Byo Twafwainwa Kuba pa Kuba’mba Tukatwele mu Ntanda Ipya

Mutwe wafumako waamba’mba katatakatu Lesa akafumyepo makatazho onse pano pa ntanda. Twashiinwa kuba’mba ukekyuba. Ñanyi kintu kyalengela kushiinwa? Mambo byo byaamba Mambo a Lesa amba:

“Pano pa ntanda pabena kupita.”—1 YOANO 2:17.

Twashiinwa kuba’mba pano pa ntanda pakekalanga bantu bakapuluka, mambo kinembelo kya 1 Yoano 2:17 kyaamba ne kuba’mba:

“Awa uba kyaswa muchima wa Lesa ukekala myaka ne myaka.”

Onkao mambo, twafwainwa kubanga kyaswa muchima wa Lesa pa kuba’mba tukapuluke. Pa kuba’mba tuyuke kyaswa muchima wa Lesa, twafwainwa patanshi ku muyuka Lesa.

“BAFWAINWA KWIMUYUKA ANWEBA” LESA PA KUBA’MBA BAKAPULUKE

Bipikichala: 1. Manase waikala ubena kukokoloka. 2. Waikala mu kibamba mo bajila bya kuja, ubena kutanga kyamba saka aji na lusekelo. 3. Mukwabo wamutangila kinembelo ne kumupa kakikachi ka pa jw.org.

Yesu waambile’mba: “Pa kuba’mba bakekale na bumi bwa myaka ne myaka, bafwainwa kwimuyuka anweba Lesa yenka wa kine.” (Yoano 17:3) Onkao mambo, pa kuba’mba tukapuluke ne kutwela mu ntanda ipya, twafwainwa ‘kumuyuka’ Lesa. Kino kibena kulumbulula’mba kechi kupelelatu pa kuyukatu amba Lesa ko aji nangwa kuyukatu bishinka bicheche pe aye ne. Lesa wafwainwa kwikala mulunda netu. Inge mukeba bulunda pakachi kenu kukosa, mwafwainwa kwisambanga ne kutanwanga pamo. Byo byo twafwainwa kubanga inge tukeba bulunda bwetu ne Lesa kukosa. Tangai bukine bumo buji mu Baibolo muyuke byo bwafwainwa kwimukwasha kwikala na bulunda bwawama ne Lesa.

Bukine Botufunda mu Baibolo

Lesa wakebelenga’mba tukekalenga mu Paladisa.

Lesa walengele bantu batanshi ba Adama ne Evwa, ne kwibabika mu bujimi bwawama bingi bobatelanga’mba Edena. Bajinga baoloka, kabiji Lesa wibapele bintu byonse byo bakebelenga pakuba’mba bekale na lusekelo mu bwikalo bwabo ne kwikala myaka ne myaka. Inge batwajijile kwikala na bulunda bwawama ne Lesa, inge kechi bafwile ne. Pakuba bakankelwe kukokela mukambizho wibapeele Lesa.

Twafunda ene mambo o tubena kuyanjila.

Adama kechi wakokejile Lesa ne, kino kyamulengejile kubula kwikala na bumi bwa myaka ne myaka kubikapo ne bantu bonse pano pa ntanda. Baibolo waamba’mba: “Byonkatu bundengamambo byo bwatwelele pano pa ntanda mu muntu umo, ne lufu nalo lwaishijile mu bundengamambo, byonkabyo lufu lwakumbene ku bantu bonse.” (Loma 5:12) Byonkatu muntu byo akonsha kusambula kikola kiji na bansemi banji, ne baana bonse ba kwa Adama nabo basambwile bundengamambo kwi aye. O ene mambo, o tukotela ne kufwa.

Twafunda pa bintu byauba Lesa byafwainwa kwitulengela kukekala na bumi bwa myaka ne myaka.

