Twakonsha Kwikala Myaka ne Myaka

1. Kulanguluka languluka pa mulaye wa kwikala myaka ne myaka witulaya Yehoba kuketulengela kuba ka?

YEHOBA walaya kuba’mba bantu bamukookela bakekala na “bumi bwa myaka ne myaka.” (Loma 6:23) Umvwe ketulanguluke languluke pa bumi bwa myaka ne myaka bwitulaya Yehoba, butemwe bo twamutemwa bukabaya. Akilangulukai pa kino: Shetu wa mwiulu witutemwa bingi kya kuba ukeba atweba kwikala myaka ne myaka kwa kubula kufwa.

2. Mulaye wa kuba’mba tukekala myaka ne myaka witukwasha byepi?

² Mulaye wa Lesa wa kwikala myaka ne myaka witukwasha kuchinchika meseko o tupitamo luno. Nangwa kya kuba balwanyi betu betwambila’mba basa kwitwipaya kechi tukaleka kwingijila Yehoba ne. Mambo ka? Kishinka kimo ke kya kuba’mba mambo twayuka’mba inge twafwa bakishinka kwi Yehoba uketusangula. Kabiji tukekala na luketekelo lwa kuba’mba kechi tukafwa jibiji ne. (Yoa. 5:28, 29; 1 Ko. 15:55-58; Hebe. 2:15) Mambo ka o twafwainwa kushiinwa kuba’mba twakonsha kwikala na bumi bwa myaka ne myaka? Akilangulukai pa bino bishinka.

YEHOBA WIKALA MYAKA NE MYAKA

3. Mambo ka o twafwainwa kuketekela kuba’mba Yehoba uketulengela kwikala myaka ne myaka? (Salamo 102:12, 24, 27)

³ Twayuka kuba’mba Yehoba wakonsha kwitulengela kwikala myaka ne myaka mambo ye Nsulo ya bumi, kabiji waikalako myaka ne myaka. (Sala. 36:9) Monai Binembelo bimo byaambapo kuba’mba Yehoba waikalako myaka ne myaka kabiji ukatwajijila kwikala myaka ne myaka. Salamo 90:2 waamba’mba Yehoba waikalako “kufumatu kala kene kufika ne myaka ne myaka.” Salamo 102 naye byo byo aamba. (Tangai Salamo 102:12, 24, 27.) Kabiji ngauzhi Habakuka wanembele pe Shetu wa mwiulu amba: “Anweba Yehoba, nanchi kechi yenu mujiko kufumatu ne kala kene nenyi? Anweba Lesa wami, Wazhila wami, kechi mufwa ne.”—Ha. 1:12.

4. Nanchi twakonsha kwakamwa inge kya kuba kitukatazha kukwatakanya’mba Yehoba waikalako myaka ne myaka nyi? Lumbululai.

⁴ Nanchi kimukatazha kukwantakanya’mba Yehoba ye Lesa wa “myaka ne myaka” nyi? (Isa. 40:28) Bantu bavula kibakatazha bingi kukwatakanya kino kishinka. Elihu waambile pe Lesa amba: “Kuvula kwa myaka yanji kechi twakonsha kwikuyuka ne.” (Yoba 36:26) Bino kechi twakonsha kwamba’mba kintu kifwako na mambo a kuba’mba kechi twikiyuka ne. Nabiji inge kechi twayuka bingila kyeya ne, nanchi twakonsha kwamba’mba kyeya kifwako nyi? Ine. Kyo kimotu, ne atweba bantu twakonsha kukankalwa kukwatakanya kishinka kuba’mba Yehoba ye Lesa wa myaka ne myaka kabiji ukatwajijila kwikalako myaka ne myaka. Onkao mambo kukankalwa kukwatakanya kino kishinka kechi kulumbulula’mba Lesa kechi wakonsha kwikala myaka ne myaka ne. Kubula kuyuka Mulenga kechi kulumbulula’mba ufwako ne. (Loma 11:33-36) Kabiji nangwatu mu kimye kyabujileko jiulu, ntanda ne juba, aye wajinga konka. Yehoba witubuula kuba’mba “aye ye walengele ntanda na bulume bwanji.” Kabiji wajingako saka akyangye ‘kutanyika jiulu.’ (Yele. 51:15; Byu. 17:24) Ñanyi kishinka kikwabo kyakonsha kwitulengela kushiinwa kuba’mba kyakonsheka atweba kwikala myaka ne myaka?

