Sungai

Kufunjishanga Mafunjisho a Baibolo Anunguluka

Kino kya mukachi muji bishinka bikatampe bya mitwe yalondankana ya kufunjishanga mafunjisho a Baibolo anunguluka yajinga mu Mwingilo Wetu wa Bufumu. Bonse batundaikwa kusunga kino kya mukachi ne kwikingijisha kimye kyo babena kufunjisha mafunjisho a Baibolo. Kunungapo, bishinka biji mu kino kya mukachi byafwainwa kwingijishiwa kimye kya kupwila kwa kuya mu mwingilo wa mu bujimi, kabiji bakulumpe batangijila mwingilo bakonsha kwingijisha bino bishinka kimye kyo babena kwisamba na lufunjisho lwa buku lo bafwakashila.

Lubaji 1: Lufunjisho lwa Baibolo Loluka?

Umvwe kimye kyonse saka mwisamba bulongo misambo ya mu Baibolo nangwatu ipi, kwingijisha Baibolo ne buku uji yense waitabizhiwa kufunjishamo, ko kuba’mba mubena kufunjisha lufunjisho lwa Baibolo. Mwakonsha kunemba sawakya wenu wa lufunjisho panyuma ya kufunjisha bimye bibiji kufuma po mwatanchikile bya kufunda kabiji inge mwamona’mba lufunjisho lukatwajijila.—km-KD 7/04 pe. 1.

Mabuku Aitabizhiwa

◼ Nanchi Lesa Ukebaka Kwiatweba?

◼ Kuyuka Kutangijila ku Bumi Bwa Myaka

◼ Popwelai Lesa Yenka Wakine

◼ Mwakonsha Kwikala Balunda na Lesa! wakonsha kwingijishiwa kufunjishamo muntu inge kechi wayukisha bulongo kutanga ne.

Lubaji 2: Kwinengezha Kufunjisha Lufunjisho

Twafwainwa kufunjisha byambo mu jishinda ja kuba byafika pa muchima wa yewo muntu ye tubena kufunjisha. Kino kikebewa kunengezha bulongo kuba’mba awo muntu akamwenemo.—km-KD 8/04 pe. 1.

Bya Kunengezha

◼ Langulukai pa mutwe, tumitwe twa tucheche, ne bipikichala biji mu kitango nangwa mu lufunjisho.

◼ Tanai mikumbu ya mepuzho anembwa, ne kushilatu bishinka bine bibena kukebewa.

◼ Salai binembelo byo mwakonsha kutanga kimye kya lufunjisho. Nembaipo tubishinka twipi kunsa ya buku wa kufundamo.

◼ Nengezhai kupitulukamo mu bishinka bikatampe.

Nengezhai Lufunjisho Kwesakana na Muntu ye Mubena Kufunjisha

◼ Bikai ye mufunjisha mu lulombelo ne bibena kukebewa kwi aye.

◼ Langulukilai jimo bishinka byakonsha kukatazha ufunda kumvwa nangwa kwitaba.

◼ Iipuzhai’mba: Bi ka byo afwainwa kumvwisha nangwa kwingijilapo pa kuba’mba akomeneko ku mupashi? Nakonsha kumufika byepi pa muchima?

◼ Inge kibena kukebewa, nengezhai kya kumwenako, bya kulumbulula, nangwa kwipuzha mepuzho avula kuba’mba awo muntu omvwishe mwatala kishinka nangwa kinembelo.

Lubaji 3: Kwingijisha Bulongo Binembelo

Nkebelo yetu ya kufunjishanga mafunjisho a Baibolo ke ‘kulenga baana ba bwanga’ kupichila mu kukwasha bantu kumvwisha ne kwitaba mafunjisho a Mambo a Lesa ne kwiengijisha mu bwikalo bwabo. (Mat. 28:19, 20; 1 Tesa. 2:13) Onkao mambo, lufunjisho lwafwainwa kwimena pa Binembelo.—km-KD 11/04 pe. 4.

Funjishai Kufuma mu Mambo a Lesa

◼ Mweshai ubena kufunda bya kutana binembelo mu Baibolo wanji.

◼ Tangai ne kwisamba pa binembelo bimwesha mafunjisho etu aimena pa Binembelo.

◼ Ipuzhai mepuzho. Mu kifulo kya kulondolwela ye mubena kufunjisha binembelo bya mu Baibolo, lekai aye yenka emulondolwelebyo.

◼ Kulondolwesha ne. Kechi mwafwainwa kulondolwesha byambo byonse biji mu kinembelo ne. Ambaitu byambo byakonsha kulengela kishinka kibena kwambiwapo kumvwanyika.