Baibolo waamba’mba: “Mambo Lesa watemenwe bingi ba pano pa ntanda kya kuba wapaine Mwananji yenkawa umotu, kuba’mba bonse bamwitabila kechi bakonaike ne, poso bakekale na bumi bwa myaka ne myaka.” (Yoano 3:16) Lesa watumine Yesu pano pa ntanda kuba’mba apane bumi bwanji na mamboa atweba. Wamulume wa jizhina ja Prabhakar wa ku India uji na myaka 86, waambile pa butemwe bwitumwesheshe Lesa amba: “Kino kya ubiwe kyamwesha Yehobaa byo antemwa bingi. Na mambo a buno butemwe nji na luketekelo lwa kwikala na bumi bwa myaka ne myaka.”

Twafunda byo twafwainwa kusanta pa bintu bitubila Lesa.

Baibolo waamba’mba tumwesha kusanta pa bintu bitubila Lesa inge ke ‘tulondela mikambizho yanji.’ (1 Yoano 2:3) Yehoba Lesa witubula bintu byo twafwainwa kuba pa kuba’mba twikalenga na lusekelo. (Isaya 48:17, 18, tubyambo twa pashi) Lesa kechi ukeba’mba tuyandenga ne. Witulaya kuba’mba inge saka tulondela mizhilo yanji, tukekala na lusekelo luno ne kukekala na bumi bwa myaka ne myaka.

TANGAINGA BAIBOLO MOBA ONSE

Manase waikala kimye kya kukokoloka ubena kulanguluka pa bintu byo atanga mu Baibolo. — Mwafwainwa kulombanga kwi Lesa ne kutwajijila kuba kyaswa muchima wanji pa kuba’mba mukatwele mu ntanda ipya

Tuja kajo moba onse pa kuba’mba twikale na bumi. Nangwa byonkabyo, Yesu waambile’mba “Muntu kechi ukamwena bumi mu kajo konkatu ne, poso ne mu byambo bifuma mu kanwa ka Yehoba.”—Mateo 4:4.

Lelo jino, mambo a Yehoba aji mu Baibolo. Onkao mambo, inge saka tutanga Mambo a Lesa, tukayuka bukine bwanema bwaamba pa bintu byaubile Lesa kala, byo abena kuba luno ne byo akoba kulutwe.

LOMBAINGA LESA KWIMUKWASHA

Mwafwainwa kuba byepi pa kuba’mba mulondele bimukambizha Lesa inge kya kuba kimukatazha kuchinuzhuka bintu byo ashikwa? Kuyuka Lesa bulongo kwafwainwa kwimukwasha.

Akimonai byaubile mwanamukazhi wa jizhina ja Sakura, waikelenga bwikalo buncha. Byo atendekele kufunda Baibolo, wafunjile mukambizho wa Lesa wa kuba’mba “Chinai bulalelale.” (1 Kolinda 6:18) Sakura walombele kwi Lesa kumukwasha kusankilapo byubilo byanji byatama. Ne luno kimukatazha kushinda uno muteeto. Waambile’mba, “Inge naikala na milanguluko yatama, mfikenatu kulomba kwi Yehoba, kumubula byonse biji ku muchima, mambo nayuka’mba bunke bwami kechi nafwainwa kushinda uno muteeto watama ne. Kulomba kwi Yehoba kwankwasha kufwenya kwipi ne aye.” Byonkatu byaubile Sakura, bantu bavula lelo jino bamuyuka Lesa. Kabiji ubena kwibapa bulume bubena kwibakwasha kupimpula byubilo byabo ne kumutokesha ku muchima.—Filipai 4:13.

Inge mwamuyuka Lesa byo aji, ‘mukayukanyikwa kwi aye’ ne kwikala balunda nanji. (Ngalatiya 4:9; Salamo 25:14) Kuba bino kukemulengela kupuluka ne kutwela mu ntanda ipya ya Lesa. Pano ñanyi bintu byawama bikekala mu ntanda ipya? Mutwe walondelapo wakumbula buno bwipuzho.

a Baibolo waamba’mba Lesa jizhina janji Yehoba.