YEHOBA WITULENGELE KUBA’MBA TUKEKALENGA MYAKA NE MYAKA

5. Ñanyi luketekelo lwajinga ne Adama ne Evwa?

⁵ Bintu byonse Yehoba bya alengele byakonsheshe kufwa, bino bantu bobo alengele kuba’mba bakekalenga myaka ne myaka. Kechi wibalengele’mba bakafwenga ne. Nangwa byonkabyo, Yehoba wakambizhe Adama amba: “Ku kichi kya kuyuka byawama ne byatama, kechi wafwainwa kujako ne, mambo mu juba jo ukajako, kine ukafwa.” (Nte. 2:17) Umvwe Adama ne Evwa bakookejile Yehoba inge kechi bafwile ne. Kino kibena kilumbulula’mba kulutwe na lwendo Yehoba wakonsheshe kwibaswisha kujako ku kino “kichi kya bumi.” Kabiji kino inge kyalumbulwile’mba wibaswisha kwikala na bumi bwa “myaka ne myaka.”b—Nte. 3:22.

6-7. (a) Ñanyi kintu kikwabo kimwesha’mba bantu kechi bebalengele’mba bakafwenga ne? (b) Ñanyi bintu byo mukebesha kuba? (Monai bipikichala.)

⁶ Bashayuka ba sayansi bataana kuba’mba bongo bwetu bwakonsha kulama bintu byavula kukila bintu byo twakonsha kufunda mu bwikalo bwetu bonse. Kino kishinka kyanema bingi. Mu 2010 buku umo waambile’mba bakonsha kulama vidyo ye bakopelamo bintu yo twakonsha kutamba maola 3 milyonyi, kabiji uno vidyo twakonsha kumutamba myaka 300. Kino kibena kulumbulula’mba bongo bwakonsha kulama bintu kukila pa kino kibelengelo. Onkao mambo, kino kibena kumwesha’mba Yehoba walengele bongo bwetu kulama bintu byavula kukila byo twakonsha kufunda mu myaka 70 nangwa 80 ya bumi bwetu.—Sala. 90:10.

⁷ Kabiji Yehoba witulengele na mulanguluko wa kwikala myaka ne myaka. Baibolo waamba’mba Lesa “wabika mulanguluko wa kwikala myaka ne myaka mu michima yetu.” (Sapwi. 3:11) Kino kyo kitulengela kumonanga lufu amba mulwanyi. (1 Ko. 15:26) Umvwe twakolwa nanchi twikalatu’mba byonkabye tufwe nyi? Ine. Javula tuya ku kipatela kabiji tutoma ne muchi pa kuba’mba kikola kipwe. Twibikako bingi kuba’mba tubule kufwa. Kabiji muntu ye twatemwa inge wafwa, nangwa mwanyike nangwa mukulumpe, kitukola bingi ku muchima kabiji twikala na bulanda pa kimye kyabaya. (Yoa. 11:32, 33) Tukebesha bingi kwikala myaka ne myaka mambo Mulenga wetu byo byo etulengele, kabiji tukatwajijila kufunda myaka ne myaka. Kwa kubula ne kuzhinaukatu ne, Mulenga wetu uketulengela kwikala myaka ne myaka. Bino kuji ne bishinka bikwabo bitukwasha kushiinwa kuba’mba twakonsha kwikala na bumi bwa myaka ne myaka. Pano twayai twisambe pa bintu byaubile Yehoba kala ne byo abena kuba lelo jino bimwesha’mba kechi wapimpula byo akebelenga kuba ne.

YEHOBA KECHI WAPIMPULA KYASWA MUCHIMA WANJI NE

8. Isaya 55:11 witufunjisha ñanyi bintu Yehoba byo akeba kwitubila?

⁸ Nangwa kya kuba Adama ne Evwa balengele mambo ne kuletela baana babo lufu, Yehoba kechi wapimpula byo akebelenga ne. (Tangai Isaya 55:11.) Ukeba kuba’mba bantu ba kishinka bakekale myaka ne myaka. Twayuka kino na mambo a bintu Yehoba byo aamba ne byo auba pa kufikizha kyaswa muchima wanji.