◼ Lumbululai bulongo mo kyatala. Kwashai ye mufunjisha kumona binembelo bya mu Baibolo byo byakonsha kumukwasha.

Lubaji 4: Kufunjisha bo Mufunjisha Baibolo bya Kunengezha

Ufunda Baibolo utangila jimo mu lufunjisho, kushila mikumbu, ne kulangulukila jimo mwakukumbwila mu byambo byanji mwine ununguluka bingi ku mupashi. Onkao mambo, umvwe lufunjisho lwa kufundanga kimye kyonse lwatendeka, nengezhezhai nanji pamo lufunjisho lumo ne kumubula bya kunengezha. Bavula bafunda Baibolo kyakonsha kuwama kunengezhezha nabo pamo kitango kyonse nangwa lufunjisho lonse.—km-KD 12/04 pe. 1.

Kushila Mikumbu ne Kunemba Tubishinka Kunsa

◼ Londololai bya kutana mikumbu ya mepuzho anembwa.

◼ Mumweshai ye mufunjisha buku wenu ye mufunjishamo byo mwashila byambo nangwa mikuku ya byambo paji bishinka.

◼ Mubulai’mba binembelo byonse byamweshiwa bikoseshapo kishinka kimo mu palagalafu, kabiji mumweshai bya kunemba tubishinka twipi kunsa ya pepala mu buku wanji ye afundamo.

Pitaimo kabiji Mubwele Mupitulukemo

◼ Lumbulwilai ufunda bya kupitamo mu mutwe wa kyokyo kitango, tumitwe twa tucheche, ne bipikichala, saka akyangye kutendeka kunengezha bulongo.

◼ Tundaikai ubena kufunda kupituluka mu bishinka bikatampe panyuma ya kupwisha kunengezha.

Lubaji 5: Kuyuka pa Kupelela Kufunjisha

Kuyuka pafwainwa kupezha lufunjisho kwaimena pa bulume ne bwikalo bwa mufunjishi ne ye afunjisha.—km-KD 1/05 pe. 1.

Koseshai Lwitabilo Lwabo

◼ Kyanema bingi kukwasha ye tufunjisha Baibolo kumvwisha byo abena kufunda mu kifulo kya kumufunjisha byavula mu ka kimye kacheche.

◼ Ikalaingako na kimye kyafwainwa kukwashishangamo ye mufunjisha kumvwisha ne kuswa byo abena kufunda.

◼ Ikalaiko na kimye kyawaina kya kutesha muchima pa bishinka bikatampe ne binembelo bine paimena mafunjisho.

Kuletamo Misambo Ingi mu Lufunjisho Ne

◼ Umvwe ye mufunjisha watemwa kwambatu pa bintu byanji mwine, mwakonsha kunengezha kwisamba nanji bino bintu panyuma ya lufunjisho.

◼ Kechi twafwainwa kuba sa tulolobwelatu kimye kya lufunjisho ne. Twafwainwa kukepeshako kulumbulwisha bishinka bimo ne byamwekele kuchina’mba byakalengela ubena kufunda Baibolo kukankalwa kwikala na maana alumbuluka a mafunjisho atanshi a mu Baibolo.

Lubaji 6: Byo Twafwainwa Kuba Inge ye Tufunjisha Baibolo Waipuzha Bwipuzho

Lufunjisho lwa Baibolo umvwe lwatendeka, kyanema bingi kufunjisha mafunjisho a mu Baibolo monka mo alondankena mu kifulo kya kukilaukila mitwe. Kino kikwashako ubena kufunda Baibolo kwala kitendekesho kya maana alumbuluka a kuyuka bintu ne kukomenako ku mupashi.—km-KD 2/05 pe. 6.

Yukai mwa Kubila

◼ Mepuzho akwatankana na lufunjisho akonsha kukumbulwa ponkapotu.

◼ Mepuzho abula kukwatankana na lufunjisho lubena kufunjiwa, nangwa kampe abena kukebewa kupesapesa afwainwa kwambiwapo pa kimye kikwabo. Kyafwainwa kuwama bingi inge kya kuba ao mepuzho anembwa.

◼ Umvwe kya kuba ye tufunjisha kimukatazha bingi kuswa mafunjisho amo, isambai nanji byambo bikwabo byalumbulula bulongo yewo mutwe.

◼ Umvwe kya kuba ubena kufunda kechi wakishiinwa ne, ao mutwe mulekai mukesambepo kimye kikwabo, kabiji ne kutwajijila na lufunjisho.

