BYAFWAINWA KWIKALA BENA KILISHITU
Chinuzhukainga Kusampanya Byambo bya Bubela
Lelo jino, byambo bakonsha kwibisampanya ku bantu bavula mu kimye kichechetu kupichila mu mapepala a byambo, pa waileshi, pa TV ne pa intaneti. Aba bapopwela “Lesa wa kine” kechi bafwainwa kusampanyanga byambo bya bubela ne. (Sl 31:5; Lup 23:1) Kubuula bantu byambo bya bubela kwakonsha kwibabika mu lukatazho. Inge mukeba kuyuka kana byambo byo mwaumvwa bya kine nangwa ne, iipuzhai’mba:
‘Nanchi bino byambo byafuma ku muntu ye naketekela nyi?’ Kyanema bingi kwiipuzha buno bwipuzho mambo muntu ubena kwimubuula byobyo byambo kechi wakonsha kuyuka bishinka byonse ne. Bantu inge babena kubuula bakwabo bintu bimo javula babikamo ne bya bubela. Kino kilengela byambo kupimpulwa. Onkao mambo, jimukainga pa kubuula bakwenu byambo byo mwabula kuyuka bulongo ko byafuma. Kikatakata aba baji pa bifulo mu kipwilo bo baketekela bafwainwa kwambanga bya kine, kabiji bafwainwa kujimuka bingi pa kubulañana byambo byo babula kuyuka bishinka bulongo
‘Nanchi bino byambo bya kubabañana nyi?’ Inge abyo byambo bisakutamisha jizhina ja muntu umo nangwa bantu bavula, kyakonsha kuwama kubula kubuulako bantu bakwabo.—Man 18:8; Fp 4:8
‘Nanchi jino jishimikila ja kine nyi?’ Jimukainga na mashimikila a bintu byamwekele omvwika nobe a kine
TAMBAI VIDYO WA KUBA’MBA NAKONSHA KULEKA BYEPI KUYEBEKA BAKWETU? APA BINO MUKUMBULE ANO MEPUZHO:
Kwesakana na Byambo bya Maana 12:18, ñanyi bintu byatama byakonsha kufuma mu byambo byo twamba?
Kinembelo kya Filipai 2:4 kitukwasha byepi kuyuka byo twafwainwa kwambanga pa bakwetu?
Twafwainwa kuba byepi inge bantu batendeka kwamba byatama pa bakwetu?
Ñanyi mepuzho o twafwainwa kwishikishanga saka tukyangye kutendeka kwamba pa bakwetu?