9. Ñanyi kintu Lesa kyo alaya? (Danyela 12:2, 13)

⁹ Yehoba walaya kuba’mba ukasangula bantu bafwa ne kwibalengela kwikala na bumi bwa myaka ne myaka. (Byu. 24:15; Titu. 1:1, 2) Muntu wa kishinka aye Yoba waambile’mba Yehoba ukebesha bingi kusangula bafwa. (Yoba 14:14, 15) Ngauzhi Danyela waambile kuba’mba bantu bakebasangula ne kwikala myaka ne myaka. (Sala. 37:29; tangai Danyela 12:2, 13.) Bayudea bajingako mu moba a kwa Yesu bayukile’mba Yehoba ukapa bakalume banji ba kishinka “bumi bwa myaka ne myaka.” (Luka 10:25; 18:18) Yesu waambile pa uno mulaye bimye byavula, kabiji aye mwine bamusangwile kwi Shanji.—Mat. 19:29; 22:31, 32; Luka 18:30; Yoa. 11:25.

10. Lusanguko lwaubiwe kala lumwesha ka? (Monai kipikichala.)

¹⁰ Yehoba ye upana bumi kabiji uji na bulume bwa kusangula bantu bafwa. Wapele Elaija bulume bwa kusangula mwana wa mwanamukazhi wafwijilwe wa ku Zalefwata. (1 Mfu. 17:21-23) Mu kuya kwa moba, Lesa wakwashishe ngauzhi Elisha kusangula mwana wa mwanamukazhi mwina Shunema. (2 Mfu. 4:18-20, 34-37) Luno lusanguko ne lukwabotu lwaubiwe lumwesha kuba’mba Yehoba uji na bulume bwa kusangula bantu bafwa. Yesu byo ajinga pano pa ntanda, Shanji wamupele bulume bwa kusangula bafwa. (Yoa. 11:23-25, 43, 44) Yesu luno uji mwiulu kabiji bamupa “luusa lonse pa bintu bya mwiulu ne bya pano pa ntanda.” Onkao mambo, uji na bulume bwa kufikizha mulaye wanji wa kuba’mba “aba bonse baji mu bilende” bakasangulwa ne kwikala na bumi bwa myaka ne myaka.—Mat. 28:18; Yoa. 5:25-29.

11. Bukuzhi bwalengela byepi kuba’mba tukekale na bumi bwa myaka ne myaka?

¹¹ Mambo ka Yehoba o aswishishe Mwananji kufwa lufu lwatama bingi? Yesu wakumbwile buno bwipuzho byo aambile’mba: “Mambo Lesa watemenwe bingi ba pano pa ntanda kya kuba wapaine Mwananji yenkawa umotu, kuba’mba bonse bamwitabila kechi bakonaike ne, poso bakekale na bumi bwa myaka ne myaka.” (Yoa. 3:16) Lesa byo apaine Mwananji kwikala bukuzhi bwa kwitukuula ku bundengamambo bwetu, witulengela kuba’mba tukekale na bumi bwa myaka ne myaka. (Mat. 20:28) Mutumwa Paulo walumbulwile buneme bwa kino kintu kyaubile Lesa byo anembele’mba: “Mambo lufu byo lwaishile kupichila mu muntu umo, ne lusanguko lwa bafu nalo lwiya kupichila mu muntu umo. Byonkatu bantu bonse byo bafwa na mambo a kwa Adama, byonkabyo bonse bakasangulwa na mambo a Kilishitu.”—1 Ko. 15:21, 22.

12. Bufumu bukafikizha byepi kyaswa muchima wa Yehoba kwi atweba?

¹² Yesu wafunjishe baana banji ba bwanga kulomba’mba Bufumu bwa Lesa bwiye ne kyaswa muchima wa Lesa kyubiwe pano pa ntanda. (Mat. 6:9, 10) Kyaswa muchima wa Lesa ke kya kuba’mba bantu bakekalenga na bumi bwa myaka ne myaka pano pa ntanda. Pa kuba’mba obe kino, Yehoba watongola Mwananji kwikala Mfumu wa Bufumu bwa Bumesiasa. Kabiji Lesa ubena kukonkanya pamo bantu 144,000 kufuma pano pa ntanda kuba’mba bakengijile pamo ne Yesu kufikizha kyaswa muchima wa Lesa.—Lum. 5:9, 10.

