mukwakwa, mu nyaunda ya busulu, ne mapunzha mutanwa bantu bavula nyi? Abya musenda magazini umvwe muji pa lwendo, kimye kyo mubena kupota bya kupotapota, nangwa kimye kyo mubena kuyapo kuntu kumo nyi? Shukilwai kimye kiji kyonse kyawama kukwasha bakwenu kumwenamo mu Kyamba kya Usopa ne Loleni!
6. Twakonsha kwingijisha byepi bulongo magazini akala?
6 Kabiji twakonsha kwibikila kikonkwanyi kya kushajika magazini a kala o tuji nao. Nangwa kya kuba magazini atanchikwa mu yewo ñondo kechi ashajikwa mu yenkao ñondo ne, byambo bijimo byanema bingi. Ashajikai ku bantu bamwesha lusekelo. Bantu bavula, magazini a Kyamba kya Usopa ne Loleni! aikala ke ‘kyambo pa kimye kyafwainwa.’ (Mana. 25:11) Twayai twiengijishenga kukwashishamo bantu bavula kuyuka kabiji ne kwingijila Yehoba.