Imweshainga Butemwe mu Kisemi

Butemwe buji nobe gulu ulamankanya kisemi pamo. Kwakubula butemwe, mu kisemi kechi mwakonsha kwikala mutende ne kukwatankana ne. Banabalume basongola ne banabakazhi basongolwa ne bansemi bakonsha kumwesha byepi butemwe mu kisemi?

Mwanamulume watemwa mukazhanji wafwainwa kuyuka bintu bikeba mukazhanji, kuteleka ku byo aamba ne byo abena kumvwa. (Ef 5:28, 29) Ukebela ba mu kisemi bya ku mubiji byo bakeba ne kwibakwasha kukosesha bulunda bwabo ne Yehoba, kuvwangakotu ne kwikala na Kupopwela kwa Kisemi kimye kyonse. (1Ti 5:8) Mwanamukazhi watemwa mwatawanji unekenena mwatawanji ne kumupa “mushingi mukatampe.” (Ef 5:22, 33; 1Pe 3:1-6) Bonse bamulume ne mukazhanji bafwainwa kwilekelangako mambo bene na bene. (Ef 4:32) Bansemi bafwainwa kutemwa baana babo, kwibata muchima pa muntu pa muntu ne kwibafunjisha kutemwa Yehoba. (Mpi 6:6, 7; Ef 6:4) Ñanyi makatazho apitamo baana babo ku sukulu? Babena kuba byepi na bakwabo bebakanjikizha kuba byatama? Mu kisemi inge mwaikala butemwe, bonse bakomvwanga’mba bazhikijilwa ne kwikala mu mutende.

TAMBAI VIDYO WA KUBA’MBA MWESHAINGA BUTEMWE BUBULA KUPWA MU KISEMI KYENU, APA BINO MUKUMBULE ANO MEPUZHO:

• 

  Mwanamulume wasongola watemwa mukazhanji umujiisha ne kumulama byepi?

• 

  Mwanamukazhi wasongolwa umwesha byepi mushingi mukatampe ku mwatawanji?

• 

  Bansemi batemwa baana babo bebafunjisha byepi Mambo a Lesa pa kuba’mba ebafike pa muchima?