13. Ñanyi kintu kibena kuba Yehoba luno, kabiji anweba mwafwainwa kuba byepi?

¹³ Yehoba ubena kukonkanya “jibumba jikatampe” ja bantu ne kwibafunjisha bya kwikala bangikazhi mu Bufumu bwanji. (Lum. 7:9, 10; Yako. 2:8) Nangwa kya kuba bantu bavula baabenamo na mambo makondo ne lupato, bino baji mu jino jibumba jikatampe babena kwibikako kuchinuzhuka bintu byonse bileta lupato. Byubilo byabo bimwesha’mba babunda mapoko abo kwialula ke bya kujimako. (Mika 4:3) Abo kechi balwako makondo alengela bantu bavula kufwa ne, pakuba bakwasha bantu kuyuka byo bafwainwa kwikala na “bumi bwa kine kine” byo bebafunjisha bukine pe Lesa ne kyaswa muchima wanji. (1 Timo. 6:19) Ba mu kisemi bakonsha kwibemena ku ntundwa nangwa kwibalengela kubula kwikala na mali na mambo a kutundaika Bufumu bwa Lesa, bino Yehoba wibakwasha kwikala na bikebewa mu bwikalo. (Mat. 6:25, 30-33; Luka 18:29, 30) Bino bishinka bitukwasha kuyuka kuba’mba Bufumu bwa Lesa ko buji kabiji bukatwajijila kuba kyaswa muchima wa Yehoba.

BWIKALO BWAWAMA BUJI KULUTWE

14-15. Mulaye wa Yehoba wa kufumyapo lufu ukafika byepi?

¹⁴ Yesu luno ke Mfumu wa Bufumu bwa Lesa mwiulu kabiji ubena kufikizha milaye yonse yalaile Yehoba. (2 Ko. 1:20) Kutendeka mu mwaka wa 1914, Yesu watwajijila kushinda balwanyi banji. (Sala. 110:1, 2) Aye ne bo akalamanga nabo, katatakatu bakapwishe kushinda ne konauna babi.—Lum. 6:2.

¹⁵ Mu Bukalama bwa kwa Yesu bwa Myaka Kiumbi, bantu bafwa bakebasangula kabiji ba lukookelo bakebakwasha kwikala balumbuluka. Umvwe lweseko lukapelako lwapita, aba bonse Yehoba bo akamona’mba baoloka “bakaswana ntanda, kabiji bakekalangamo myaka ne myaka.” (Sala. 37:10, 11, 29) Kabiji kya lusekelo ke kya kuba’mba, “mulwanyi wapelako, ko kuba’mba lufu, bakeluzhiya.”—1 Ko. 15:26.

16. Ñanyi kintu kikatampe kitulengela kwingijila Yehoba?

¹⁶ Mu uno mutwe twafunda kuba’mba luketekelo lwetu lwa kwikala myaka ne myaka lwaimena pa Mambo a Lesa. Luno luketekelo lwakonsha kwitukwasha kutwajijila kwikala ba kishinka mu ano moba akatazha a kupelako. Bino kukeba kwikala na bumi bwa myaka ne myaka kechi kyo kyonkatu kyafwainwa kwitulengela kwibikako kutokesha Yehoba ku muchima ne. Kine kintu kitulengela kutwajijila kwikala ba kishinka kwi Yehoba ne Yesu ke kya kuba’mba twibatemwa bingi. (2 Ko. 5:14, 15) Buno butemwe bo bwitutundaika kusapwila ne kulondela byubilo byabo. (Loma 10:13-15) Inge twafunda kwikala bampanyi ne kubula kwitemwatu atweba bene, Yehoba ukakeba kwikala mulunda netu myaka ne myaka.—Hebe. 13:16.

17. Twafwainwa kuba byepi atweba bonse pa muntu pa muntu? (Mateo 7:13, 14)

¹⁷ Nanchi tukekala pa bantu bakekala na bumi bwa myaka ne myaka nyi? Yehoba witubuula jishinda ja bumi bwa myaka ne myaka. Bino twafwainwa kusalapo kutwajijila kwenda mu jino jishinda. (Tangai Mateo 7:13, 14.) Nga bwikalo bukekala byepi kimye kyo tukekalanga myaka ne myaka? Tukakumbula buno bwipuzho mu mutwe walondelapo.