Ipelulai

◼ Inge kya kuba’mba kechi mwayuka mukumbu wa bwipuzho bwaipuzhiwa ne, kange mukumbule mukumbu wabula kuyilamo ne.

◼ Pa kimye pa kimye mukwashai ubena kufunda bya kupesapesa mu mabuku.

Lubaji 7: Kulomba Lulombelo Kimye kya Lufunjisho

Pa kuba’mba bo tufunjisha Baibolo bakomeneko ku mupashi, mapesho a Yehoba akebewa bingi. Onkao mambo, kyanema bingi kutendeka ne kupezhako na lulombelo pa lufunjisho.—km-KD 3/05 pe. 4.

Bya Kutendeka Lulombelo

◼ Na bantu bayukako Baibolo, lulombelo lwafwainwa kutendekatu pa juba jitanshi jo mwatendeka lufunjisho.

◼ Bakwabo babula kuyukako Baibolo, twafwainwa kuyuka kimye kyo twakonsha kutendeka kulomba pa lufunjisho.

◼ Mwakonsha kwingijisha Masalamo 25:4, 5 ne 1 Yoano 5:14 kulumbulula bulongo ene mambo o tulombela.

◼ Yoano 15:16 wafwainwa kwingijishiwa kumwesha’mba twafwainwa kulomba kwi Yehoba kupichila mwi Yesu Kilishitu.

Byambo Byakonsha Kwambiwa mu Lulombelo

◼ Kyawama bingi kutota Yehoba aye Nsulo ya mafunjisho.

◼ Twafwainwa kumwesha amba twamutemwa ye tufunjisha.

◼ Twafwainwa kumwesha lusanchilo ku jibumba Yehoba jo abena kwingijisha.

◼ Lombai mapesho a Yehoba kuba’mba ye tufunjisha engijishenga byo abena kufunda.

Lubaji 8: Kubula bo Tufunjisha Kwiya mu Jibumba

Nkebelo yetu ya kufunjisha mafunjisho a Baibolo kechi ya kufunjishatu mafunjisho ne, bino ke ya kukwasha ne bo tufunjisha kwiya mu kipwilo kya bwina Kilishitu. Mulungu ne mulungu pa lufunjisho, ikalaiko na kimye kya kwisamba nabo kishinka kimo kyaamba pa jibumba ja Yehoba.—km-KD 4/05 pe. 8.

Kupwila kwa Kipwilo

◼ Balumbulwilai kupwila konse. Aku mutendekatu nabo lufunjisho lutanshi, bateulai kutanwako.

◼ Babulai bishinka byanema byafunjiwe pa kupwila.

◼ Bakwashai kwikala na mujojo wa kutanwa ku Kivuluko, kupwila kukatampe, ne kufwakasha kwa mukulumpe wa kijiiji.

◼ Ingijishai bipikichala biji mu mabuku etu kwibakwasha kufwanyikizha bimweka.

◼ Batundaikai kutanga buloshuwa wa Inte sha kwa Yehova—Ni Bani? Finshi Basuminamo?

Ingijishai Mavidyo kubaishako kizaku

◼ Jehovah’s Witnesses—The Organization Behind the Name

◼ Our Whole Association of Brothers

◼ United by Divine Teaching

◼ To the Ends of the Earth

Lubaji 9: Kufunjisha Botufunjisha Baibolo Kusapwila Busapwishi bwa Kushukilwa

Bafunda Baibolo byo batatula kwitabila bintu byo babena kufunda, bibalengela kukeba kubulako bakwabo.—km-KD 5/05 pe. 1.

Batundaikai Kutendeka Kusapwila

◼ Abya ujipo na bakwabo nangwa ba mu kisemi bo akonsha kwitako kuba’mba nabo beye batanwepo pa lufunjisho nyi?

◼ Abya ujipo na bakwabo mo bengijila nkito, bakwabo baana basukulu, nangwa balunda nanji bamwesheshepo lusekelo nyi?

Bafunjishai Kubulako Bakwabo Bintu byo Baitabilamo

◼ Kimye kyo mubena kwisamba bishinka bimo byo mwasalulula kimye kya lufunjisho, mushikishai amba, “Mwakonsha kwingijisha byepi Baibolo kulumbulula buno bukine ku ba mu kisemi kyenu?”

◼ Kwashai ubena kufunda kumvwisha byo kyanemena kwikala na mushingi ne kulangulukilako bakwabo kimye kyo abena kwisamba nabo pe Lesa ne nkebelo yanji.

