Funjilai ku Bangauzhi—Hoseya
1. Ñanyi bwipuzho bo mwafwainwe kwishikisha?
1 ‘Ñanyi milambo yo mbena kukeba kupana kwi Yehoba?’ Kampe mwakishikishapo kala buno bwipuzho kimye kyo mubena kulanguluka pa buwame ne lusa lwanji. (Salamo 103:2-4; 116:12) Ngauzhi Hoseya waingijile mwingilo ye bamupele kwi Yehoba nangwa kya kuba uno mwingilo wakebelenga kwipana aye mwine. Twakonsha kulondela byepi Hoseya?
2. Twakonsha kulondela byepi kya kumwenako kyawama kya kwa Hoseya byo achinchikile pa kusapwila?
2 Sapwilainga mu Bimye Byakatazha: Hoseya wasapwijilenga ku bufumu bwa mikoka jikumi bwa Isalela, amo mo bazhiishe bupopweshi bwa kine. Mfumu Yeloboma wa bubiji waubile byatama ku meso a Yehoba kabiji watundaikile bupopweshi bwa kupopwela mwana ñombe bwatendekele Yeloboma mutanshi. (2 Mfu. 14:23, 24) Bamfumu bonse balaminenga panyuma, batwajijile kutundaika buno bupopweshi bwajinga mu bufumu bwa mikoka jikumi kufikatu ne kimye kyo bebonawine mu 740 B.C.E. Nangwa kya kuba buno bupopweshi bwasampukijile ne pakatele, Hoseya watwajijile kwingila mwingilo wa bungauzhi mu bukishinka pa myaka 59. Nanchi ne atweba twakonsha kutwajijila kusapwila nangwa kya kuba babena kwitumanyika nyi?—2 Timo. 4:2.
3. Bwikalo bwa kwa Hoseya bwamwesheshe byepi lusa lwa Yehoba?
3 Langulukainga pa Lusa lwa Yehoba: Yehoba wakambizhe Hoseya kusongola “mwanamukazhi pite.” (Ho. 1:2) Nangwa kya kuba mukazhanji, aye Goma wasemejilemo mwana wamulume, bino wasemene ne baana bakwabo bakubula bashabo. Bukishinka bwa kwa Hoseya ne kulekelako mambo mukazhanji kwamwesheshenga lusa lwa Yehoba ku bena Isalela kimye kyo balapijile. (Ho. 3:1; Loma 9:22-26) Nanchi ne atweba twakonsha kuleka bintu byo twatemwa pa kuba’mba tukwashe bantu bonse kuyuka lusa lwa Yehoba nyi?—1 Ko. 9:19-23.
4. Ñanyi bintu bimo byo twakonsha kuleka pa kuba’mba twingijile Yehoba?
4 Bakalume bamo ba Yehoba baleka mingilo yabo pa kuba’mba bekale na kimye kyabaya kya kwingilako mwingilo. Bakwabo nabo bafuukulapo kubula kusongola nangwa kusongolwa ne kubula kusema baana pa kuba’mba batundaike bya Bufumu. Umvwe twalanguluka pa bwikalo bwa kwa Hoseya, twakonsha kwamba’mba ‘Kechi nakonsha kuba byo aubile ne.’ Byo tutwajijila kuyukilako lusa lwa Yehoba ne kuketekela mupashi wa Lesa kwitukwasha, wakonsha kwitwingijisha mu jishinda jo twabujile ne kuketekela byonka byo kyajinga kwi Hoseya.—Mat. 19:26; Fili. 2:13.