Nanchi Mwayuka Nyi?

Mambo ka o kyawamine Yehoba kuswisha bena Isalela kupana mulambo wa tutela tubiji nangwa twana twa nkunda tubiji?

KWESAKANA na Mizhilo, Yehoba watambwilanga mulambo wa tutela ne wa bankunda. Kimye kyonse inge babena kwamba pa milambo, atuno tuñonyi tubiji betutongwelanga pamo, kabiji kyajingatu bulongo muntu kupana katela kamo nangwa mwana nkunda umo inge kya kuba ko konka ko aji nako. (Levi 1:14; 12:8; 14:30) Mambo ka o kyawamijile? Kishinka kimo ke kya kuba’mba tutela kechi twaikalangako kimye kyonse ne. Mambo ka?

Tutela tuviluka, kabiji twikala mu Isalela mu bañondo ba kyuya. Pa mwaka pa mwaka mu October, tuvilukila ku byalo kwatwa kyuya bya ku kabeta ka ku bulenge, kabiji tubwela mu Isalela mu kimye kya mwela wa mebele. (Lwimbo. 2:11, 12; Yele. 8:7) Kino kibena kumwesha kuba’mba, kala mu Isalela mu kimye kya mayoo kyakatazhanga mwina Isalela kutaana katela kakupana mulambo.

Bino bankunda abo kechi batemwa kuviluka ne. Onkao mambo, baikalangako kimye kyonse mu Isalela. Kabiji kintu kyawamine ke kya kuba’mba bantu balelanga bankunda. (Esakanyaiko Yoano 2:14, 16.) Buku umo waamba’mba, “bantu bonse baikalanga ku muzhi ne mu mataunyi a mu Pelisitina balelanga ba nkunda. (Bible Plants and Animals) Pa mazubo onse pajinga bikumbi bya bankunda, nangwa mena mu nsakwa mwaikalanga bañonyi.”—Esakanyaiko Isaya 60:8.

Onkao mambo, Yehoba wamwesheshe butemwe ne kulangulukilako bantu kupichila mu kuswisha bena Isalela kupana mulambo wa tuñonyi twaikalangako kimye kyonse.