BYAFWAINWA KWIKALA BENA KILISHITU

Fuukulaingapo Bulongo pa Kutoma Maalwa

Kipikichala kyafuma mu vidyo wa kuba’mba ‘Langulukai pa Byakonsha Kufumamo.’ Mulolo uji na meno atwa wafuma mu maalwa akwata mwanamulume.

Bena Kilishitu bonse bafwainwa kwikala na kyubilo kya kwikanya pa kutoma maalwa. (Man 23:20, 29-35; 1Ko 6:9, 10) Umvwe mwina Kilishitu wafuukulapo kutoma maalwa, wafwainwa kuba bino mu kwesakanya. Kabiji wafwainwa ne kuchinuzhuka kuketekela mu maalwa ne kutuntwisha bakwabo. (1Ko 10:23, 24; 1Ti 5:23) Kechi twafwainwa kukanjikizhanga bakwetu kikatakata banyike kutoma maalwa ne.

TAMBAI VIDYO WA BIPIKICHALA BYO BABENA KULENGA WA KUBA’MBA LANGULUKAI PA BYAKONSHA KUFUMAMO, APA BINO MUKUMBULE ANO MEPUZHO:

Mambo ka bena Kilishitu bonse o bafwainwa kukookelanga mizhilo yaamba pa kutoma maalwa?—Lo 13:1-4
Mambo ka o twafwainwa kubujila kuswisha bakwetu kwitukanjikizha kutoma maalwa?—Lo 6:16
Twakonsha kuchinuzhuka byepi bintu byakonsha kwitulengela kutoma maalwa?