Lulombelo ne Kulanguluka Langulukapo—Kwanema Bingi ku Bena Kilishitu Bengila na Mukoyo
1. Ki ka kyakwashishe Yesu kutatu muchima pa mwingilo wa kusapwila?
1 Mabanga pa kuzhika juba, Yesu wabukilenga ne kupanga bandemona mu bantu. Byo bwakile lukelo baana banji ba bwanga bamwambijile’mba: “Bonse babena kwimukeba,” bakebelenga’mba atwajijile na kuba bya kukumya. Pano bino, Yesu kechi watabankene na bino bintu ne, wateletu muchima pa mwingilo wa kusapwila mambo awama. Wibakumbwile’mba: ‘Nanchi tuye mu mizhi yalondankana na uno, namba, nkasapwile monka; mambo o mambo o naishila.’ Ki ka kyakwashishe Yesu kutatu muchima pa mwingilo? Wabukile ku makya na kulomba ne kulanguluka langulukapo. (Mako 1:32-39) Nga kulomba ne kulanguluka langulukapo kwakonsha kwitukwasha byepi kwingila na mukoyo?
2. Ñanyi bintu byo twakonsha kulangulukangapo byakonsha kwitukwasha kutwajijila kwingila na kizaku mu mwingilo?
2 Kulanguluka languluka pa Ka? Yesu wamwene mabumba byo “asubakene ne kupelelwa, pamo no mikoko ya kubula kafunga.” (Mat. 9:36) Netuwa twakonsha kulanguluka pa mambo awama byo anema ku bantu. Twakonsha kulanguluka pa uno mwingilo byo abena kukebewa kumwingila bukiji. (1 Ko. 7:29) Twakonsha ne kulanguluka pa mingilo ya Yehoba, byubilo byanji, pa jishuko ja kwikala Bakamonyi ba kwa Yehoba ne pa bukine bo twafunda mu Mambo a Lesa bwabula kuyukanyikwa ku bantu ba mu nyaunda yetu.—Sala. 77:11-13; Isa. 43:10-12; Mat. 13:52.
3. Kimye ka kyo twakonsha kulanguluka langulukapo?
3 Kimye ka kya Kulanguluka langulukapo? Byonka byaubile Yesu, bamo babuka ku makya saka kwazhindama bulongo. Bakwabo bekala na kimye kya kulanguluka langulukapo saka bakyangye kuya na kulaala. (Nte. 24:63) Nangwa kya kuba tuji na bya kuba byavula, twafwainwa kwikalangapo na kimye kya kulanguluka languluka. Bamo boba bino inge baji pa lwendo. Pachaile bamo popo bekala na kimye kya kulanguluka languluka. Bavula batana kuba’mba kulangulukapo nangwa kwa pa ka kimye kacheche saka bakyangye kuya mu mwingilo, kwibalengela kusapwila na kizaku ne kwamba na kuchinchika.
4. Mambo ka o twafwainwa kulangulukilangapo?
4 Lulombelo ne kulanguluka langulukapo kuketulengela kutesha muchima pa kwingijila Yehoba, pa mpompwelo yetu kabiji kuketukwasha kutwajijila kwingila na kizaku mu mwingilo wa kusapwila. Yesu aye mwine Musapwishi wa kwa Lesa Wayukisha, kulanguluka langulukapo kwamukwashishe bingi, ne atweba kuketukwasha.