1 | Lulombelo “Saka Mutaya Bijikila Byenu Byonse pe Aye”

BAIBOLO WAAMBA’MBA: “Saka mutaya bijikila byenu byonse pe [Lesa], mambo wimuta muchima.”—1 PETELO 5:7.

Mwatala Bino Byambo

Yehoba Lesa ukeba’mba tumubuulenga bijikila byetu byonse. (Salamo 55:22) Twakonsha kulomba pa makatazho onse, akatampe nangwa acheche. Bintu byanema kwi atweba, byanema ne kwi Yehoba. Kulomba kwi aye kwanema bingi mambo kwitukwasha kwikala na mutende wa mu milanguluko.—Filipai 4:6, 7.

Bino Byambo byo Byakonsha Kwimukwasha

Inge paji bintu bibena kwitukatazha mu milanguluko twakonsha kutendeka kwiumvwa’mba tujitu bunke. Bakwetu kechi bakonsha kuyuka bintu byonse byo tubena kupitamo ne. (Byambo bya Maana 14:10) Bino inge twamubuula Lesa mu lulombelo bintu biji ku muchima wetu, aye uteleka ne kuyuka bintu byo tubena kupitamo. Yehoba witumona, wayuka makatazho o tupitamo kabiji ukeba’mba tumubuulenga mu lulombelo bintu byonse biji ku muchima wetu.—2 Byambo bya Moba 6:29, 30.

Kwisamba ne Yehoba mu lulombelo kwitukwasha kushiinwa’mba wituta muchima. Twakonsha kwiumvwa byonka byaumvwine nyimbi wa ma masalamo wanembele’mba: “Mwamona kumanama kwami; mwayuka bya malwa byami bikatampe.” (Salamo 31:7) Kuyuka’mba Yehoba wayuka byo tubena kupitamo kwitukwasha kutwajijila kuchinchika makatazho. Nangwa byonkabyo, kechi utalapotu ne. Kupusanako na bantu, aye wayuka bulongo byo tubena kupitamo, kabiji witukwasha kutaana lutekenesho ne lutundaiko mu Baibolo.

Baibolo byo Abena Kukwasha Bantu Julian

Bijikila Binkatazha

“Ngikala bingi na bijikila kabiji nji ne na kikola kya kukizhamo kwakamwa kitelwa’mba obsessive-compulsive disorder (OCD). Ngikala na bijikila kya kubazhimukilatu. Bimye bimo ngikalatu bulongo, bino inge papita kakimye kacheche bijikila biya kwakubula kuyuka kyalengela ne. Javula ngikala na bijikila inge nji na bantu. Ngakamwa bingi pa byo balanguluka pe amiwa.

“Bakwetu bayuka byo mpitamo, bankwasha bingi. Bino bimye bimo byambo byo bamba kechi binkwasha ne. Nangwa byonkabyo, nsanta pa byo bebikako kunkwasha.

“Bimye bimo bijikila ne kikola kya kukizhamo kwakamwa bindengela kukankalwa kulomba. Pakebewa kwibikako pa kuba’mba nesambe ne Yehoba mu lulombelo. Ndanguluka pa bintu byavula pa kimye kimo kya kuba binvulañanya bongo. Inge milanguluko yavula, nkankalwa kuyuka bya kuba nangwa kwamba byo mbena kwiumvwa.”

Binkwasha Baibolo

“Kutanga Baibolo kwamfunjisha’mba milombelo kechi yafwainwa kwikala yalepa nangwa ya mulambisha pa kuba’mba itabilwe kwi Lesa ne. Bimye bimo inge nakankalwa kwamba byo mbena kwiumvwa, ndombatu’mba: ‘Yehoba nkwashai.’ Yehoba uyuka byo mbena kupitamo kabiji umpa bukwasho bo mbena kukeba pa kyo kyo kimye. Kununga pa kulomba, nesamba na badokotala pa kikola kyami. Nji bingi na lusekelo mambo kulomba ne kwisamba na badokotala kunkwasha bingi. Nebikako kulomba kwi Tata wami wa mwiulu mambo nashiinwa’mba wantemwa kabiji ukebesha kunkwasha.”