Tunemeka Mashuko Etu a Mwingilo!
1 Mwapita bwikalo bwa bantu bonse, Yehoba wapana mashuko apusana pusana ku bakalume banji. Wibapa mashuko a mwingilo, kechi na mambo a kuba’mba awu mwanamulume nangwa mwanamukazhi, mukulumpe nangwa mwanyike, nangwa byo bobapo mu bwikalo ne. (Luka 1:41, 42; Byubilo 7:46; Fili. 1:29) Ñanyi mashuko o abena kwitupa lelo jino?
2 Mashuko Amo o Tuji Nao: Tuji na jishuko ja kufunjishiwa kwi Yehoba. (Mat. 13:11, 15) Jishuko jikwabo jo tuji najo ke ja kutota Yehoba kupichila mu mikumbu yo tukumbulapo pa kupwila kwa kipwilo. (Sala. 35:18) Umvwe twaikala na jishuko ja kwambapo, twafwainwa kwikyuba na kizaku. Po pamotu, umvwe ketumone mwingilo uji yense wa mu kipwilo kwikala wanema, tukamwingila kwesakana na papela bulume bwetu. Nanchi kimye kyonse twikalako na kimye kya kulama Nzubo yetu ya Bufumu kwikala ya butooto ne kwiiwamisha nyi?
3 Nangwa kya kuba bantu bavula bazhinauka kana Lesa umvwa milombelo yabo nangwa ne, atweba tumwenamo bingi mu jishuko jetu jikatampe pa kuyuka’mba, aye Mwine wakila pa bilengwa byonse umvwa milombelo yetu. (Mana. 15:29) Yehoba aye mwine uteleka ku milombelo ya bakalume banji. (1 Pe. 3:12) Kechi wabikako kipimo kya kimye kya kumulombelamo ne. Byo tujipo na jishuko janema ja kulomba “mu bimye byonse”!—Efi. 6:18.
4 “Ba mu Mwingilo Umo ne Lesa”: Jishuko jimo jawamisha jo tuji najo ke ja kusapwila mambo awama a Bufumu bwa Lesa byo tuji “ba mu mwingilo umo ne Lesa.” (1 Ko. 3:9) Uno ke mwingilo umo uleta bingi lusekelo kabiji ukokolosha. (Yoa. 4:34) Yehoba kechi kyamufwainwe kwingijisha bantu kwingila uno mwingilo ne, pano bino, witupa uno mwingilo na mambo a kuba’mba witutemwa. (Luka 19:39, 40) Pa kuba bino, Yehoba kechi wapana jino jishuko kipanepanetu ne. Aba bengilako mu uno mwingilo, bafwainwa kufikizha bikebewa bya ku mupashi ne kutwajijila kwibimwesha. (Isa. 52:11) Abya tumwesha’mba twanemeka jino jishuko kupichila mu kumona uno mwingilo kwikala lubaji lwanema lwa mutanchi wetu wa bintu byo tuba mulungu ne mulungu nyi?
5 Mashuko afuma kwi Lesa etulengela kwikala bwikalo bwalumbuluka. (Mana. 10:22) Kechi twafwainwa kwiamona nobe a kukaishatu ne! Kupichila mu kumwesha’mba twanemeka kya kine mashuko etu a mwingilo, tutokesha pa muchima Shetu wa mwiulu, aye Mpanyi wa “byonse byawama ne bya bupe byonse byalumbuluka.”—Yako. 1:17.