Nanchi Mwakonsha Kwingilako Pakatampe mu Mwingilo Wenu Nyi?
1. Ki ka kibena kukebewa bukiji bukiji mu mwingilo wa mu bujimi, kabiji mambo ka?
1 Byo amwene kuba’mba bantu bavula bamwesheshe lusekelo mu mambo awama a Bufumu, Yesu wakambizhe baana banji ba bwanga ‘kulomba ku Mwina bujimi kutuma bantu ba kunowa mu bujimi bwanji.’ (Mat. 9:37, 38) Byo kiji kuba’mba tuji mu moba a kupelako a kunowa, mwingilo wetu ubena kukebewa kuba’mba tumwingile bukiji bukiji. Kino kibena kulumbulula’mba twafwainwa kulombeshapo kumona byo twakonsha kwingilako pakatampe mu mwingilo wa mu bujimi.—Yoa. 14:13, 14.
2. Bamo baubapo byepi pa lwito lukebewa bantu bavula ba kwingila mu bujimi?
2 Bya Kwingilako Pakatampe mu Mwingilo: Na lutangijilo ne bukwasho bwa Yehoba, bavula bafuukulapo kutendeka mwingilo wa bupainiya. (Sala. 26:2, 3; Fili. 4:6) Bamo bebikijile kikonkwanyi kya kwingilako bupainiya bwa kukwasha ñondo umo nangwa kukilapo mu mwaka. Kuba bino kwibalengejile kwingilako pakatampe mu mwingilo wabo. Lusekelo lo bamwenejilemo mu kwingilako bupainiya bwa kukwasha, lwalengejile bavula kutendeka bupainiya bwa kimye kyonse.—Byu. 20:35.
3. Umvwe mwaingijilepo kala bupainiya, mwakonsha kulangulukapo kuba ka luno?
3 Nanchi Mwakonsha Kutendeka Jikwabo Mwingilo wa Bupainiya Nyi?: Umvwe mwaingijilepo kala bupainiya, kwa kubula nangwa kuzhinaukatu ne, mukivuluka buwame bujimo. Nanchi mwalombapo pa mulanguluko wenu wa kutendeka jikwabo bupainiya nyi? Bintu bimulengejile kusankilapo bupainiya kampe luno kechi byakonsha kwimukanya kutendeka jibiji ne. Jishuko jimushinkukila jo mwakonsha kwingilako jikwabo bupainiya.—1 Yoa. 5:14, 15.
4. Jishuko ka jashinkukila atweba bonse?
4 Mwingilo wa kunowa tukimwingila kabiji katatakatu apwe. (Yoa. 4:35, 36) Onkao mambo, twayai atweba bonse tulangulukepo bulongo umvwe twakonsha kupimpulako mingilo yetu ya pa juba pa juba kuba’mba twingileko pakatampe mu mwingilo wa mu bujimi. Nangwa umvwe twamona’mba kechi twakonsha kwingilako pakatampe mu mwingilo wetu ne, nanchi kuba twamonapo mashinda akwabo a kubilamo bulongo uno mwingilo nenyi? (Mako 12:41-44) Byo kyawamapo ku boba bonse baji na jishuko ja kwibengijisha kwi Yehoba mu uno mwingilo mukatampe!—Sala. 110:3.