Monainga Banabakazhi Bakulumpe Nobe Bainenu, Bansongwakazhi Nobe Banyenga Yenu

Binembelo bitutundaika kumonanga bena Kilishitu bakulumpe nobe bainetu ne bashetu. Bakyanyike nabo twafwainwa kwibamonanga nobe bakolojetu ne bankasetu. (Tangai 1 Timoti 5:1, 2.) Kikatakata balongo bafwainwa kunemekanga banyenga ne kwibapa mushingi.

Mulongo kechi wafwainwa kutendeka kusengula nangwa kuba kiji kyonse kyakonsha kulengela nyenga kubula kukasuluka inge po aji ne. (Yob 31:1) Mulongo katanda kechi wafwainwa kulengela nyenga kulanguluka amba wamutemwa, bino saka abena kumukayilatu ku bongo ne.

Bakulumpe mu kipwilo bafwainwa kutekenya banyenga babena kwibepuzhapo pa bintu bimo mu mushingi nangwa babena kwibabulapo bimo kuba’mba bengijilepo. Bakulumpe mu kipwilo bafwainwa kikatakata kulangulukilangako banyenga babula bamwatawabo ba kwibazhikijila.—Lut 2:8, 9.

TAMBAI VIDYO WA KUBA’MBA MWESHAINGA BUTEMWE BUBULA KUPWA MU KIPWILO—KU BANYENGA BAFWILWA NE BAANA BAKISHALE, APA BINO MUKUMBULE ANO MEPUZHO:

• 

  Ba mu kipwilo bamwesheshe byepi butemwe Nyenga Myint?

• 

  Butemwe bwamwesheshe ba mu kipwilo bwashimwine byepi bukamonyi mu yewa muzhi?

• 

  Butemwe bwamwesheshe ba mu kipwilo bwalengejile baana babakazhi ba Banyenga Myint kuba byepi?

Mu ñanyi mashinda mo mwakonsha kumweshesha’mba mwata muchima banyenga ba mu kipwilo kyenu?