“Sekelainga mu Bintu Byonka byo Muji Nabyo”

Inge twi bayanji twakonsha kwesekwa kuba bintu byakonsha konauna bulunda bwetu ne Yehoba. Nabiji inge kwamweka nkito yakonsha kwitujilanga kimye kya kwingijila Lesa. Kulanguluka pa byaamba Bahebelu 13:5 kusakwitukwasha bingi.

“Mwikale babula kutemwa mali”

• Lombainga ne kulangulukapo bingi pa byo mumona mali mu bwikalo bwenu. Kabiji langulukai ne pa baana benu byo bafunjilako kwi anweba.​—g 9/15 6.

“Sekelainga mu bintu byonka byo muji nabyo”

• Yukai bintu byanemesha bikebewa mu bwikalo bwenu.​—w16.07 7 jifu. 1-2.

“Kechi nkakusha ne, kabiji kechi nkakulekelela ne”

• Shiinwai kuba’mba Yehoba ukatwajijila kwimupa bintu bikebewa mu bwikalo inge mwatwajijila kukeba Bufumu patanshi.​—w14 4/15 21 jifu. 17.

TAMBAI VIDYO WA KUBA’MBA BALONGO BETU BYO BABENA KWIKALA MU MUTENDE NANGWA KYA KUBA BAYANJI, APA BINO MUKUMBULE BUNO BWIPUZHO:

Mubena kufunjilako ka ku byapichilemo ba Miguel Novoa?