Kulomba kwi Lesa Kwakonsha Kwimukwasha Bingi

Ba Pamela bakolelwe kansa kabiji bayile na kumonañana na badokotala. Nangwa byonkabyo, balombele kwi Lesa kuba’mba ebape bulume bwa kuchinchika kikola kya kansa. Nanchi kulomba kwibakwashishe nyi?

Ba Pamela baambile’mba: “Byo natendekele muchi wa kansa, naakaminwe bingi. Pano bino, byo nalombele kwi Yehoba, moyo wapwile kabiji nachinchikile. Nangwa byonkabyo, kikola kya kansa kyatwajijilatu, pakuba kulomba kwi Lesa kunkwasha bingi kuyuka’mba juba jimo kikola kyami kikapwa. Inge bantu bangipuzha’mba mwabuukako byepi, nebakumbula’mba ‘kechi nabuuka ne nakikolwa, pano bino nji na lusekelo.’”

Kechi twafwainwa kulombangatu kwi Lesa inge kya kuba tuji na misongo ikatampe ne. Bonse tupita mu makatazho akatampe ne acheche. Kabiji javula tukeba kwitukwasha kuyuka mwa kubila na makatazho. Nanchi kulomba kwi Lesa kwakonsha kwitukwasha nyi?

Baibolo waamba’mba: “Twika Yehoba kisendwa kyobe, ne aye ukakukosesha. Kabiji kechi ukaleka muntu waoloka amba apone ne.” (Salamo 55:22) Abino byambo bitutundaika bingi. Nanchi kulomba kwakonsha kwimukwasha nyi? Inge mwalomba kwi Lesa mwayila kyaswa muchima wanji, ukemukwasha kuyuka mwa kubila na makatazho o mubena kupitamo.—Monai kakitenguluzha ka kuba’mba “Kulomba kwi Lesa Kwakonsha Kwimukwasha Byepi?”

Kulomba kwi Lesa Kwakonsha Kwimukwasha Byepi?

Mukekala na mutende wa mu milanguluko

“Saka musolola kwi Lesa bintu byo mukeba; kabiji mutende wa Lesa wakila milanguluko ya bantu ukalama michima ne milanguluko yenu kupichila mwi Kilishitu Yesu.” (Filipai 4:6, 7) Inge mwamubuula Lesa makatazho enu onse, aye ukemukwasha kubula kulukusha muchima kabiji mukayuka mwa kubila na makatazho.

Mukekala na maana afuma kwi Lesa

“Umvwe umo mwi anweba wakepelwa maana, alombenga kwi Lesa, mambo aye upana na muchima yense ku bonse kwa kubula kunenañana, kabiji ukamupao.” (Yakoba 1:5) Inge tubena kupita mu makatazho, javula tukankalwa kufuukula bulongo mwa kubila. Pakuba inge twalomba maana kwi Lesa, aye ukemuvululamo mafunde a mu Baibolo akemukwasha kuyuka mwakubila.

Lesa ukemupa bulume ne kwimutekenesha

“Mambo bintu byonse nji na ngovu ya kwibyuba na mambo a yewa umpa bulume.” (Filipai 4:13) Byo aji Lesa wa bulume bonse, ukemupa bulume bwa kwimukwasha kuyuka mwa kubila na makatazho ne bulume bwa kuchinchika meseko. (Isaya 40:29) Kabiji Baibolo waamba pe Yehoba amba “Lesa wa lutekenesho lonse.” Aye uketutekenesha “mu meseko etu onse.”—2 Kolinda 1:3, 4.

NANCHI KULOMBA KWAKONSHA KWIMUKWASHA NYI?

Yehoba kechi ukanjikizha bantu kulomba kwi aye ne. Bino ukeba’mba mulombenga kwi aye. (Yelemiya 29:11, 12) Pano mwakonsha kuba byepi inge kunyumakwe mwalombelepo bintu bimo kabiji mwalangulukile’mba Lesa kechi wakumbwile milombelo yenu ne? Kechi mwafwainwa kuleka kulomba kwi aye ne. Byonkatu byuba bansemi kechi bapa baana babo aku balombatu kintu nangwa kwibapa bintu byo babena kukeba ponkapotu ne. Kampe bansemi bamonapo jishinda jikwabo ja kukwashishamo baana babo. Kishinka ke kya kuba’mba bansemi bapa baana babo bintu byo bakeba pa kimye kyafwainwa.

Yehoba Lesa, ye shenu wimutemwa bingi kabiji ukeba kwimukwasha. Inge ke mulenguluke languluke pa bishinka bya mu Baibolo byo twaambapo ne kwibingijishanga mu bwikalo bwenu, Lesa ukakumbulanga milombelo yenu.—Salamo 34:15; Mateo 7:7-11.