◼ Buloshuwa wa Inte sha kwa Yehova—Ni Bani? Finshi Basuminamo? wakonsha kwingijishiwa na ubena kufunda kukwasha bakwabo ne ba mu kisemi kyanji kumvwisha luketekelo lwetu lwa mu Baibolo ne mo tubila bintu.

Lubaji 10: Kufunjisha bo Tufunjisha Baibolo mu Mwingilo wa ku Nzubo ne Nzubo

Umvwe bakulumpe mu kipwilo bamona’mba ufunda Baibolo wafikapo kwikala musapwishi wabula kubatizwa, wafwainwa kutatula kwingijila pamo na kipwilo mu mwingilo wa kusapwila.—km-KD 6/05 pe. 1.

Kunengezhezha pamo

◼ Mubulai ye mufunjisha po akonsha kutana mashinda a kwambilamo.

◼ Mukwashai kusala jishinda japela kwamba jakonsha kwingila bulongo mu nyaunda yenu.

◼ Mutundaikai kwingijishanga Baibolo mu mwingilo.

◼ Pitulukilaimo jimo nanji. Mubulai byo akonsha kukumbula mepuzho bulongo epuzhiwa javula.

Kusapwila Pamo

◼ Mulekai ubena kufunda amone byo musakwingijisha jojo jishinda jo mwanengezhejile pamo.

◼ Muyukai yewo muntu byo aji ne papelela bulume bwanji. Kimye kimo kyakonsha kuwama kubula yewo musapwishi wakatataka kusunsapotu pacheche pa jojo jishinda jo mwaji kunengezhela nanji pamo.

◼ Kwashai musapwishi wakatataka kwikala na mutanchi wa kuyanga kimye kyonse mu mwingilo.

Lubaji 11: Kukwasha Basapwishi Bakatataka Kubwelako

Kubwelako kutatula na lwendo lutanshi. Kwashai yewo musapwishi wakatataka kumwesha lusekelo lwa kine mu bantu bo ambañana nabo. Mufunjishainga pachepache bya kulengela mwina nzubo kwamba biji ku muchima wanji, kuteleka ku byo babena kwamba, kabiji ne kuyuka bintu byo balangulukapo kimye kyonse.—km-KD 7/05 pe. 1.

Kunengezha Kubwelako

◼ Pitulukaimo mu mwisambo ye mwajinga nanji pa lwendo lutanshi, kabiji kwashai musapwishi wakatataka kusala mutwe wa kuzakula muchima wa mwina nzubo.

◼ Nengezhai bya kwamba bicheche pa kinembelo kimo kya mu Baibolo pamo na palagalafu imo iji mu buku wa kufundamo.

◼ Nengezhai bwipuzho bwa kwipuzha ku mpelo ya mwisambo.

Kosaiko na Kubwelako

◼ Kwashai musapwishi wakatataka kubwelako bukiji bukiji ku bantu bamwesheshe lusekelo.

◼ Kwashai musapwishi wakatataka kuyuka buneme bwa kubwela bwelako pa kuba’mba batane aba babula kutanwa javula pa nzubo.

◼ Mufunjishai musapwishi wakatataka bya kulayañana na bantu, kabiji mukwashai kuyuka buneme bwa kubwelelako ku bo alaya.

Lubaji 12: Kukwasha bo Tufunjisha Kutendeka ne Kufunjisha Mafunjisho a Baibolo

Kyanema bingi kwi anweba kulondela Yesu kupichila mu kwikala ba kumwenako bawama mu mwingilo wenu. Ye mufunjisha umvwe ke emumone monka mwayila mu mwingilo, ukayuka kuba’mba nkebelo ine ya kubwelako ke ya kutendeka mafunjisho a Baibolo.—km-KD 8/05 pe. 1.

Kutendeka Lufunjisho lwa Baibolo

◼ Mulondolwelai ufunda kuba’mba kechi jonse jo kikebewa kulumbululatu ponkapo lufunjisho lonse byo lwikala ne.

◼ Javula kiwamatu kumumwesha lufunjisho byo lwikala kupichila mu kwingijisha palagalafu imo nangwa abiji mu buku wa kufundamo.

◼ Pitulukai ne kweseka mashinda a kutendekelamo mafunjisho a Baibolo.—km-KD 8/05 pe. 8; km-KD 1/02 pe. 6.

Funjishai Babena Kufunda Kwikala Bafunjishi

◼ Tundaikai babena kufunda kunembesha mu Sukulu ya Mwingilo wa Teokalasi.

◼ Nengezhai kuya na musapwishi wakatataka ku mafunjisho a Baibolo akwabo kabiji wakonsha kusunsapo pacheche pa lufunjisho.