Bingijisho Byafwainwa Kwikala mu Kyola Kyetu kya mu Mwingilo
1. Basapwishi baji byepi nobe basendwe?
1 Sendwe wingijisha bingijisho byapusana pusana pa kulenga bintu. Nangwa kya kuba bingijisho bimo bingila ku mingilo imo, bino bikwabo bebingijisha javula bingi. Abino byo bingijisho basendwe byo basenda kimye kyonse kabiji byo byo bayuka kwingijisha bulongo. Baibolo utundaika mwina Kilishitu yense kuteshako muchima ku mwingilo wa kusapwila ne kwikala “wa mwingilo wabula ne kya kumulengesha bumvu.” (2 Timo. 2:15) Ñanyi kingijisho kyanema kikala mu kyola kya mu mwingilo? Ke Mambo a Lesa, kingijisho kyo twingijisha pa ‘kufunjisha bantu kwikala ke baana ba bwanga.’ (Mat. 28:19, 20) Onkao mambo, twafwainwa kwibikako kuyuka bya ‘kufunjisha ne kulumbulula bulongo mambo a bukine.’ Nangwa byonkabyo, kuji bingijisho byo twingijisha javula bingi bena Kilishitu bonse byo bafwainwa kufunda bya kwibingijisha bulongo pa kufunjisha bantu bukine.—Maana 22:29.
2. Ñanyi bingijisho byo twingijisha javula?
2 Bingijisho byo Twingijisha Javula mu Mwingilo: Kununga pa Baibolo, ñanyi bingijisho bikwabo byo twafwainwa kwingisha? Kingijisho kyo twingijisha bingi kufunjishamo bukine bwa mu Baibolo ke buku wa Nanchi Baibolo Kine Ufunjisha’mba Ka? Umvwe twapwisha kufunda uno buku na muntu ye tufunjisha Baibolo, twingijisha buku wa ‘Ikalai mu Butemwe bwa Lesa’ kumufunjisha bya kwingijisha mafunde a mu Baibolo mu bwikalo bwanji. Onkao mambo, twafwainwa kuyuka bya kwingijisha bulongo ano mabuku abiji. Twakonsha ne kubika mabuloshuwa amo mu kyola kyetu kya mwingilo. Buloshuwa wa Mambo Awama Afuma kwi Lesa! naye tumwingijisha pa kufunjisha bantu Baibolo. Inge nyaunda yetu muji bantu babula kuyukisha kutanga nangwa inge mu yeo mulaka kechi muji mabuku avula a kwingijisha ne, twakonsha kwingijisha buloshuwa wa Umvwainga Byamba Lesa nangwa Umvwainga Byamba Lesa Mukekale Myaka. Kingijisho kikwabo kileta bantu bafunda Baibolo mu jibumba ja Lesa ke buloshuwa wa Bañanyi Babena Kuba Kyaswa Muchima wa Yehoba Lelo Jino? Kuji mavidyo akonsha kwimukwasha kufunjisha bantu kwikala baana ba bwanga, nabiji a kuba’mba Mambo ka a Kufunjila Baibolo?, Ñanyi Bintu Byubiwa pa Nzubo ya Bufumu?, ne wa Kizungu wa kuba’mba Does God Have a Name? (Nanchi Lesa uji na Jizhina Nyi?) ke bingijisho byo twafwainwa kufunda bya kwibingijisha bulongo.
3. Mwingilo wa Bufumu ukeyanga kulutwe uketukwasha kuba byepi?
3 Mwingilo wa Bufumu ukeyanga kulutwe uketukwasha kuyuka bulongo bya kwingijisha mabuku o twikala nao. Byo tukengijishanga bino bingijisho bulongo, tukalondelanga lujimuno lwa kuba’mba: “Saka wita muchima obe mwine ne lufunjisho lobe. Kosela mu bino bintu, mambo mu kuba bino ukepulusha obe mwine ne boba bakumvwa.”—1 Timo. 4:16.